1 Kɔrinto 16 - Fana Ngbangɔ 1987

Lo ti sɔrɔngɔ faranga zangɔ na awa Kristo mɛ ndɛ

¹ Adu lo sɔrɔngɔ faranga, zangɔ na azi ti Eklezia mɛ ka Yeruzalɛmɛ ko, ĩ li bo nga ma se ko ndo mbi pa na ni hɛ̃ azi ti Eklezia ti sese ti Galatia.

² Lá yenga kɔi kɔi ko, ale zo kɔi kɔi na popo tɛ ĩ ahã nyɔ faranga tɛ lo na se mɛ lo ndolua na ni, akpa katɛ, ko ta ĩ to nda sɔrɔngɔ faranga ni bo na ngoi mɛ gbanda mbi si kai ma.

³ Ngoi mɛ gbanda mbi si ka tɛ ĩ ko, ĩ hã azi, mbi su mbɛti mbi kpã ti la, wa ala bombi na faranga ni, anɔ na ni ka Yeruzalɛmɛ.

⁴ Se alengbi nga gbanda ya, mbi nɔ ka Yeruzalɛmɛ ko, mbi na la e nɔ ndoni kɔi.

Fɔnɔ mɛ Polo aye nɔngɔ

⁵ Mbi fangbi gbanda ti sese ti Masedoanɛ, wa mbi si ka tɛ ĩ.

⁶ Mbi da bɛ mbi ya, ngoi mɛ gbanda mbi si ka tɛ ĩ ko, mbi la gbanda kai bi gba. Bɛ na ngoi ti de zu ko, mbi na langɔ ka tɛ i, wadila bɛ ka wa ko, ĩ za mbi na nɔngɔ na ndo mɛ mbi na nɔngɔ da.

⁷ Ta sanga ma, ta mbi ye ya, se mbi si ka tɛ ĩ ko, mbi ɔ hiɔ ma. Mbi da bɛ mbi ya, se Gbia aye ko, mbi la ka tɛ ĩ bi gba.

⁸ Ko mbi separa ngbãngɔ ge kɔdɔrɔ ti Efɛzɛ, nga ka yenga ti Pantɛkotɛ ati hĩ wadila.

⁹ Ta sanga ma, bɛ se awa kɛ̃ngɔ mbi adu gba ge Efɛzɛ ko, mbi lua nzɔ̃ ngoi so lingɔ na kota kwa hɛ̃ Nzapa.

¹⁰ Se Timɔte asi kai ko, ĩ yamba lo nzɔ̃ni, wadila lo ma tɛrɛ lo nzɔ̃ni. Ta sanga ma, lo ndoli kwa tɛ Nzapa nga ma se tɛ mbi.

¹¹ Ale ta zo kɔi asamana na lo ma, kanda ale ĩ za lo, ya lo gwe fɔnɔ tɛ lo na bɛ pii, wadila lo diri ge tɛ mbi. Ta sanga ma, mbi na ambanga awa Kristo mɛ ndɛ̃ e ndoku lo.

¹² Wa adu tɛ nyita e Apolɔsɛ ko, mbi ndosa nguru bɛ lo ngoi zu ya, lo na ambanga awa Kristo mɛ ndɛ̃ anɔ ka tɛ ĩ, ko ta lo ye nɔngɔ na olo mɛ ma. Kanda se lo lua nzɔ̃ ngoi, wa lo ga.

Ndangba tɛnɛ tɛ Polo

¹³ Ale ĩ du na kpengba lɛ, ĩ ngbã na yengɔ lo tɛ Yezo, ĩ du na mimi bɛ, ĩ du kpengbani.

¹⁴ Ĩ ye afɔ̃ ĩ na ya akwa zu mɛ ĩ ndoli.

¹⁵ Ĩ hĩnga Stefanasi na nda se wa tɛ lo. Ĩ hĩnga ya, ala ndo la aye lo tɛ Yezo kɔzoni ka sese ti Grɛsɛ, ko ala hẽ ndo tɛrɛ la so lingɔ kwa hɛ̃ azi tɛ Nzapa. Aya bua, mbi gbɔ̃ gɛrɛ ĩ ya,

¹⁶ ĩ ma nyɔ gi tɛrɛ azi ko, ĩ ma nga nyɔ azi zu mɛ ndoli kwa ndoni kɔi na la.

¹⁷ Bɛ mbi ade sĩ na lo gangɔ tɛ Stefanasi, na tɛ Fortunatusi, nga na tɛ Akaikusi. Ngoi mɛ mbi hũ la ko, adu nga ma ĩ la mbi hũ ĩ.

¹⁸ Ala sa nguru bɛ mbi, nga ma se mɛ ndo nga ala sa na nguru bɛ ĩ nvɛni. Ale ĩ gonda gi tɛrɛ azi ko.

¹⁹ Azi ti Eklezia ti sese ti Azia abala ĩ. Ambanga azi mɛ ndɛ̃ mɛ abala ĩ sĩ nvɛni na ili Gbia Yezo la Akilasi, na ya lo Prisiyɛ, nga na azi ti Eklezia mɛ ndobombi tɛrɛ la ka tɛ Akilasi so vɔrɔngɔ Nzapa.

²⁰ Ayata e awa Kristo zu mɛ ge abala ĩ. Ĩ balangbi tɛrɛ ĩ nzɔ̃ni na se tɛ awa Kristo.

²¹ Na ndo olo ti balangɔ ko, mbi Polo la mbi su tɛnɛ ni na ti mbi nvɛni. Mbi bala ĩ.

²² Se ta zo aye Gbia Yezo ma ko, ale Nzapa azonga zo ni ko! Marana ta! Alengbi ya, Gbia tɛ e, ga hĩ!

²³ Gbia Yezo ali bɛ nzɔ̃ bɛ hɛ̃ ĩ ma ke!

²⁴ Mbi ndoye ĩ zu, na lo mɛ ya, e na Yezo Kristo e ti bo kɔi.