1 Kɔrinto 6 - Fana Ngbangɔ 1987

Ale ta awa Kristo avɔ̃ to tɛrɛ ayata la ka gbɛlɛ apaganɔ ma

¹ Se mbanga zo na popo tɛ ĩ ana nyita lo wa Kristo adu na tɛne na popo tɛ la ko, ale ta lo nɔ lo vɔ̃ to tɛrɛ nyita lo ka gbɛlɛ awa fangɔ ngbanga mɛ apaganɔ ma. Kanda ale lo si na tɛnɛ ni ka gbɛlɛ azi ti Eklezia.

² Ale ĩ hĩnga ya, azi ti Eklezia gbanda la afa ngbanga tɛ azi ti lɛ sese! Ko nga ma ĩ gbanda la ĩ fa ngbanga tɛ azi ti lɛ sese ko, kɔdɛ mɛ ta ĩ lengbi nga ti fangɔ ngbanga ti anzina atɛnɛ ma sia?

³ Singa na aangelo mɛ gbanda e fa ngbanga tɛ la, o singa na alo ti lɛ sese olo ma!

⁴ Nda mɛ se ĩ na ayata ĩ awa Kristo ĩ du na tɛnɛ na popo tɛ ĩ ko, ĩ ndonɔ ka gbɛlɛ azi mɛ azi ti Eklezia ndohũ la ka lɛ la gɛgɛrɛ, ya ala fa ngbanga tɛ ĩ nɛ?

⁵ Mbi tɛnɛ so ya, kamɛnɛ agbɔ̃ ĩ. Na popo tɛ ĩ awa Kristo ko, ta ĩ na wa ndara bɛ kɔi mɛ alengbi ti fangɔ ngbanga tɛ afɔ̃ lo mɛ ndɛ̃ da ma? Biani, wa ndara dazu.

⁶ Wa nda mɛ ĩ ndovɔ̃ to tɛrɛ ayata ĩ awa Kristo ka tɛ awa fangɔ ngbanga mɛ apaganɔ nɛ?

⁷ Biani, nga ma la ĩ ndovɔ̃ to tɛrɛ ayata ĩ awa Kristo ko, oko apia afa ya, ĩ yu lege tɛ Nzapa we la. Se zo ali ĩ siɔni, bere lo nzĩ ye tɛ ĩ ko, nzɔ̃ni ale ĩ gbe bɛ ĩ.

⁸ Kanda ĩ la ĩ ndoli azi siɔni, ĩ la ĩ ndonzĩ ye tɛ la. Bɛ se ala du ayata ĩ awa Kristo ko, ĩ kɛ̃ kia ĩ li bo gi tɛrɛ ye ko na tɛrɛ la.

⁹ Ĩ hĩnga nzɔ̃ni ya, ta asiɔ azi asi gbanda ka Kɔdɔrɔ Gbia tɛ Nzapa ma. Ta ĩ handa sɛ tɛrɛ ĩ ma: ta awa lingɔ siɔ ye ti kamɛnɛ, bere awa vɔrɔngɔ angbilondo, bere awa tingɔ kɔmbɛ, bere akɔli mɛ ndofɔnɔ na afɔ̃ la akɔli ma bere afɔ̃ la ni ati awe la, asi gbanda ka Kɔdɔrɔ Gbia tɛ Nzapa ma.

¹⁰ Ta awa nzĩ, bere azi mɛ na gwe ye tɛ afɔ̃ la, bere azi mɛ kana ndogbɔ̃ la, bere azi mɛ ndoguru afɔ̃ la, bere awa nzĩ mɛ ndokpata ye na ti azi, asi nga gbanda ka Kɔdɔrɔ Gbia tɛ Nzapa ma.

¹¹ Wa ĩ ba se mɛ ambanga azi na popo tɛ ĩ ndoli na ni la. Kanda Nzapa ahã ndo siɔ ye tɛ ĩ azi, asara ndo ĩ ya, ĩ du azi tɛ ni. Lo mu ndo ĩ ka lɛ lo ya, ĩ abɛta azi. Lo li ndo so na nguru tɛ Tɔrɔ Santo tɛ lo, na lo mɛ ya, ĩ ye lo tɛ Gbia Yezo Kristo.

Ta ĩ li siɔ ye ti kamɛnɛ ma

¹² Ambanga azi na popo tɛ ĩ ndoda bɛ la ya, ani lengbi ti lingɔ ye zu. Biani, kanda aye mɛ ala lengbi ti lingɔ ni ko, ta kwɛ zu gi nzɔ̃ni na lo tɛ la ma. Mbi lengbi ti lingɔ ye zu, kanda ta mbi lengbi ti bingɔ tɛrɛ mbi ya, mbi ti mbɛ ti ye kɔi ma.

¹³ Ĩ ndoda nga bɛ ĩ ya, ali tɛ na lo ti ya zo, ko ali nga ya zo na lo ti tɛ. Seni la. Kanda Nzapa agbɛ̃ gbanda tɛ na ya. Ko ĩ hĩnga nga ya, ta Nzapa ali ndo tɛrɛ zo ya, zo amu ali na siɔ ye ti kamɛnɛ ma. Kanda lo li ndo ni ya, adu ye tɛ Gbia Yezo Kristo, ko Gbia Yezo Kristo la nvɛ̃ tɛrɛ zo.

¹⁴ Gbia Yezo Kristo akpi ndo, ko Nzapa aso ndo tɛrɛ lo na lo nguru tɛ lo. E kpili gbanda, ko lo so nga gbanda tɛrɛ e na lo nguru tɛ lo.

¹⁵ Ĩ hĩnga ya, tɛrɛ ĩ adu apɛnzɛ tɛrɛ Yezo Kristo. Ko ta mbi lengbi bɛ fani kɔi ya, mbi mu tɛrɛ mbi mɛ adu pɛnzɛ tɛrɛ Yezo Kristo, ko mbi na wali mɛ ngbabo e li na siɔ ye ti kamɛnɛ ma!

¹⁶ Ko ĩ hĩnga nga ya, se kɔli afɔnɔ na wali mɛ ngbabo ko, afa ya, lo na wali ni ko ati tɛrɛ kɔi. Nga ma se mɛ asu na ni ka ya Buku tɛ Nzapa ya: “Kɔli na wali ati gbanda tɛrɛ kɔi.”

¹⁷ Kanda zo ko la afɔ̃ tɛrɛ lo na Gbia Yezo Kristo ko, bɛ lo na bɛ Gbia Yezo Kristo ati bo kɔi.

¹⁸ Na lo ni ko, ta ĩ li siɔ ye ti kamɛnɛ bɛ gbɔ ma. Siɔ ye mɛ ndɛ̃ zu mɛ zo ndoli ko, ta ndogbɛ̃ tɛrɛ lo ma, kanda zo ko la ahɛ̃ tɛrɛ lo so lingɔ siɔ ye ti kamɛnɛ ko, afa ya, lo gbɛ̃ tɛrɛ lo nvɛni.

¹⁹ Ĩ hĩnga biani ya, tɛrɛ ĩ adu nga ma da mɛ Tɔrɔ Santo ndodu dazu. Nzapa ahɛ̃ ĩ Tɔrɔ Santo, ko Tɔrɔ Santo ndodu ka ya tɛrɛ ĩ. Ta tɛrɛ ĩ adu ti ĩ nvɛni ma, tɛrɛ ĩ adu ti Nzapa.

²⁰ Nzapa avɔ̃ ndo ĩ vɔ̃ngɔ. Na lo ni ko, ĩ mu tɛrɛ ĩ, ĩ li na kwa so gondangɔ na Nzapa.