1 Kɔrinto 3 - Fana Ngbangɔ 1987

Awa kwa tɛ Nzapa

¹ Aya bua, ngoi mɛ ndo mbi ka tɛ ĩ ko, ta mbi lengbi ndo ti tɛnɛngɔ tɛnɛ hɛ̃ ĩ nga ma se mɛ mbi ndotɛnɛ na tɛnɛ hɛ̃ azi mɛ na Tɔrɔ Santo tɛ Nzapa ma. Ngoi mɛ ndo mbi ndotɛnɛ na tɛnɛ hɛ̃ ĩ ko, mbi ndomu ndo ĩ nga ma azi mɛ ndokpã bɛ la na ndo alo ti lɛ sese. Mbi ndomu ndo nga ĩ nga ma azi mɛ aye lo tɛ Yezo Kristo fanani, ko ĩ du nga ma ayangambi.

² Mbi ha ndo ĩ bo na aye mɛ woni, kanda ta mbi ha ndo ĩ na aye mɛ kpengbani ma. Ĩ ndo nga ma apɛsɛ aya mɛ ndoã mɛ, ko ta andohɛ̃ la kpengba tɛ ya ala tɛ ma. Abɛ nga na olo ko, ta ĩ lengbi ti hĩngangɔ nda akpengba aye ni ma,

³ na lo mɛ ya, du tɛ ĩ ade nga ma du tɛ azi mɛ andokpã bɛ la na ndo alo ti lɛ sese. Nga ma la ĩ ndoli sɔbɛrɛ hɛ̃ afɔ̃ ĩ, ĩ ndopa nga pa na popo tɛ ĩ ko, afa ya, ĩ ndokpã bɛ ĩ na ndo alo ti lɛ sese, ko ĩ ndodu kwɛ kɔi nga ma azi ti lɛ sese!

⁴ Se ambanga azi na popo tɛ ĩ apa ya, ani azi tɛ mbi Polo, wa ambanga mɛ ndɛ̃ apa tɛ la ya, ani azi tɛ Apolɔsɛ ko, afa ya, ta ɔngbingɔ na popo tɛ ĩ na azi ti lɛ sese ma!

⁵ Apolɔsɛ lo na? Ko mbi Polo mbi nga na? E zu se bo awa kwa tɛ Nzapa. Nzapa ato e ya, e pa tɛnɛ tɛ ni hɛ̃ ĩ, ĩ ye lo tɛ Yezo Kristo na lo ti tɛnɛ tɛ e. Zo kɔi kɔi na popo tɛ e ndoli kwa mɛ ndo Gbia Nzapa ahɛ̃ lo ya lo li.

⁶ Adu nga ma mbi lu tɛ, Apolɔsɛ akĩ ngu ndo ni, la tɛ ni amai na nguru tɛ Nzapa.

⁷ Na lo ni ko, wa lungɔ tɛ na wa kĩngɔ ngu ndo tɛ adu azi gɛgɛrɛ. Kanda Nzapa la aɔ la zu, ta sanga ma, na lo nguru tɛ lo la tɛ amai.

⁸ Wa lungɔ tɛ na wa kĩngɔ ngu ndo tɛ, ala zu kwɛ kɔi. Ko Nzapa ahɛ̃ gbanda zo kɔi kɔi mbana gɛrɛ lo alengbi na kwa mɛ lo li.

⁹ Ta sanga ma, e zu se e ndoli kwa hɛ̃ Nzapa, ko ĩ tɛ ĩ nga ma yaka tɛ Nzapa. Ĩ nga ma da mɛ Nzapa awa.

¹⁰ Na lo ti nzɔ̃ bɛ mɛ Nzapa ali hɛ̃ mbi ko, mbi to ndo nda lingɔ kwa hɛ̃ Nzapa ka tɛ ĩ. Mbi li ndo kwa ni nga ma nzɔ̃ wa wangɔ da, ko mbi kpã ndo gu gɛrɛ da ni wɛ. Na olo ko, zo mɛ ndɛ̃ aga awa da na ndo gu gɛrɛ da ni. Kanda ale zo kɔi kɔi abata li lo nzɔ̃ni na se mɛ lo ndowa na da.

¹¹ Ta sanga ma, Nzapa akpã ndo Yezo nga ma gu gɛrɛ da wɛ, ko ta zo alengbi ti kpãngɔ gu gɛrɛ da mɛ ndɛ̃ ma.

¹² Na ndo gu gɛrɛ da ni ko, ambanga azi na mungɔ wɔrɔ, bere nwa, bere tɛ́nɛ ti kota ngere, wa ala wa na da dazu. Kanda ambanga mɛ ndɛ̃ na mungɔ tɛ la kɛkɛ, bere ngongo, bere pele, wa ala wa na da dazu.

¹³ Na ngoi mɛ gbanda Nzapa afa na ngbanga tɛ azi ko, kwa tɛ zo kɔi kɔi asi gbanda yango. Ta sanga ma, na lá ni ko gbanda ko, Nzapa atara gbanda kwa tɛ zo kɔi kɔi na wá, ko wá afa gbanda ya, kwa ni nzɔ̃ni, bere siɔni.

¹⁴ Se ta wá agbi gbanda da mɛ zo awa na ndo gu gɛrɛ da ni ma ko, zo ni alua mbana gɛrɛ lo.

¹⁵ Wa zo ko gbanda la da tɛ lo agbi ko, ta lo lua gbanda mbana gɛrɛ lo ma. Adu gbanda nga ma ale wá agbi lo, ko Nzapa aso lo nvɛni.

¹⁶ Ĩ hĩnga nzɔ̃ni ya, tɛrɛ ĩ adu nga ma da mɛ Nzapa ndodu da, ko Tɔrɔ Santo tɛ lo ndodu ka ya bɛ ĩ.

¹⁷ Wa se zo akara da mɛ Nzapa ndodu da ko, Nzapa nga na hongɔ zo ni ko. Ta sanga ma, da mɛ Nzapa ndodu da ko adu da mɛ santo, ko tɛrɛ ĩ adu nga ma da ni ko.

¹⁸ Ale ta bɛ zo kɔi ahanda lo nvɛni ma. Se mbanga zo na popo tɛ ĩ ada bɛ lo ya, ni na ndara mɛ azi ti lɛ sese na ni ko, ale lo mu tɛrɛ lo nga ma lo zo mɛ gɛgɛrɛ na gbɛlɛ azi, wadila lo ti bɛta wa ndara.

¹⁹ Ta sanga ma, ndara mɛ azi ti lɛ sese na ni ko, adu gɛgɛrɛ ka le Nzapa. Ti biani, asu ka ya Buku tɛ Nzapa ya: “Nzapa ndogbɔ̃ nda awa ndara na lo poroso tɛ la.”

²⁰ Asu nga ka ya Buku tɛ lo ya: “Gbia Nzapa ahĩnga ya, dangɔ bɛ tɛ awa ndara adu gɛgɛrɛ.”

²¹ Na lo ni ko, ale ta zo agonda tɛrɛ lo na lo ye mɛ afɔ̃ lo ndoli ma. Ta sanga ma, ye zu adu na lo tɛ ĩ.

²² Mbi Polo, na Apolɔsɛ, nga na Petro, e zu e du azi tɛ ĩ. Sese olo, na dungɔ lɛ ngɛ̃, nga na kpingɔ kwa adu zu tɛ ĩ. Aye ti ngoi olo, na aye mɛ na gangɔ adu nga kwɛ zu tɛ ĩ.

²³ Ĩ tɛ ĩ azi tɛ Yezo Kristo, Yezo Kristo tɛ lo zo tɛ Nzapa.