1 Kɔrinto 5 - Fana Ngbangɔ 1987

Ta lingɔ siɔ ye ti kaniɛnɛ alengbi na awa Kristo ma

¹ Mbi ma azi ndopa na ndo kwɛ ya, ambanga azi na popo tɛ ĩ ndoli siɔ ye ti kamɛnɛ, ko siɔ ye ti kamɛnɛ ni adu siɔni buai. Bɛ nga apaganɔ ko, ta ala ndoli gi tɛrɛ siɔ ye ti kamɛnɛ ni ko ma. Mbi ma ya, mbanga kɔli kɔi na popo tɛ ĩ ndofɔnɔ na ya to lo!

² Ko kɔdɛ mɛ ta vundu ti tɛrɛ ĩ ndogbɔ̃ ĩ ma sia? Ye mɛ ĩ hĩnga bo la yakɛngɔ tɛrɛ ĩ! Kɔli ko la ali gi tɛrɛ siɔ ye ko so popo tɛ ĩ ko, ale ĩ toma ndo lo, lo ɔ.

^3-4 Tɛ mbi ko, bɛ se ta mbi na ĩ e ndodu ndoni kɔi ma ko, mbi ndoda bɛ mbi na ĩ ngoi zu. Ko na ili Gbia tɛ e Yezo Kristo ko, mbi pia mbi fa ngbanga tɛ kɔli ko la ali gi tɛrɛ siɔ ye ko we. Mbi fa ngbanga ni ma bere mbi ka popo tɛ ĩ. Ngoi mɛ gbanda ĩ bombi tɛrɛ ĩ ndoni kɔi, ko mbi da be mbi na ĩ ko, nguru tɛ Gbia tɛ e Yezo Kristo adu gbanda ndoni kɔi na ĩ.

⁵ Na ngoi ni gbanda ko, ĩ ka kɔli ni ko hɛ̃ Satana ya, Satana aho ngbonga tɛrɛ lo, wa gbanda na lá ti fangɔ ngbanga tɛ azi ko, Gbia Nzapa aso tɔrɔ tɛrɛ lo.

⁶ Ta adu nzɔ̃ni ya, ĩ gonda tɛrɛ ĩ ma! Ĩ nvɛni ĩ hĩnga nda matɔ olo nzɔ̃ni. Matɔ ni lo mɛ: “Bɛ se yɔrɔ ti susungɔ na mapa adu yakere ko, asusu na mapa zu.”

⁷ Siɔ ye ti kamɛnɛ adu nga ma yɔrɔ ti mapa. Ale ĩ hã ni ka bɛ ĩ ĩ zi, wadila bɛ ĩ ati vuruni pa pa pa. Ĩ li so, wadila bɛ ĩ ati nga ma fana mapa mɛ ta asa yɔrɔ ya ni ma. Mbi hĩnga biani ya, bɛ ĩ apia ati vuruni pá pá pá wɛ. Ta sanga ma, e to nda yenga ti Lipandasi tɛ e wɛ, na lo mɛ ya, Yezo Kristo akpi na lo tɛ e. Lo nga ma nyi ngasã ngbaga tɛ e mɛ alu ya e tɛ na yenga.

⁸ Wa é dɔ siɔ ye ti kamɛnɛ nga na siɔ ye zu e zia, ko é tɛ yenga ni na vuru bɛ nga na bɛta bɛ. Siɔ ye ti kamɛnɛ adu nga ma mapa mɛ asa yɔrɔ ti susungɔ na mapa na ya ni. Ko ta e tɛ gi tɛrɛ mapa ko na ngoi ti yenga ma.

⁹ Na ya mbɛti mɛ ndo mbi to hɛ̃ ĩ ko, mbi pa ndo hɛ̃ ĩ ya, ta ĩ na awa lingɔ siɔ ye ĩ du ndoni kɔi ma.

¹⁰ Ta mbi pa ndo tɛnɛ ni ko hɛ̃ ĩ na lo tɛ azi ti le sese olo mɛ ndoli siɔ ye ti kamɛnɛ, bere ala mɛ na gwɛ̃ ye tɛ afɔ̃ la, bere awa nzĩ, bere awa vɔrɔngɔ angbilondo ma. Ta sanga ma, se ta ĩ ye ya, ĩ na la zu ĩ du ndoni kɔi ma ko, ale ĩ zia sese olo mɛ.

¹¹ Kanda mbi separa ndo pangɔ hɛ̃ ĩ ya, se zo apa ya, ni wa Kristo, wa se lo li siɔ ye ti kamɛnɛ, bere lo na gwɛ̃ ye tɛ afɔ̃ lo, bere lo wa vɔrɔngɔ angbilondo, bere lo wa gurungɔ azi, bere lo zo mɛ kana ndogbɔ̃ lo, bere lo wa nzĩ ko, ta ĩ na lo ĩ du ndoni kɔi ma. Ta ĩ na gi tɛrɛ zo ko ĩ lengbi bɛ nga ti tɛngɔ ye ndoni kɔi ma.

^12-13 Wa azi ko la ta ala awa Kristo ma ko, ta kwa ti fangɔ ngbanga tɛ la aba mbi ma. Nzapa gbanda la afa ngbanga tɛ la. Kanda ale ĩ ndofa ngbanga tɛ awa Kristo! Ĩ li nga ma se ko ndo la asu na ni ka ya Buku tɛ Nzapa ya: “Ale ĩ toma siɔ zo na popo tɛ ĩ, lo ɔ.”