1 Kɔrinto 8 - Fana Ngbangɔ 1987

Sa mɛ alu na angbilondo

¹ Na olo ko, mbi na kambisangɔ hɛ̃ ĩ tɛnɛ ti sa mɛ alu na angbilondo. Tɛnɛ mɛ ĩ ndotɛnɛ ya: “E zu e hĩnga ye ma ya ma” ko, adu biani. Kanda hĩngangɔ ye ma ya ma ndohɛ̃ zo yakɛ. Wa se e yengbi ko, yengbingɔ ni akpengba na lo yengɔ tɛ e.

² Zo ko la ndoda bɛ lo ya, ni hĩnga ye ko, ta lo dɛ lo hĩnga ni, nga ma se mɛ ale lo lengbi ti hĩngangɔ na ni ma.

³ Kanda zo ko la aye Nzapa ko, Nzapa ahĩnga nga lo.

⁴ Ĩ hũnda ndo mbi na lo ti sa mɛ alu na angbilondo ya, zo alengbi ti tɛngɔ ni, bere ta lo lengbi ti tɛngɔ ni ma? E hĩnga nzɔ̃ni ya, angbilondo adu agɛgɛrɛ ye ge lɛ sese. Ko e hĩnga nga nzɔ̃ni ya, Nzapa bo kɔi.

⁵ Ambanga azi ndovɔrɔ aye ti lɛ ndozu na aye ti lɛ sese, ma bere aye ni ko adu anzapa. (Biani, “anzapa” na “agbia” da gba.)

⁶ Abɛ nga so ko, e hĩnga tɛ e ya, Nzapa bo kɔi, lo To e, lo li aye kwe zu, ko e azi tɛ lo. Gbia tɛ e nga bo kɔi, lo la Yezo Kristo. Nzapa ali ndo aye zu ti ndo lo, ko na lo tɛ lo nga la e ndodu lɛ e ngɛ̃.

⁷ Kanda ta awa Kristo zu ahĩnga ya, angbilondo adu agɛgɛrɛ ye ma. Ambanga ahĩngangbi ndo na vɔrɔngɔ angbilondo, ko na olo, se ala tɛ sa mɛ alu na angbilondo ko, ala ndoda bɛ la ya, ani dɛ bo na vɔrɔngɔ angbilondo. Ta lo yengɔ lo tɛ Yezo ali bɛ la kpa ma, na lo ni ko, ala ndoda bɛ la ya, se ani tɛ sa ni ko, afa ya, ani li siɔ ye.

⁸ Kanda ta e lengbi ti tingɔ abɛta azi ka lɛ Nzapa na lo ti tɛ mɛ e ndotɛ ma. Bɛ se e tɛ mbanga ye, bere ta e tɛ ni ma ko, adu ka lɛ Nzapa gɛgɛrɛ.

⁹ Ĩ lengbi ti tɛngɔ ye zu nga ma se mɛ bɛ ĩ aye, kanda í du na kpengba lɛ, so azi mɛ ta lo yengɔ lo tɛ Yezo ali bɛ la kpa ma, ali siɔ ye na lo ti ye mɛ ĩ ndotɛ.

¹⁰ Mɔ mɛ rnɔ ndoda bɛ mɔ ya, mɔ hĩnga ye ma ya ma, se zo mɛ ta lo yengɔ lo tɛ Yezo ali bɛ lo kpa ma, ahũ mɔ ka ya da tɔrɔ, mɔ ndotɛ sa mɛ alu na angbilondo ko, zo ni ko nga na dungɔ na gwɛ̃ ti tɛngɔ ni.

¹¹ Mɔ ndoda bɛ mɔ ya, mɔ hĩnga ye ma ya ma, ko ye mɛ mɔ li agbɛ̃ bɛ zo mɛ ta lo yengɔ lo tɛ Yezo ali bɛ lo kpa ma. Wa hĩnga ya, zo ni ko nga nyita mɔ wa Kristo, ko Yezo akpi ndo nga so lo.

¹² Se ĩ li gi tɛrɛ siɔ ye ko na tɛrɛ ayata ĩ awa Kristo mɛ ta lo yengɔ lo tɛ Yezo ali bɛ la kpa ma, ĩ hɛ̃ nga la pɛnɔ so ko, oko afa ya, ĩ li siɔ ye tɛrɛ Yezo Kristo nvɛni la.

¹³ Na lo ni, se mbi tɛ sa mɛ alu na angbilondo, ko na lo tɛ mbi, nyita mbi wa Kristo ali siɔ ye ko, ta mbi ti tɛ ni bɛ gbɔ ma, so lo li siɔ ye.