1 Kɔrinto 13 - Fana Ngbangɔ 1987

Ale e ndoye afɔ̃ e

¹ Bɛ se mbi hĩnga tɛnɛngɔ yanga zu mɛ azi ti lɛ sese ndotɛnɛ, nga na yanga mɛ aangelo ndotɛnɛ, wa se ta mbi ye afɔ̃ mbi ma ko, mbi nga ma ngɔ̃ mɛ ndovũ dú dú dú, bere mbi nga ma ngbonga ti nwa mɛ ndokpale ngbaoo ngbaoo ngbaoo!

² Bɛ se mbi du na nguru kwa ti pangɔ nyɔ Nzapa, bɛ se mbi hĩnga ye zu, bɛ se mbi hĩnga lo zu mɛ Nzapa ahɔndɛ, wa se ta mbi ye afɔ̃ mbi ma ko, mbi du bo zo gɛgɛrɛ. Bɛ se mbi ye lo tɛ Nzapa sĩ na se kɔdɛ mɛ mbi lengbi ti pangɔ hɛ̃ hɔtɔ ya: “Hã mɔ ɔ,” ko lo ɔ, wa se ta mbi ye afɔ̃ mbi ma ko, mbi du bo zo gɛgɛrɛ.

³ Bɛ se mbi mu aye tɛ mbi zu, mbi kangbi na awa yɛlɛ, bɛ se mbi ka nga tɛrɛ mbi ya, azɔ mbi na lo ti lo yengɔ tɛ mbi, wa se ta mbi ye afɔ̃ mbi ma ko, oko adu bo kwa gɛgɛrɛ.

⁴ Zo ko ndoye afɔ̃ lo ko, lo ndoli anzɔ̃ ye hɛ̃ Ĩa, ta lo ndodu na gwɛ̃ ye tɛ la ma, lo ndodu na yɔngɔrɔ bɛ, ta lo ndogonda tɛrɛ lo ma, ta lo ndoyakɛ nga tɛrɛ lo ma.

⁵ Zo ko ndoye afɔ̃ lo ko, ta lo lengbi ti lingɔ ye ti kamɛnɛ tɛrɛ afɔ̃ lo ma, ta lo ndogi bo ye mɛ nzɔ̃ni na lo tɛ lo nvɛni ma, ta lo ndoli ngɔnzɔ hiɔ hiɔ ma, ta lo ndokpã nga afɔ̃ lo ya lo ma.

⁶ Zo ko ndoye afɔ̃ lo ko, ta lo ndosaba na ngoi mɛ se ala li siɔ ye ma, kanda lo ndosaba na ngoi mɛ se ala li ye na seni.

⁷ Zo ko ndoye afɔ̃ lo ko, lo ndogbe bɛ lo na lo ti siɔ ye zu mɛ ala ndoli tɛrɛ lo, lo ndoye lo tɛ la ngoi zu, lo ndolɛndɛrɛ ya, ala li ye mɛ nzɔ̃ni, lo ndodu nga na yɔngɔrɔ bɛ na ndo la.

⁸ Yengbingɔ adu ye mɛ ndongbã kaka buai. Lo ti pangɔ nyɔ Nzapa awe gbanda. Lo ti tɛnɛngɔ tɛnɛ na yanga mɛ ta e hĩnga nda ni ma awe gbanda. Kɔdɛ ti hĩngangɔ na ye awe nga gbanda.

⁹ Ta sanga ma, ta e hĩnga ye zu ma, ta e ndopa nga nyɔ Nzapa zu na seni ma.

¹⁰ Kanda ngoi mɛ gbanda Nzapa afa e na bɛta nzɔ̃ lo hĩ, wa se mɛ nga gbanda nyi ye mɛ e hĩnga na olo mɛ awe la.

¹¹ Ngoi mɛ ndo mbi dɛ nyifɔ̃ ko, tɛnɛngɔ tɛnɛ tɛ mbi, na dangɔ bɛ tɛ mbi, nga na bingangɔ bɛ tɛ mbi ndo nga ma se tɛ nyifɔ̃. Wa na ngoi mɛ mbi ti zo we ko, mbi zia aye zu mɛ ayafɔ̃ ndoli.

¹² Na olo ko, e ndohũ aye so yiini nga ma nyingɔ tɛrɛ zo mɛ asi ka lɛ tala tala. Wa na lá kɔi gbanda ko, e hũ gbanda ye zu yango. Na olo ko, ta mbi hĩnga ye zu ma, wa na lá kɔi gbanda ko, mbi hĩnga gbanda ye zu nga ma se mɛ Nzapa ahĩnga na mbi.

¹³ Na olo ko, ye ota mɛ na ngbãngɔ kaka lo mɛ: yengɔ lo tɛ Nzapa, lɛndɛrɛngɔ lo, nga na yengbingɔ. Wa na popo ti aye olo ota ko, ye mɛ aɔ afɔ̃ lo zu la: yengbingɔ.