1 Kɔrinto 15 - Fana Ngbangɔ 1987

Yezo Kristo aso na pɛ kwá

¹ Aya bua, Nzɔ̃ Pa tɛ Yezo Kristo mɛ ndo mbi pa hɛ̃ ĩ, ĩ ye lo ni, ko ĩ kpa nga bɛ ĩ ndo ni ko, mbi separa dangɔ bɛ ĩ na ni na olo mɛ.

² Se ĩ kpã bɛ ĩ ndo ni bo nga ma se mɛ ndo mbi pa na ni hɛ̃ ĩ ko, Nzapa aso ĩ na lo ni. Ta so ma ko, oko afa ya, ĩ ye ndo lo ni gɛgɛrɛ.

³ Mbi ha ndo ĩ na ngbondo lo mɛ aɔ ndo alo zu, ko Yezo Kristo ndo la aha mbi na ngbondo lo ni ko. Ngbondo lo ni lo mɛ: Yezo Kristo akpi so hãngɔ siɔ ye tɛ e, nga ma se mɛ asu na ni ka ya Buku tɛ Nzapa.

⁴ Ahɔ lo, ĩ la so pɛni bi ta ko, lo so nga ma se mɛ asu na ni ka ya Buku tɛ Nzapa.

⁵ Ngoi mɛ lo ĩ so ko, lo fa tɛrɛ lo na Petro. So pɛni, lo fa tɛrɛ lo na awa pangɔ kwa tɛ lo sui kɔi ndoni sɛ.

⁶ Ngoi kɔi ko, lo fa tɛrɛ lo na ava lo mɛ aɔ ngbangbo kɔi. Na popo tɛ ava lo ni ko, ambanga akpili, kanda ambanga mɛ ndɛ̃ gba ade lɛ la ngɛ̃.

⁷ Lo fa nga tɛrɛ lo fani mɛ ndɛ̃ na Zaki. So pɛni, lo fa tɛrɛ lo na awa pangɔ kwa tɛ lo zu.

⁸ Na pɛ la zu, lo fa nga tɛrɛ lo na mbi mɛ mbi du nga ma nyi mɛ apia adú lo uzu ti ngoi tɛ lo lengbingɔ.

⁹ Mbi ndo ndangba tɛ awa pangɔ kwa tɛ Yezo zu. Ti biani ko, ta alengbi be ti ilingɔ mbi ya, mbi wa pangɔ kwa tɛ Yezo ma. Ta sanga ma, mbi hɛ̃ ndo pɛnɔ hɛ̃ azi ti Eklezia tɛ Nzapa.

¹⁰ Kanda na lo ti nzɔ̃ bɛ mɛ Nzapa ali hɛ̃ mbi, la mbi ti zo nga ma se mɛ ĩ ndohũ na mbi na olo, ko ta nzɔ̃ bɛ ni agwe gɛgɛrɛ ma. Ko mbi li ndo kwa mbi ɔ awa pangɔ kwa tɛ Yezo mɛ ndɛ̃ zu. Kanda ti biani ko, ta na lo nguru tɛ mbi nvɛni la mbi li ndo kwa ni ko ma, adu na lo nzɔ̃ bɛ mɛ Nzapa ali hɛ̃ mbi la mbi li ndo kwa ni ko.

¹¹ Na lo ni, se adu mbi la mbi pa Nzɔ̃ Pa ni hɛ̃ ĩ, bere azi mɛ ndɛ̃ mɛ awa pangɔ kwa tɛ Yezo la apa ni ko, ta oko na ló ma. E zu e pa bo Nzɔ̃ Pa, ko bo Nzɔ̃ Pa ni ko la ĩ ye lo ni.

Se mɛ gbanda e so na ni na pɛ kwá

¹² E ndopa hɛ̃ azi ya, Yezo Kristo aso ndo na pɛ kwá. Ko kɔdɛ mɛ ambanga azi na popo tɛ ĩ ti ndopa tɛ la ya, ta azi aso gbanda na pɛ kwá ma sia?

¹³ Se ta adu biani ya, azi aso gbanda na pɛ kwá ma ko, ale ta Yezo Kristo aso ndo nga na pɛ kwá ma.

¹⁴ Wa se ta adu ndo ya, Yezo Kristo aso nga na pɛ kwá ma ko, ale tɛnɛ tɛ lo mɛ e ndopa, nga na lo tɛ lo mɛ ĩ ye adu gɛgɛrɛ.

¹⁵ Ko oko afa ya, e ndopa nvɛnɛ na ili Nzapa, ta sanga ma, e pa ndo ya, lo so Yezo Kristo na pɛ kwá. Wa se ta azi mɛ akpili aso gbanda na pɛ kwá ma ko, ale ta Nzapa aso ndo nga Yezo Kristo na pɛ kwá ma.

¹⁶ Ta sanga ma, se ta azi mɛ akpili aso gbanda na pɛ kwá ma ko, ale ta Yezo Kristo aso ndo nga na pɛ kwá ma.

¹⁷ Se ta adu ndo ya, Yezo Kristo aso ndo na pɛ kwá ma ko, ale lo yengɔ tɛ ĩ adu gɛgɛrɛ, ko ale asiɔ ye tɛ ĩ ade nga bo na li ĩ kpɔ.

¹⁸ Oko afa nga ya, azi ko ndo aye lo tɛ Yezo Kristo, la ala kpili ko, ta Nzapa aso gbanda la ma.

¹⁹ Se e lɛndɛrɛ ya, Yezo Kristo aza e bo na ya du tɛ e ti lɛ sese ko, vundu mɛ azi na mangɔ hɛ̃ e na ɔngɔ ndo vundu mɛ ala ndoma hɛ̃ azi mɛ ndɛ̃ zu.

²⁰ Ti biani ko, Yezo aso ndo na pɛ kwá. Lo so ndo kɔzoni so fangɔ ya, azi mɛ akpili aso nga gbanda na pɛ kwá.

²¹ Ta sanga ma, nga ma se mɛ ndo kwá asi ge lɛ sese ti ndo mbanga zo kɔi ko, se mɛ nga lege ti songɔ na pɛ kwá azi ti ndo mbanga zo kɔi la.

²² Nga ma se mɛ azi zu ndokpili, na lo mɛ ya, ala du atara Adamu ko, se mɛ nga gbanda azi zu mɛ aye lo tɛ Yezo Kristo aso na ni na pɛ kwá na lo tɛ lo la.

²³ Kanda zo kɔi kɔi aso gbanda na ngoi tɛ lo: Yezo Kristo aso ndo na pɛ kwá uzu tɛ azi zu, so pɛni, ngoi mɛ gbanda lo diri lo ga ko, azi tɛ lo aso nga gbanda na pɛ kwá.

²⁴ Na ngoi ko gbanda ko, Yezo Kristo agbe gbanda uzu nguru tɛ asiɔ tɔrɔ zu mɛ ndole gbia ka lɛ ndozu, wadila sese awe. Ko lo diri gbanda na lo Lɛngɔ Gbia hɛ̃ To lo Nzapa.

²⁵ Ta sanga ma, ale Yezo Kristo ale gbia ngbĩi nga ka gbanda Nzapa anwɔ awa kɛ̃ngɔ Yezo zu, akpã la na gbe gɛrɛ Yezo.

²⁶ Wa kɛ̃ngɔ Yezo mɛ gbanda Nzapa anwɔ lo na nda ni gbɔ la: kwá.

²⁷ Asu ka ya Buku tɛ Nzapa ya: “Nzapa akpã ye zu na gbe gɛrɛ Yezo.” Kanda na ya tɛnɛ olo ko, adu yango ya, Nzapa mɛ akpã ye zu na gbe gɛrɛ Yezo ko, ta lo nvɛni nga na gbe gɛrɛ Yezo ma. Ta sanga ma, lo la lo kpã ye zu na gbe gɛrɛ Yezo.

²⁸ Ngoi mɛ gbanda Nzapa akpã ye zu na gbe gɛrɛ Nyi lo Yezo, wa Yezo nvɛni abi tɛrɛ lo hɛ̃ To lo Nzapa mɛ akpã ye zu na gbe gɛrɛ lo. Wa se mɛ gbanda Nzapa ale gbia na seni na ndo azi zu nga na ndo aye zu la.

²⁹ Ĩ da bɛ ĩ na azi mɛ ndomu batisimɔ na se lɛ awa kwáni hĩ: nda mɛ ala ndomu batisimɔ nɛ? Se ta adu biani ya, azi mɛ akpili aso gbanda na pɛ kwá ma ko, batisimɔ mɛ azi ndomu na se lɛ la adu gɛgɛrɛ!

³⁰ Ko nda mɛ ngoi zu e nvɛni e ndodɔ nɔ na ya kwá nɛ?

³¹ Aya bua, lá kɔi kɔi ko, kwá ndolu mbi. Mbi pa ni hɛ̃ ĩ, na lo mɛ ya, mbi ndogonda tɛrɛ mbi na lo tɛ ĩ, ta sanga ma, e na ĩ na Gbia tɛ e Yezo Kristo e ti bo kɔi.

³² Adu ndo nga ma mbi tiri to ge kɔdɔrɔ ti Efɛzɛ na asa ti ya ndo. Wa se adu ya, dangɔ bɛ tɛ mbi adu bo nga ma se tɛ azi ti lɛ sese ko, ale ye mɛ to ni ahɛ̃ mbi nɛ? Se ta adu ya azi mɛ akpili aso gbanda na pɛ kwá ma ko, ale matɔ olo adu biani: “E tɛ, é nyɔ, ta sanga ma, e kpili ndã.”

³³ Ta zo ahanda ĩ ma, ĩ hĩnga ya: “Siɔ le kɛkɛ ndogbɛ̃ nzɔ̃ le kɛkɛ.”

³⁴ Ale ĩ li ya kɔdɛ tɛ ĩ adiri, ati na seni, ko ĩ zia lingɔ siɔ ye. Ta ambanga azi na popo tɛ ĩ ahĩnga Nzapa ma, ko mbi tɛnɛ so, so bingɔ kamɛnɛ lɛ ĩ.

Se tɛrɛ mɛ gbanda azi aso na ni na pɛ kwá

³⁵ Bere se zo ahũnda ya: “Azi mɛ akpili wɛ ko, kɔde mɛ gbanda ala so na ni na pɛ kwá sia? Tɛrɛ la adu gbanda nga sia?”

³⁶ Mɔ zo ko la mɔ hũnda ndo so ko, afa ya, nyingɔ ya li mɔ! Ngoi mɛ se mɔ lu le tɛ ko, ale le tɛ ni azɔ̃, wadila ako.

³⁷ Le tɛ mɛ mɔ lu, se adu le nzo, bere le tɛ mɛ ndɛ̃ ko, adu bo le tɛ gɛgɛrɛ la mɔ lu, kanda ta ngbonga tɛrɛ ni mɛ na kongɔ la mɔ lu ma.

³⁸ Nzapa ahɛ̃ ngbonga tɛrɛ hɛ̃ le tɛ ni nga ma se mɛ bɛ lo aye. Lo ndohɛ̃ ngbonga tɛrɛ ndɛ̃ ndɛ̃ ndɛ̃ hɛ̃ le tɛ kɔi kɔi.

³⁹ Ta mi tɛrɛ ndodu kwɛ kɔi ma: mi tɛrɛ azi ndodu ndɛ̃, tɛ asa ndɛ̃, tɛ ahũ ndɛ̃, tɛ asusu nga ndɛ̃.

⁴⁰ Aye ndodu ka yayu, aye ndodu nga ge lɛ sese, wa ta dɛ̃ngɔ ti aye ti yayu na dɛ̃ngɔ ti aye ti lɛ sese ndodu kwɛ kɔi ma.

⁴¹ Dɛ̃ngɔ tɛ lá ndɛ̃, tɛ nzɛ̃ ndɛ̃, tɛ atongolo nga ndɛ̃. Bɛ ka popo tɛ atongolo nvɛni ko, dɛ̃ngɔ tɛ la nga ndɛ̃ ndɛ̃ ndɛ̃.

⁴² Se tɛ azi mɛ akpili, ko ala so nga gbanda na pɛ kwá la. Ngoi mɛ ahɔ kinda ko, kinda ni azɔ̃. Wa ngoi mɛ gbanda zo ni aso ko, tɛrɛ lo angbã gbanda kaka.

⁴³ Ngoi mɛ ahɔ kinda ko, kinda ni asĩ, awo nga lɛkpɛ lɛkpɛ. Wa ngoi mɛ gbanda zo ni aso ko, tɛrɛ lo adɛ̃, akpengba nga.

⁴⁴ Ngoi mɛ ahɔ kinda ko, kinda ni adu bo tɛrɛ ti lɛ sese. Wa ngoi mɛ gbanda zo ni ko aso ko, Tɔrɔ Santo ahɛ̃ lo tɛrɛ mɛ ndɛ̃. Nga ma la e na tɛrɛ ti lɛ sese ko, e lua nga gbanda tɛrɛ mɛ Tɔrɔ Santo na hɛ̃ngɔ e.

⁴⁵ Asu ka ya Buku tɛ Nzapa ya: “Adamu mɛ ndo kɔzo zo ko, Nzapa ahɛ̃ ndo lo lɛ ngɛ̃,” kanda Yezo Kristo mɛ mbi ndoili lo ya, ndangba Adamu ko, lo Tɔrɔ tɛ Nzapa mɛ ndohɛ̃ azi bɛta du.

⁴⁶ Ta azi ndolua tɛrɛ mɛ Tɔrɔ Santo ndohɛ̃ zo uzu ma, ala ndolua tɛrɛ ti lɛ sese uzu, wa so pɛni, ala lua tɛrɛ mɛ Tɔrɔ Santo ndohɛ̃ zo.

⁴⁷ Nzapa amu ndo sese la ali na kɔzo Adamu. Adamu ndo zo ti lɛ sese. Kanda Adamu ti sɛ alo ndo ka yayu la aga.

⁴⁸ Azi ti lɛ sese akpa zo mɛ ndo Nzapa amu sese la ali na lo. Azi ti yayu akpa tɛ la zo mɛ ndo alo ka yayu la aga.

⁴⁹ Se mɛ e kpa zo mɛ ndo Nzapa amu sese la ali na lo ko, se mɛ nga gbanda e kpa na zo mɛ ndo alo ka yayu aga la.

⁵⁰ Aya bua, ĩ ma tɛnɛ mɛ mbi separa pangɔ hɛ̃ ĩ lo mɛ: ta zo alengbi ti singɔ ka Kɔdɔrɔ Gbia tɛ Nzapa na ngbonga tɛrɛ lo ma, ko ta tɛrɛ zo mɛ ndozɔ̃ alengbi nga ti luangɔ du ti kaka ma.

⁵¹ Mbi na pangɔ hɛ̃ ĩ lo mɛ Nzapa ahɔndɛ na azi. Lo ni lo mɛ: ta e kpili gbanda zu ma, kanda tɛrɛ e agbinyangbi gbanda zu

⁵² bo ngoi kɔi, na ngoi mɛ gbanda mbana avũ ti ndangbani. Ta sanga ma, ngoi mɛ gbanda mbana ni avũ ko, azi mɛ ndo akpili aso gbanda, ko ala du gbanda na tɛrɛ mɛ ta ndokpi ma. E mɛ gbanda e ngbã lɛ e ngɛ̃ na ngoi ni ko, tɛrɛ e agbinyangbi gbanda.

⁵³ Ta sanga ma, tɛrɛ e mɛ ndokpi, ko azɔ̃ ko, ati gbanda tɛrɛ mɛ ta ndokpi, ko azɔ̃ ma.

⁵⁴ Wa ngoi mɛ gbanda tɛrɛ e mɛ ndokpi, ko azɔ̃, ta ti akpi ko azɔ̃ ma, wadila tɛnɛ ti ya Buku tɛ Nzapa ati na Seni. Tɛnɛ ni lo mɛ: “Nzapa anwɔ kwá, ko ta kwa ti dɛ ma!”

⁵⁵ “Ee kwá, nguru tɛ mɔ wa? Ee kwá, nguru tɛ mɔ ti hɛ̃ngɔ azi pɛnɔ wa? Ta nguru ni ti dɛ ma!”

⁵⁶ Kwá ndodu na nguru ti hɛ̃ngɔ azi pɛnɔ, na lo siɔ ye tɛ la, ko ndia la ndofa e na siɔ ye.

⁵⁷ Wa é gonda Nzapa na lo ko la lo ndohɛ̃ e nguru ya, e nwɔ na kwa, na lo ye ko la Gbia tɛ e Yezo Kristo ali tɛrɛ e.

⁵⁸ Aya bua ti kpɔ̃ bɛ mbi, na lo ni ko, ĩ du na nguru, ko ta ĩ diri gesi ma. Ĩ li kwa tɛ Gbia na gonvɛnɛ aɔ ti uzu, ta sanga ma, ĩ hĩnga ya, kwa mɛ ĩ ndoli hɛ̃ Gbia Yezo Kristo ko, ta kwa ni ati gbanda gɛgɛrɛ ma.