1 Kɔrinto 7 - Fana Ngbangɔ 1987

Lo tɛ amɔdo na lo tɛ azi mɛ ako due

¹ Na olo ko, mbi na gbinyangɔ hɛ̃ ĩ tɛnɛ mɛ ndo ĩ hũnda na mbi, na ya mbɛti mɛ ndo ĩ to hɛ̃ mbi. Mbi pa hɛ̃ ĩ ya, nzɔ̃ni ale ta kɔli adu na wali ma.

² Kanda na lo ti kpɛngɔ ya, ta zo ali siɔ ye ti kamɛnɛ ma ko, nzɔ̃ni ale kɔli kɔi kɔi adu na ya lo nvɛni da, ko wali kɔi kɔi adu nga na kɔ lo nvɛni da.

³ Ale ta kɔli akɛ̃ ya lo na tange ma. Ale ta wali akɛ̃ nga kɔ lo na tange ma.

⁴ Ta wali gbia ti tɛrɛ lo nvɛni ma, ta sanga ma, tɛrɛ lo adu ti kɔ lo. Wa ta kɔli nga gbia ti tɛrɛ lo nvɛni ma, ta sanga ma, tɛrɛ lo adu ti ya lo.

⁵ Ko ale ta kɔli na ya lo akɛ̃ngbi na tange ma. Kanda se ala mangbi ya, ani kɛ̃ngbi na pɛ nyi ngoi so sambelangɔ Nzapa, wadila ala kɛ̃ngbi na tange. Wa so pɛni ko, ale ala diri abombi na tange, so Satana ahanda la, ala ha gbengɔ bɛ la na lo gwɛ̃ ti tɛrɛ la gba, ko ala ti kɔmbɛ.

⁶ Tɛnɛ ko la mbi tɛnɛ hɛ̃ ĩ ko, ta adu nyɔ la mbi hɛ ĩ ma, kanda adu wangɔ.

⁷ Ti biani, mbi hũ ge lɛ mbi nzɔ̃ni ya, ale azi zu angbã mɔdo nga ma se tɛ mbi. Kanda ta dungɔ mɔdo adu nzɔ̃ni na lo tɛ azi zu ma, na lo mɛ ya, Nzapa ahɛ̃ nguru ndɛ̃ ndɛ̃ ndɛ̃ hɛ̃ zo kɔi kɔi. Nzapa ahɛ̃ ambanga azi nguru ya, ala ngba mɔdo, lo hɛ̃ ambanga mɛ ndɛ̃ nguru ya, ala du na kɔli bere na wali.

⁸ Ĩ ma tɛnɛ mɛ mbi ye pangɔ hɛ̃ amɔdo nga hɛ̃ awe muã lo mɛ: nzɔ̃ni ale ta ala du na kɔli bere na wali ma. Kanda ale ala ngbã amɔdo nga ma se tɛ mbi.

⁹ Wa se ala ha gbengɔ bɛ la na lo gwɛ̃ ti tɛrɛ la gba ko, ale ala du na kɔli bere na wali. Ta sanga ma, se zo adu na kɔli bere adu na wali ko, adu nzɔ̃ni aɔ omɛ lo ngbã mɔdo, ko lo ngbã na kota gwɛ̃ kɔli bere gwɛ̃ wali.

¹⁰ Wa ĩ ma nyɔ mɛ mbi na hɛ̃ngɔ hɛ̃ awa Kristo mɛ ako due. (Ta mbi la mbi hɛ̃ nyɔ ni ko ma, adu Gbia Yezo Kristo la ahɛ̃ nyɔ ni ko.) Nyɔ ni lo mɛ: ale ta wali mɛ adu na kɔli azia kɔ lo ma.

¹¹ Se lo zia kɔ lo ko, ale ta lo ti du na kɔli mɛ ndɛ̃ ma. Wa se lo ti ye dungɔ na kɔli mɛ ndɛ̃ ko, ale lo lɛkɛ popo tɛ lo na ngbina kɔ lo, ko lo diri ka tɛ lo. Ko ale ta kɔli mɛ adu na wali azia nga ya lo ma.

¹² Wa ĩ ma tɛnɛ mɛ mbi na tɛnɛngɔ hɛ̃ azi mɛ ndɛ̃. (Tɛnɛ ni alo ge nyɔ mbi nvɛni, kanda ta alo ka nyɔ Gbia Yezo Kristo ma.) Tɛnɛ ni lo mɛ: se kɔli na ya lo adu apaganɔ, ko kɔli agbinya bɛ lo ati wa Kristo, kanda wali angbã tɛ lo paganɔ, wa se wali ko aye ya, ni na kɔ ni ani ngbã ndoni kɔi ko, ale ta kɔ lo azia lo ma.

¹³ Se mɛ nga se wali na kɔ lo adu apaganɔ, ko wali agbinya bɛ lo ati wa Kristo, kanda kɔli angbã tɛ lo paganɔ, wa se kɔli aye ya, ni na ya ni ani ngbã ndoni kɔi ko, ale ta ya lo azia lo ma.

¹⁴ Ta sanga ma, kɔli mɛ paganɔ adu nga ma zo tɛ Nzapa na lo tɛ ya lo mɛ wa Kristo, ko wali mɛ paganɔ adu nga ma zo tɛ Nzapa na lo tɛ kɔ lo mɛ wa Kristo. Ta so ma ko, ale aya la adu nga ma aya apaganɔ. Kanda ti bɛta tɛnɛ ko, aya la adu aya Nzapa.

¹⁵ Wa se paganɔ ko la aye ziangɔ ya lo mɛ wa Kristo, bere kɔ lo mɛ wa Kristo ko, aba gi lo, na lo mɛ ya, na ya tɛnɛ olo ko, wa Kristo ti kɔli bere ti wali mɛ ako due alengbi ti lingɔ ye mɛ bɛ lo aye. Ta sanga ma, Nzapa ali ndo ĩ awa Kristo ya, ĩ du na mangbingɔ.

¹⁶ Mɔ wa Kristo ti wali mɛ mɔ du na kɔli mɛ paganɔ, kɔdɛ mɛ mɔ lengbi ti hĩngangɔ biani ya, na lo tɛ mɔ ko, Nzapa alengbi ti songɔ kɔ mɔ nɛ? Mɔ wa Kristo ti kɔli mɛ mɔ du na wali mɛ paganɔ, kɔdɛ mɛ mɔ lengbi nga ti hĩngangɔ biani ya, na lo tɛ mɔ ko, Nzapa alengbi nga ti songɔ ya mɔ nɛ?

Ale ĩ ngbã bo nga ma se ko ndo Nzapa aili na ĩ

¹⁷ Ĩ ma ndia mɛ mbi ndolu hɛ̃ awa Eklezia zu lo mɛ: ale zo kɔi kɔi angbã bo na sé du mɛ ndo Gbia Nzapa ahɛ̃ lo, ko lo ngbã nga bo na se ko ndo lo da na ngoi mɛ Gbia Nzapa aili na lo.

¹⁸ Alengbi ya, se apia ndo afa kɔli ganza, so pɛni la Nzapa aili lo ko, ale ta kɔli ni agi kɔdɛ ya, ni ho ndolo ganza ni ma. Wa se Nzapa aili kɔli mɛ wa popo ko, ale ta kɔli ni anɛ ya, afa ni ganza ma.

¹⁹ Se afa kɔli ganza, bere ta afa lo ganza ma ko, ta adu kota lo ma. Kanda ye mɛ ngbondoni la, ale zo atɔndɔ ndia tɛ Nzapa.

²⁰ Ale ta zo kɔi kɔi azia se mɛ ndo lo da na ngoi mɛ Nzapa aili na lo ma.

²¹ Se adu ya, mɔ ndo mbɛ, la Nzapa aili mɔ ko, ta bɛ mɔ asɔ na lo ni ma. Kanda se mɔ lua lege ti tingɔ bɔrɔ ko, ta mɔ zia ma.

²² Ta sanga ma, mbɛ ko la Gbia Nzapa aili lo ko, lo ti bɔrɔ ka lɛ Nzapa. Se mɛ nga bɔrɔ mɛ Nzapa aili lo ati mbɛ tɛ Yezo Kristo la.

²³ Nzapa atɔ̃ ndo ĩ tɔ̃ngɔ. Wa ta ĩ ti ambɛ tɛ azi ma.

²⁴ Ayata mbi awa Kristo, ale ta zo kɔi kɔi azia se mɛ ndo lo da, na ngoi mɛ Nzapa aili na lo ma.

Tɛnɛ na lo tɛ amɔdo nga na lo tɛ awe muã

²⁵ Na olo ko, mbi na gbinyangɔ tɛnɛ ko ndo ĩ hũnda na mbi na lo tɛ amɔdo. Tɛnɛ mɛ mbi na gbinyangɔ hɛ̃ ĩ ko, ta adu Nzapa la ahɛ̃ nyɔ ni ko ma, kanda adu dangɔ bɛ tɛ mbi nvɛni. Ko ale ĩ ye lo dangɔ bɛ ni, ta sanga ma, mbi du zo mɛ ĩ lengbi ti kpãngɔ bɛ ĩ ndo mbi, na lo mɛ ya, Gbia Yezo ama vundu tɛ mbi.

²⁶ Tɛnɛ ni lo mɛ: na lo ti apɛnɔ mɛ e ndohũ na ngoi olo ko, mbi hũ nzɔ̃ni ya, ale zo kɔi kɔi angbã bo nga ma se mɛ lo da.

²⁷ Se kɔli adu na wali ko, ta lo gi kɔdɛ ya, ni zia wali ni ma. Wa se kɔli adu mɔdo ko, ta lo gi nga kɔdɛ ya, ni du na wali ma.

²⁸ Kanda se pandara adu na wali ko, ta adu siɔ ye la lo li ma. Wa se mɔsia adu nga na kɔli ko, ta adu nga siɔ ye la lo li ma. Ko ĩ hĩnga ya, azi ko la adu na wali, bere adu na kɔli ko, ala na hũngɔ pɛnɔ sĩ so lɛ sese olo. Ko mbi pa ya, í ngbã mɔdo, so ĩ hũ nga pɛnɔ ni ko.

²⁹ Aya bua, í ma nda tɛnɛ mɛ mbi tɛnɛ hɛ̃ ĩ lo mɛ: bi mɛ ndo Nzapa ako hɛ̃ e ko, angbã yakere bi ni alengbi. Ato na olo ko, ale akɔli ko la adu na awe adu nga ma ta ala du na awe ma.

³⁰ Azi ko la na vundu adu nga ma ta ala na vundu ma. Azi ko la bɛ la ndode adu nga ma ta bɛ la ndode ma. Azi ko la ndovɔ̃ ye adu nga ma ta ala na ye mɛ ala vɔ̃ ma.

³¹ Azi ko la ndoli kwa na aye ti lɛ sese olo ko, ale ala hũ aye ni ko ka lɛ la gɛgɛre. Ta sanga ma, sese olo, nga ma se mɛ e ndohũ na ni ko, angbã yakere ti wɛngɔ.

³² Mbi separa ya, ta ĩ kpã bɛ ĩ ngbũ ma. Kɔli ko la mɔdo ko, lo ndokpã be lo na ndo alo tɛ Gbia Yezo, lo ndogi kɔdɛ ya, ni li ye so dengɔ na bɛ Gbia Yezo.

³³ Kanda tɛ kɔli ko la adu na wali ko, lo ndokpã bɛ lo na ndo alo ti lɛ sese, lo ndogi kɔdɛ ya, ni li ye so dengɔ na bɛ ya ni.

³⁴ Na lo ni ko, bɛ lo ndodu sɛ sɛ: kɔi na ndo ya lo, omɛ ndɛ̃ na ndo Gbia Yezo. Se mɛ nga wali mɛ mɔdo, bere mɔsia ndokpã na bɛ lo na ndo alo tɛ Gbia Yezo la, ta sanga ma, lo ndosepara hɛ̃ngɔ tɛrɛ lo nga na bɛ lo zu hɛ̃ Yezo. Kanda wali ko la adu na kɔli ndokpã tɛ lo bɛ lo na ndo alo ti lɛ sese. Lo ndogi kɔdɛ ya, ni li ye so dengɔ na bɛ kɔ ni.

³⁵ Mbi su tɛnɛ olo hɛ̃ ĩ ya, mbi za ĩ, kanda ta mbi su ni ya, mbi du nga ma gbia mɛ ndohɛ̃ nyɔ ma. Mbi separa ya, ĩ li ye na seni nvɛni, ko ĩ ngbã nga na hɛ̃ngɔ tɛrɛ ĩ zu so lingɔ kwa hɛ̃ Gbia Yezo.

³⁶ Na olo ko, mbi na pangɔ tɛnɛ tɛ nyi kɔli na nyi wali mɛ asepara dungbingɔ, ko so pɛni, ala hɛ̃ nyɔ la ya, ta ani ti dungbi ma. Ko se nyi kɔli ko ahũ ya, ni li nyi wali ko siɔni, na lo mɛ ya, ni kɛ̃ dungɔ na lo, wa se gwɛ̃ tɛ nyi wali ko aɔ ndo lo, ko lo hũ ka le lo nzɔ̃ni ya, ani ti dungbi ko, ala lengbi ti dungbingɔ, nga ma se mɛ bɛ lo ye. Oko ta lo li siɔ ye ma.

³⁷ Wa se ta zo mɛ ndɛ̃ agbanzi nyi kɔli ko na dungɔ na nyi wali ko ma, se nyi kɔli ko akɛ̃ dungɔ na lo na se be lo nvɛni, ko se lo lengbi ti gbengɔ bɛ lo na lo gwɛ̃ ti tɛrɛ lo ko, nzɔ̃ni ale ta lo du na nyi wali ni ko ma.

³⁸ Nda mɛ se kɔli adu na wali mɛ lo gbe lo tɛ Ĩo ko, lo li nzɔ̃ni la. Wa se ta lo du na lo ma ko, lo li nzɔ̃ni buai.

³⁹ Wali mɛ adu na kɔli ndongbã so ti kɔ lo na ngoi mɛ kɔ lo ade lɛ lo ngɛ̃. Wa se kɔ lo akpi ko, lo lengbi ti dungɔ na kɔli mɛ bɛ lo aye, kanda ale kɔli ni adu wa Kristo.

⁴⁰ Wa se ta wali ko ati du na kɔli mɛ ndɛ̃ ma ko, bɛ lo na dengɔ sĩ. Oko adu dangɔ bɛ tɛ mbi la. Ko mbi hĩnga ya, tɛnɛ mɛ mbi tɛnɛ hɛ̃ ĩ ko, Tɔrɔ Santo tɛ Nzapa la afa na mbi.