1 Kɔrinto 4 - Fana Ngbangɔ 1987

Awa pangɔ kwa tɛ Yezo Kristo

¹ Wa ale ĩ hĩnga ya, e awa kwa tɛ Yezo Kristo, ko Nzapa ahɛ̃ ndo e kwa ti pangɔ bɛta lo tɛ lo Nzapa mɛ ta azi ahĩnga ma.

² Ĩ nvɛni ĩ hĩnga nzɔ̃ni ya, se gbia azia kwa na ti wa kwa tɛ lo ko, ale ta wa kwa ko aweza kwa ni ma.

³ Tɛ mbi, bɛ ĩ bere awa fangɔ ngbanga afa ngbanga tɛ mbi ko, mbi ndohũ ni ka lɛ mbi bo gɛgɛrɛ. Ko ta mbi ndofa nga ngbanga ti tɛrɛ mbi nvɛni ma. Ta mbi ndodu nga na siɔ dangɔ bɛ na ndo mbi nvɛni ma.

⁴ Ta sanga ma, mbi hũ ya, ta mbi na siɔ ye kɔi ma. Ko ta oko afa ya, mbi ndoli ye zu nzɔ̃ni ma. Kanda Gbia Nzapa gbanda la afa ngbanga tɛ mbi.

⁵ Nda mɛ ale ta ĩ pia ĩ fa ngbanga tɛ zo uzu ti bi mɛ ndo Nzapa ako ma la. Kanda ĩ ku Gbia Yezo, lo na diringɔ gangɔ. Ngoi mɛ gbanda lo ga ko, lo fa gbanda alo mɛ na olo ka ya mbingo yango. Lo si nga gbanda na dangɔ bɛ tɛ azi yango. Lo li gbanda so, wa Nzapa agonda zo kɔi kɔi, ko gondangɔ ni alengbi na kwa mɛ zo kɔi kɔi ali.

⁶ Aya bua, tɛnɛ mɛ fɛrɛ mbi tɛnɛ na ili mbi nvɛni, nga na ili Apolɔsɛ ko, adu nga ma nzɔ̃ lɛ lo la mbi fa na ĩ. Mbi ye fɛrɛ ya, na pangɔ nzɔ̃ lɛ lo tɛ e hɛ̃ ĩ ko, ĩ hĩnga ya, lo mɛ asu ka ya Buku tɛ Nzapa ko, ale ĩ tɔndɔ ni na seni. Ale ta ĩ yakɛ tɛrɛ ĩ na lo tɛ ambanga azi, ko ĩ samana na ala mɛ ndɛ̃ ma.

⁷ Ta sanga ma, ta zo kɔi akpã mɔ na ndo afɔ̃ mɔ ma. Aye zu mɛ mɔ na ni ko, Nzapa la ahɛ̃ mɔ! Wa nda mɛ mɔ ndogonda tɛrɛ mɔ na lo ti aye mɛ mɔ na ni ma bere ta lo la lo hɛ̃ mɔ ma nɛ?

⁸ Nda mɛ ĩ ndomu tɛrɛ ĩ ya, aye zu mɛ ĩ na gwɛ̃ ni ko, ĩ pia ĩ lua ni zu wɛ nɛ? Nda mɛ ĩ ndomu tɛrɛ ĩ ya, ĩ awa nwa nɛ? Ko nda mɛ nga ĩ ndomu tɛrɛ ĩ ya, ĩ ti agbia, wa ta e tɛ e agbia ma nɛ? Mbi separa ya, ĩ du bɛ agbia biani, wadila e du nga agbia ma ke!

⁹ Ta sanga ma, mbi da bɛ mbi ya, Nzapa akpã e awa pangɔ kwa tɛ lo na ndangba tɛ azi zu. E du nga ma azi mɛ afa ngbanga abi li la, la anɔ na la so kpɔngɔ la na gbɛlɛ azi zu. Ko azi zu na aangelo ndoba e.

¹⁰ E ndopa tɛnɛ tɛ Yezo Kristo, na lo ni ko, azi ndohũ e ka lɛ la nga ma e awa nyingɔ. Kanda tɛ ĩ ko, ĩ ndoda bɛ ĩ ya, ĩ awa ndara, na lo mɛ ya, ĩ na Kristo ĩ ti bo kɔi. Azi ndohũ e ka lɛ la nga ma e azi mɛ woni, kanda tɛ ĩ ko, ĩ ndoda bɛ ĩ ya, ĩ akpengba azi. Azi ndosamana na e. Tɛ ĩ ko, ala ndotɔndɔ ĩ.

¹¹ Ato ndo gã, aga ngbĩi asi nga na ngoi mɛ ko, gwɛ̃ tɛ na gwɛ̃ ngu ndogbɔ̃ e. Ta e na bɔngɔ ma, andosɔ̃ e, ta e na da tɛ e nvɛni dazu ma.

¹² E ndoli kwa na ti e kpengbani ya, e nvɛni e kã na tɛrɛ e. Ngoi mɛ se azi aguru e ko, e vɔrɔ Nzapa ya, lo sunu la. Ngoi mɛ se azi ahɛ̃ e pɛnɔ ko, e gbe bɛ e.

¹³ Ngoi mɛ se azi atɛnɛ siɔ tɛnɛ na ili e ko, e gbinya hɛ̃ la nzɔ̃ tɛnɛ. Na olo ko, azi adɛ amu e nga ma ambumbusɛ azi, ala dɛ nga amu e nga ma sã mɛ asa ka ndo goga.

¹⁴ Ta mbi su mbɛti olo hɛ̃ ĩ ya, mbi bi kamɛnɛ lɛ ĩ ma, kanda mbi su ni ya, mbi ha ĩ na ye, nga ma ĩ aya mbi ti kpɔ̃ bɛ mbi.

¹⁵ Ta sanga ma, bɛ se adu ya, awa hangɔ lo tɛ Yezo Kristo adu gbara gbara ka tɛ ĩ ko, to ĩ bo kɔi. Ko mbi Polo la mbi ti to ĩ, na lo mɛ ya, mbi ndo la mbi ha ĩ na Nzɔ̃ Pa kɔzoni, la ĩ ye lo tɛ Yezo Kristo.

¹⁶ Nda mɛ mbi gbɔ̃ gɛrɛ ĩ ya, ĩ mu nzɔ̃ lɛ lo tɛ mbi la.

¹⁷ Mbi ye ya, ĩ li so biani, nda mɛ mbi separa tongɔ Timɔte ka tɛ ĩ la. Lo nga ma nyi mbi ti kpɔ̃ bɛ mbi, ko ta lo ndoweza kwa tɛ Gbia Yezo ma. Lo na dangɔ bɛ ĩ fani mɛ ndɛ̃ na sé du tɛ mbi ti wa Kristo. Ye mɛ lo na hangɔ na ĩ ko, adu ye mɛ mbi ndoha na awa Eklezia zu mɛ ndodu na ndo kwɛ.

¹⁸ Ambanga azi na popo tɛ ĩ ndoyakɛ ndo tɛrɛ la, ta sanga ma, ala ndoda ndo be la ya, ta mbi na gangɔ fani mɛ ndɛ̃ so bangɔ ĩ ma.

¹⁹ Kanda se Gbia Nzapa aye ko, mbi na gangɔ ka tɛ ĩ bo lo mɛ. Wa na ngoi mɛ mbi si kai ko, ta mbi na mangɔ bo tɛnɛ tɛ awa yakɛ ni ko ma, kanda mbi na bangɔ nga ye mɛ ala lengbi ti lingɔ.

²⁰ Ta sanga ma, lo Lɛngɔ Gbia tɛ Nzapa adu lo ti nguru, kanda ta adu lo ti tɛnɛ ma.

²¹ Ye mɛ ĩ ye na popo ti atɛnɛ olo sɛ nɛ? Mbi ga na kende so sɔnɔngɔ na ĩ? Bere mbi ga na bɛ mɛ woni so fangɔ na ĩ ya, mbi ye ĩ?