1 Kɔrinto 9 - Fana Ngbangɔ 1987

Wa pango kwa tɛ Yezo ndoka tɛrɛ lo na Iege ti kwa tɛ lo

¹ Biani, mbi zo mɛ bɔrɔ! Biani, mbi wa pangɔ kwa tɛ Yezo! Biani, mbi hũ ndo Gbia tɛ e Yezo na lɛ mbi! Biani, ĩ ti awa Kristo na lo ti kwa tɛ Gbia Yezo mɛ ndo mbi li ka tɛ ĩ.

² Bɛ se azi mɛ ndɛ̃ akɛ̃ ya, ta mbi wa pangɔ kwa tɛ Yezo ma ko, ĩ hĩnga tɛ ĩ ya, mbi wa pangɔ kwa tɛ lo. Ta sanga ma, nga ma la ĩ ti awa Kristo ko, afa ya, mbi wa pangɔ kwa tɛ Yezo biani.

³ Ĩ ma se mɛ se azi adi mbi, ko mbi bere na nyɔ mbi lo mɛ:

⁴ Biani, mbi lengbi ti luangɔ tɛ ti tɛngɔ, nga na ye ti nyɔngɔ na lege ti kwa mɛ mbi ndoli.

⁵ Mbi lengbi nga ti mungɔ ya mbi wa Kristo, gwengɔ na lo fɔnɔ, nga ma se tɛ Petro, na awa pangɔ kwa tɛ Gbia Yezo mɛ ndɛ̃, nga na angambi Gbia Yezo.

⁶ Ĩ da bɛ ĩ ya, bo mbi Polo na Barnabasi la e lengbi ti lingɔ kwa so kãngɔ na tɛrɛ e?

⁷ Ĩ da bɛ ĩ ya, ta turugu ndokã tɛrɛ lo na faranga ti kwa tɛ lo ma? Biani, lo ndokã tɛrɛ lo na ni! Ĩ da bɛ ĩ ya, ta zo ndotɛ ye ti yaka mɛ lo ndosɛ̃ ma? Biani, lo ndotɛ ni! Ĩ da bɛ ĩ ya, ta wa kwa mɛ ndobata abagara ndonyɔ mɛ tɛ abagara ni ma? Biani, lo ndonyɔ ni.

⁸ Ta ĩ da bɛ ĩ ya, mbi sara bo aye mɛ azi ahĩnga, la mbi pa hɛ̃ ĩ ma. Ndia tɛ Mɔizɛ apa nga so.

⁹ Mɔizɛ alu ndo ndia ya: “Ta mɔ gbe nyɔ bagara mɛ ndodɔrɔ le tɛ hɛ̃ mɔ, so gbanzingɔ lo na tɛngɔ ni ma.” Ta Nzapa atɛnɛ ndo tɛnɛ ni ko bo na lo tɛ abagara kɔi ma.

¹⁰ Kanda lo tɛnɛ ndo nga tɛnɛ ni ko na lo tɛ e. Biani, lo su ndo tɛnɛ ni ko na lo tɛ e. Ale wa sɛ̃ngɔ yaka alɛndɛrɛ ya, ni na tɛngɔ ye ti yaka tɛ ni. Ale wa gungɔ le tɛ alɛndɛrɛ ya, ni nga na tɛngɔ le tɛ ni.

¹¹ E pa ndo tɛnɛ tɛ Nzapa hɛ̃ ĩ nga ma se mɛ andokĩ na ale tɛ ka yaka. Wa se e lua aye ti le sese ka ti ĩ ko, ĩ hũ ya, adu siɔni? Ipɔ, ta adu siɔni ma!

¹² Azi mɛ ndɛ̃ mɛ awa pangɔ kwa tɛ Yezo mɛ ndɛ̃ ndolua ye ka ti ĩ, ko e lengbi nga ti luangɔ ni, kanda tɛ e alengbi ti ɔngɔ tɛ la. Kanda ta e yɔ ndo ye ka ti ĩ ma. E gbe ndo bɛ e na ya apɛnɔ zu mɛ ndo e hũ, na lo mɛ ya, ta e ye ndo ya, e li ye mɛ alengbi ti gbanzingɔ azi na mangɔ Nzɔ̃ Pa tɛ Yezo Kristo ma.

¹³ Ĩ hĩnga nzɔ̃ni ya, awa lingɔ kwa ka ya kota da Nzapa ndotɛ mbanga ye mɛ azi ndohɛ̃ ya, alu na Nzapa ka ya kota da Nzapa. Ko awa lungɔ Nzapa na ye ndotɛ nga mbanga sa mɛ azi ndolu na Nzapa.

¹⁴ Se mɛ ndo nga Gbia Yezo ahɛ̃ na nyɔ lo ya, awa pangɔ Nzɔ̃ Pa atɛ ye na lege ti kwa tɛ la la.

¹⁵ Ta mbi yɔ ndo ye kɔi ka ti ĩ ma, wa ta mbi to nga mbɛti olo hɛ̃ ĩ ya, ĩ to hɛ̃ mbi ye ma. Nzɔ̃ni ale mbi kpi, so mbi yɔ ye ka ti ĩ. Mbi na ndima, ta sanga ma, mbi ndoli kwa gɛgɛrɛ, ko ta zo alengbi ti gbɛ̃ngɔ ndima tɛ mbi ma!

¹⁶ Wa ta mbi ndoyakɛ tɛrɛ mbi, na lo mɛ ya, mbi wa pangɔ Nzɔ̃ Pa tɛ Yezo Kristo ma. Ta sanga ma, se nyɔ mɛ Nzapa ahɛ̃ mbi la. Se ta mbi pa Nzɔ̃ Pa ni ma ko, siɔ lo ati na mbi.

¹⁷ Se adu ya, mbi nvɛni ndo la mbi ye lingɔ kwa olo ko, ale mbi ndokpã bɛ mbi na ndo luangɔ faranga. Kanda nga ma la Nzapa ahɛ̃ mbi nyɔ ya, mbi li kwa ni ko, ale mbi li bo kwa ni.

¹⁸ Mbana gɛrɛ mbi la: dengɔ bɛ mɛ mbi na ni, na lo mɛ ya, Nzɔ̃ Pa mɛ mbi ndopa hɛ̃ azi ko, mbi ndopa ni gɛgɛrɛ. Ko nga ma la mbi wa pangɔ Nzɔ̃ Pa ko, mbi lengbi ti yɔngɔ ye ka ti azi, kanda ta mbi ndoyɔ ma.

¹⁹ Mbi bɔrɔ, ta mbi mbɛ ma. Kanda mbi nvɛni la mbi bi tɛrɛ mbi hɛ̃ azi zu ya, mbi ti mbɛ tɛ la, wadila mbi ili la gba hɛ̃ Gbia Yezo.

²⁰ Ngoi mɛ mbi ndoli kwa na popo tɛ Ayuda ko, mbi ndodu nga ma ala. Mbi ndoli so ya, mbi ili la hɛ̃ Gbia Yezo. Ta mbi na gbɛ ndia tɛ Mɔizɛ ma, kanda ngoi mɛ mbi ndoli kwa na popo tɛ awa tɔndɔngɔ ndia ni ko, mbi ndodu nga ma mbi wa tɔndɔngɔ ndia ni. Mbi ndoli so ya, mbi ili la hɛ̃ Gbia Yezo.

²¹ Ngoi mɛ mbi ndoli nga kwa na popo tɛ azi mɛ ta ahĩnga ndia ni ma ko, mbi ndodu nga ma se tɛ la, ko mbi ndoli nga ma ta mbi hĩnga ndia ni ko ma. Mbi ndoli so ya, mbi ili la hɛ̃ Gbia Yezo. Kanda ta oko afa ya, mbi kɛ̃ tɔndɔngɔ ndia tɛ Nzapa ma. Ta sanga ma, mbi ndotɔndɔ ndia tɛ Yezo Kristo.

²² Ngoi mɛ mbi ndoli kwa na popo tɛ azi mɛ ta lo yengɔ lo tɛ Yezo ali bɛ la kpa ma ko, mbi ndodu nga ma se tɛ la. Mbi ndoli so ya, mbi ili la ngĩi hɛ̃ Gbia Yezo nvɛni. Bɛ se azi adu sia, ngoi mɛ mbi ndoli kwa na popo tɛ la ko, mbi ndodu nga ma se tɛ la. Mbi ndoli so ya, mbi ili ambanga na se kɔdɛ ndɛ̃ ndɛ̃ ndɛ̃ hɛ̃ Gbia Yezo, wadila Nzapa aso la.

²³ Mbi ndoli aye olo zu ya, Nzɔ̃ Pa tɛ Yezo Kristo afɔnɔ, wadila mbi lua nga anzɔ̃ ye mɛ Nzɔ̃ Pa na ni.

²⁴ Ĩ hĩnga nzɔ̃ni ya, na popo tɛ azi zu mɛ ndokpɛ kpɛ so luangɔ mbana gɛrɛ la ko, bo zo kɔi mɛ ndozɔ li ni la ndolua mbana gɛrɛ lo. Wa ĩ́ li kpengbani, nga ma se tɛ azi mɛ ndokpɛ kpɛ, wadila ĩ lua nga mbana gɛrɛ ĩ.

²⁵ Uzu ya awa kpɛngɔ kpɛ zu akpɛ kpɛ ko, ala ndofɔ̃ bɛ la na ya mandangɔ kpɛngɔ kpɛ tɛ la. Ala ndoli so ya, ani zɔ li ni, wa ani lua mbana gɛrɛ ani. Ko ta mbana gɛrɛ la mɛ ala ndolua ndoninga ngbĩi ma. Kanda tɛ e ko, e ndoli ya, e lua mbana gɛrɛ e mɛ ndongbã kaka.

²⁶ Nda mɛ mbi du nga ma wa kpɛngɔ kpɛ mɛ ahĩnga ndo mɛ lo ye kpɛngɔ, singɔ da la. Nda mɛ nga ta mbi du nga ma wa sɔ̃ngɔ gɔbɔ mɛ ndogu fɔ̃ lo na ndo ti wawa ma la.

²⁷ Mbi ndohɛ̃ kota pɛnɔ hɛ̃ tɛrɛ mbi nvɛni ya, mbi fɔ̃ bɛ mbi, so mbi mɛ wa pangɔ tɛnɛ tɛ Nzapa hɛ̃ azi ko, mbi zanga mbana gɛrɛ mbi.