1 Kɔrinto 2 - Fana Ngbangɔ 1987

Polo apa lo tɛ Yezo Kristo mɛ ndo akpi ka ndo krusi

¹ Aya bua, mbi gwe ndo ka tɛ ĩ so pangɔ hɛ̃ ĩ bɛta lo tɛ Nzapa mɛ ndo ta azi ade ahĩnga ma. Na ngoi ko ndo ko, ta mbi pa ndo lo ni hɛ̃ ĩ na se kɔdɛ mɛ kpengbani, bere na se ndara tɛ azi ti lɛ sese ma.

² Ta sanga ma, uzu ti mbi gwengɔ ka tɛ ĩ ko, mbi pia ndo mbi hɛ̃ nyɔ mbi ya, se mbi si kai ko, ta mbi na pangɔ hɛ̃ ĩ tɛnɛ mɛ ndɛ̃ ma, kanda bo tɛnɛ tɛ Yezo Kristo mɛ ndo akpi ka ndo krusi la mbi na pangɔ hɛ̃ ĩ.

³ Ngoi mɛ ndo mbi ka tɛ ĩ ko, mbi wo ndo sĩ, mbɛtɔ ndogbɔ̃ ndo mbi, ko tɛrɛ mbi ndodɔ ndo nga za za za.

⁴ Tɛnɛ tɛ Nzapa mɛ ndo mbi tɛnɛ hɛ̃ ĩ ko, ta mbi kara ndo ĩ na tɛnɛ lɛkpɛ lɛkpɛ na se kɔdɛ tɛ azi ti lɛ sɛse ma. Kanda Tɔrɔ Santo tɛ Nzapa afa ndo na ĩ ya, mbi tɛnɛ ndo tɛnɛ ni na nguru tɛ Nzapa nvɛni, ko ĩ hĩnga ndo ya, tɛnɛ ni adu biani.

⁵ Nzapa ali ndo so ya, ta lo yengɔ lo tɛ Yezo Kristo mɛ ka bɛ ĩ alo na ndo ndara tɛ azi ti lɛ sese ma, kanda alo na ndo nguru tɛ ni Nzapa.

Ndara tɛ Nzapa

⁶ Abɛ nga sia ko, mbi ndoha nga bo ndara na awa Kristo mɛ lɛ la azi na lege tɛ Nzapa. Kanda ta ndara ni ko adu ndara tɛ azi ti lɛ sese, bere ndara tɛ akota azi mɛ ndole gbia ge lɛ sese ma, ala zu adu azi mɛ ndokpili.

⁷ Ndara mɛ mbi ndopa lo ni hɛ̃ ĩ ko, adu ndara tɛ Nzapa, ndara mɛ ta azi ahĩnga ma, ndara mɛ ndo Nzapa ahɔndɛ na azi uzu ti Nzapa lingɔ sese ko, lo pia ndo lo kpã ndara ni ko ya, e hĩnga, wa e lua nga ndima tɛ ni.

⁸ Ta akota azi ti lɛ sese olo ahĩnga ndo ndara ni ko ma. Se ala hĩnga ndo ni ko, ale ta ala hɛ̃ ndo nyɔ ya, agɔngɔ Gbia Yezo mɛ na ndima ka ndo krusi ma.

⁹ Ye mɛ Nzapa ali ko, adu nga ma se mɛ asu na ni ka ya Buku tɛ lo ya: “Ye mɛ ndo ta zo kɔi ahũ na lɛ lo bɛ gbɔ ma, Bere ama na ma lo bɛ gbɔ ma, Ye mɛ ndo nga ta zo kɔi ada bɛ lo na ni bɛ gbɔ ma ko, Nzapa alɛkɛ ndo ni hɛ̃ awa yengɔ lo.”

¹⁰ Kanda bo e la Nzapa afa e na ye ni ko na nguru tɛ Tɔrɔ Santo. Ta sanga ma, Tɔrɔ Santo ndobinga lo zu, abɛ nga lo mɛ Nzapa ahɔndɛ ka ya bɛ lo kílí kílí ko, Tɔrɔ Santo ahĩnga nga ni.

¹¹ Ge tɛ zo ko, bo tɔrɔ tɛrɛ lo la ndohĩnga alo zu mɛ ka ya bɛ lo. Se mɛ nga bo Tɔrɔ Santo tɛ Nzapa ndohĩnga na lo zu mɛ ka ya bɛ Nzapa la.

¹² Tɛ e Tɔrɔ mɛ e na ni ko, ta adu tɔrɔ mɛ azi ti lɛ sese na ni ma. Kanda Tɔrɔ mɛ e na ni alo ka tɛ Nzapa. Lo to ndo ni hɛ̃ e ya, e hĩnga na aye zu mɛ ndo lo hɛ̃ e na lo ti nzɔ̃ bɛ tɛ lo.

¹³ Ngoi mɛ e ndopa lo ti aye ni ko hɛ̃ azi ko, ta e ndopa ni na ndara mɛ azi ndoha ma, kanda e ndopa ni na ndara mɛ Tɔrɔ Santo tɛ Nzapa ndoha. Nda mɛ e ndotɔndɔ nda abɛta tɛnɛ tɛ Nzapa mɛ alo ka tɛ Tɔrɔ Santo hɛ̃ azi mɛ na Tɔrɔ Santo la.

¹⁴ Zo ko la ta lo na Tɔrɔ Santo tɛ Nzapa ya tɛrɛ lo ma ko, ta lo lengbi ti yengɔ beta lo mɛ alo ka tɛ Tɔrɔ Santo ma. Lo ndohũ bɛta lo ni ko ka lɛ lo nga ma tɛnɛ ti nyingɔ, ta sanga ma, bo azi mɛ na Tɔrɔ Santo ya tɛrɛ la alengbi ti hĩngangɔ nda bɛta lo ni ko.

¹⁵ Zo ko la na Tɔrɔ Santo tɛ Nzapa ya tɛrɛ lo ko, lo lengbi ti hĩngangɔ aye mɛ nzɔ̃ni na aye mɛ siɔni zu. Kanda azi mɛ ndɛ̃ mɛ ta ala na Tɔrɔ Santo tɛ Nzapa ma ko, ta ala lengbi ti dingɔ zo ni ko ma.

¹⁶ Nga ma se mɛ asu na ni ka ya Buku tɛ Nzapa ya: “Ta zo kɔi alengbi ti hĩngangɔ dangɔ bɛ tɛ Gbia Nzapa ma! Ta zo kɔi alengbi nga ti wangɔ lo ma!” Kanda e mɛ na Tɔrɔ Santo tɛ Nzapa ya tɛrɛ e ko, dangɔ bɛ tɛ e nga ma dangɔ bɛ tɛ Yezo Kristo.