1 Kɔrinto 14 - Fana Ngbangɔ 1987

Mbanga tɛnɛ ti nguru kwa mɛ Tɔrɔ Santo ndohɛ̃ azi

¹ Ale ĩ li kpengbani, í ye afɔ̃ ĩ, ko í separa nga luangɔ nguru kwa mɛ Tɔrɔ Santo ndohɛ̃ azi. Ale ĩ separa mai ya, ĩ lua nguru ti pangɔ nyɔ Nzapa.

² Zo ko la atɛnɛ yanga mɛ ta lo hĩnga ma ko, adu ya, ta lo tɛnɛ ni hɛ̃ azi ma, kanda lo tɛnɛ ni hɛ̃ Nzapa, ta sanga ma, ta zo kɔi ahĩnga nda tɛnɛ mɛ lo tɛnɛ ma. Na lo nguru tɛ Tɔrɔ Santo la lo pa bɛta lo tɛ Nzapa mɛ ta azi ahĩnga ma.

³ Wa zo ko la apa nyɔ Nzapa na yanga kɔdɔrɔ tɛ lo ko, adu ya, lo pa ni hɛ̃ azi ya, ala ma, wa ala mai na ya lo yengɔ tɛ la. Lo pa nga ni ya, ni sa nguru bɛ la, ko ni zu nga na bɛ la.

⁴ Zo ko la atɛnɛ yanga mɛ ta lo hĩnga ma ko, lo ndokpengba bo na lo yengɔ tɛ lo nvɛni, wa zo ko la apa nyɔ Nzapa ko, lo ndokpengba tɛ lo na lo yengɔ tɛ azi ti Eklezia zu.

⁵ Mbi separa ya ĩ zu ĩ tɛnɛ yanga mɛ ta ĩ hĩnga ma, kanda mbi separa sĩ ya, ĩ pa nyɔ Nzapa. Ta sanga ma, zo ko la atɛnɛ yanga mɛ ta lo hĩnga ma ko, ale zo mɛ ndɛ̃ atɔndɔ nda ni na yanga kɔdɔrɔ tɛ lo, wadila azi tɛ Nzapa zu amai na ya lo yengɔ tɛ la. Ta so ma ko, wa pangɔ nyɔ Nzapa aɔ wa tɛnɛngɔ yanga mɛ ta lo hĩnga ma.

⁶ Aya bua, ngoi mɛ se mbi ga ka tɛ ĩ, ko se mbi pa hɛ̃ ĩ atɛnɛ na yanga mɛ ta ĩ hĩnga ma ko, afa ya, ta mbi za ĩ ma. Wa se mbi pa hɛ̃ ĩ tɛnɛ mɛ Nzapa afa na mbi, bere mbi pa hɛ̃ ĩ ambanga alo, ya ĩ hĩnga ni, bere mbi pa nyɔ Nzapa hɛ̃ ĩ, bere mbi ha ĩ na alo tɛ lo ko, oko afa ya, mbi za ĩ la.

⁷ E mu ye nga ma ngoli na kundi: se mɔ ulu ngoli yenge yenge, mɔ de nga kundi yenge yenge ko, ta zo na hĩngangɔ bia mɛ mɔ ndoye na ngoli, bere mɔ ndode na kundi ma.

⁸ Ko se ta wa dɛngɔ mbana ti to ade nga mbana tɛ lo na seni ma ko, ta turugu kɔi alengbi ti lɛkɛngɔ tɛrɛ lo ya ni gwe to ma!

⁹ Se mɛ nga se ĩ tɛnɛ tɛnɛ hɛ̃ azi na yanga mɛ ta ĩ hĩnga ma ko, ta kɔdɛ mɛ ya, ala hĩnga na tɛnɛ mɛ ĩ separa tɛnɛngɔ da ma la. Ko oko afa ya, tɛnɛ tɛ ĩ aya bo na yá.

¹⁰ Na le sese olo ko, yanga da gba, ko nda yanga ni kɔi kɔi nga da.

¹¹ Wa se ta mbi hĩnga yanga mɛ zo atɛnɛ na tɛnɛ hɛ̃ mbi ma ko, mbi na hũngɔ wa tɛnɛngɔ yanga ni nga ma wa ndɛ̃, ko lo nga na hũngɔ mbi nga ma wa ndɛ̃.

¹² Wa nga ma la ĩ ndosepara sĩ ya, ĩ lua nguru kwa mɛ Tɔrɔ Santo ndohɛ̃ azi ko, ĩ gi mai bo nguru kwa mɛ ndoza azi tɛ Nzapa, ya ala mai na ya lo yengɔ tɛ la.

¹³ Wa ale zo ko la apa tɛnɛ na yanga mɛ ta lo hĩnga ma ahũnda Nzapa, wadila Tɔrɔ Santo ahɛ̃ lo nguru ti tɔndɔngɔ na nda tɛnɛ ni.

¹⁴ Se mbi vɔrɔ Nzapa na yanga mɛ ta mbi hĩnga ma ko, ti biani, tɔrɔ tɛrɛ mbi avɔrɔ nga lo, kanda ta kɔdɛ tɛ mbi avɔrɔ lo ma, na lo mɛ ya, ta mbi ma nda tɛnɛ ni ma.

¹⁵ Wa ye mɛ mbi lengbi ti lingɔ nɛ? Tɔrɔ tɛrɛ mbi na vɔrɔngɔ Nzapa na yanga mɛ ta mbi hĩnga ma, ko kɔdɛ tɛ mbi nga na vɔrɔngɔ lo na yanga kɔdɔrɔ tɛ mbi, wadila mbi ma nda ni. Mbi na yengɔ bia Nzapa na yanga mɛ ta mbi hĩnga ma, mbi nga na yengɔ ni na yanga kɔdɔrɔ tɛ mbi.

¹⁶ Se mɔ hɛ̃ sia kɔli hɛ̃ Nzapa bo na yanga mɛ ta mɔ hĩnga ma ko, kɔdɛ mɛ zo mɛ ndɛ̃ mɛ ta ahĩnga yanga ni ma alengbi ti gbinyangɔ ya: “Seni la” sia? Ta lo lengbi ti gbinyangɔ ni ma, na lo mɛ ya, ta lo hĩnga tɛnɛ mɛ mɔ tɛnɛ ma!

¹⁷ Bɛ se sia kɔli mɛ mɔ hɛ̃ Nzapa adu nzɔ̃ni buai ko, ta fɔ̃ mɔ alengbi ti maingɔ na ya lo yengɔ tɛ lo na lo ni ma.

¹⁸ Mbi ndopa tɛnɛ na yanga mɛ ta mbi hĩnga ma, mbi ɔ ĩ zu, ko mbi ndohɛ̃ sia kɔli hɛ̃ Nzapa na lo ni.

¹⁹ Wa se azi ti Eklezia abombi tɛrɛ la ko, mbi ndosepara sĩ ya, ti hangɔ la na tɛnɛ tɛ Nzapa ko, mbi tɛnɛ bo le tɛnɛ okɔ̃ mɛ ala lengbi ti mangɔ nda ni, na se le tɛnɛngɔ tɛnɛ hɛ̃ la gbara gbara na yanga mɛ ta ala hĩnga ma.

²⁰ Aya bua, ta ĩ binga bɛ ĩ nga ma se tɛ ayangambi ma, kanda ale ĩ binga bɛ ĩ nga ma se tɛ akangba. Wa adu ti lingɔ siɔ ye ko, ĩ du nga ma se tɛ ayangambi mɛ ta ahĩnga siɔ ye ma.

²¹ Asu ka ya Buku tɛ Nzapa ya: “Mbi Nzapa, mbi to gbanda azi mɛ ndotɛnɛ yanga mɛ ndɛ̃ ya, Ala pa tɛnɛ tɛ mbi hɛ̃ azi tɛ mbi na yanga mɛ ndɛ̃. Bɛ se mbi li gbanda so ko, ta azi tɛ mbi ama gbanda mbi ma.”

²² Na lo ni ko, nguru ti pangɔ tɛnɛ na yanga mɛ ta zo ahĩnga ma ndofa ló na apaganɔ, ko ta nguru ni ndofa ló na awa Kristo ma. Kanda nguru ti pangɔ nyɔ Nzapa ndofa ló na awa Kristo, ko ta nguru ni ndofa ló na apaganɔ ma.

²³ E mu nga ma ya, azi ti Eklezia zu abombi tɛrɛ la ndoni kɔi, ko ala zu so ndotɛnɛ tɛnɛ na yanga mɛ ta ala hĩnga ma. Wa se agɛgɛrɛ azi, bere apaganɔ aga so ndo ko ko, ala na pangɔ ya, azi ti Eklezia ko adu awa nyingɔ!

²⁴ Ko se azi ti Eklezia ni zu apa nyɔ Nzapa, wa se paganɔ, bere gɛgɛrɛ zo asi ko, lo na yengɔ lo siɔ ye tɛ lo na lo ti tɛnɛ mɛ lo ma na nyɔ la. Tɛnɛ zu mɛ lo ma na fangɔ ngbanga tɛ lo,

²⁵ ko dangɔ bɛ tɛ lo mɛ ahɔndɛ tɛrɛ lo ka ya bɛ lo na singɔ yango ngbɛ̃. Lo na tolongɔ lɛ lo tise, ko lo na vɔrɔngɔ Nzapa ya: “Biani, Nzapa na popo tɛ ĩ!”

Ĩ li ye ka ya da Nzapa na seni

²⁶ Aya bua, mbi na kɔngɔ nda tɛnɛ ni nga sia? Ngoi mɛ ĩ ndobombi tɛrɛ ĩ so vɔrɔngɔ Nzapa ko, mbanga zo na popo tɛ ĩ na bia ti yengɔ, omɛ ndɛ̃ na lo ti hangɔ, omɛ ndɛ̃ na tɛnɛ mɛ Nzapa afa na lo ya lo tɛnɛ, omɛ ndɛ̃ na tɛnɛ ti pangɔ na yanga mɛ ta lo hĩnga ma, ko omɛ ndɛ̃ nga na tɔndɔngɔ nda tɛnɛ ni. Aye olo zu ndoza azi ti Eklezia ya, ala mai na ya lo yengɔ tɛ la.

²⁷ Se awa pangɔ tɛnɛ na yanga mɛ ta ala hĩnga ma, adu na popo tɛ ĩ ko, ale ala du sɛ, bere ta, wa ala pa tɛnɛ ni, ko ale zo kɔi kɔi apa tɛnɛ ni na ngoi tɛ lo, wa zo mɛ ndɛ̃ atɔndɔ nda tɛnɛ mɛ ala pa.

²⁸ Wa se ta zo ti tɔndɔngɔ nda tɛnɛ ni adu da ma ko, ale ta ala pa tɛnɛ ni na kɔngɔ ka ya da Nzapa ma. Ale zo kɔi kɔi apa tɛnɛ ni bo hɛ̃ tɛrɛ lo nvɛni, ko lo pa nga ni hɛ̃ Nzapa.

²⁹ Ko tɛ awa pangɔ nyɔ Nzapa ko, ale azi sɛ bere ta apa tɛnɛ, wa afɔ̃ la mɛ ndɛ̃ aba bere tɛnɛ ni adu biani.

³⁰ So popo tɛ ĩ, se Nzapa afa mbanga zo na tɛnɛ ya lo pa ko, ale zo mɛ ndɛ̃ mɛ so ndopa tɛnɛ akai, wadila zo mɛ Nzapa afa lo na tɛnɛ ya lo pa, apa tɛnɛ ni.

³¹ Ĩ zu ĩ lengbi ti pangɔ nyɔ Nzapa, ko ale zo kɔi kɔi apa ni na ngoi tɛ lo, wadila azi zu ahĩnga ni, alua nga nguru.

³² Zo ko la na nguru ti pangɔ nyɔ Nzapa ko, ale lo du nga gbia ti ndo nguru ni,

^33-34 na lo mɛ ya, ta Nzapa aye ya, e du awa lingɔ ye yenge yenge ma, kanda lo ye ya, e li ye na bɛ pii. Na ngoi mɛ ĩ awa Kristo ĩ ndobombi tɛrɛ ĩ ko, ale awe adunga minyɔ, nga ma se mɛ awe ti Eklezia zu ndoli na ni. Ale ta ala tɛnɛ tɛnɛ na ngoi mɛ ĩ bombi na tɛrɛ ĩ ma. Kanda ale ala bi tɛrɛ la hɛ̃ akɔ la, nga ma se mɛ ndia tɛ Nzapa apa na ni.

³⁵ Se awe asepara hĩngangɔ ndo ko, ale ala hũnda akɔ la ka ya da tɛ la nvɛni. Ta sanga ma, ta adu nzɔ̃ni ya, wali atɛnɛ tɛnɛ na ngoi mɛ awa Kristo ndobombi na tɛrɛ la ma.

³⁶ Ĩ ndoda bɛ ĩ ya, tɛnɛ tɛ Nzapa ato nda ni ka tɛ ĩ? Bere ĩ ndoda nga bɛ ĩ ya, bo ĩ kɔi la ĩ ma ndo tɛnɛ ni?

³⁷ Se zo ada bɛ lo ya, ni wa pangɔ nyɔ Nzapa, bere ni na mbanga nguru kwa mɛ Tɔrɔ Santo ndohɛ̃ azi ko, ale zo ni ko ahĩnga ya, tɛnɛ mɛ mbi su hɛ̃ ĩ ko, adu nyɔ mɛ Gbia ahɛ̃.

³⁸ Wa se ta lo hĩnga ni ma ko, ale ta ĩ ma nga lo ma.

³⁹ Aya bua, na lo ni ko, ale ĩ separa sĩ ya, ĩ lua nguru ti pangɔ nyɔ Nzapa. Wa tɛ azi ko ndopa tɛnɛ na yanga mɛ ta ala hĩnga ma ko, ta ĩ gbanzi la ma.

⁴⁰ Kanda ale ĩ li ye zu na se mɛ alengbi, ko ta ĩ li nga ye yenge yenge ma.