1 Kɔrinto 12 - Fana Ngbangɔ 1987

Nguru kwa mɛ Tɔrɔ Santo ndohɛ̃ azi

¹ Aya bua, na olo ko, mbi na kambisangɔ hɛ̃ ĩ lo ti nguru kwa mɛ Tɔrɔ Santo ndohɛ̃ azi. Ko mbi separa ya, ĩ hĩnga ni nzɔ̃ni.

² Ĩ hĩnga ya, ngoi mɛ ndo ĩ dɛ apaganɔ ko, ĩ ndohɛ̃ ndo tɛrɛ ĩ so vɔrɔngɔ angbilondo mɛ ta ndotɛnɛ tɛnɛ ma, ko ta ĩ ndo na nguru ti kɛ̃ngɔ lo hɛ̃ la ma.

³ Nda mɛ mbi separa pangɔ hɛ̃ ĩ ya, zo ko la na nguru tɛ Tɔrɔ Santo ko, ta lo lengbi ti pangɔ ya: “Nzapa azonga bɛ Yezo ma ke” ma! Wa zo ko la ta na nguru tɛ Tɔrɔ Santo ma ko, ta lo lengbi ti pangɔ na nyɔ lo ya: “Yezo lo Gbia” ma!

⁴ Nguru kwa mɛ Tɔrɔ Santo ndohɛ̃ azi ko, lɛ ni ndodu ndɛ̃ ndɛ̃ ndɛ̃, ko bo Tɔrɔ Santo ko kɔi la ndohɛ̃ nguru kwa ni ko.

⁵ Kwa mɛ azi ndoli ko, lɛ ni ndodu ndɛ̃ ndɛ̃ ndɛ̃, kanda bo Gbia Yezo kɔi la ala ndoli kwa ni hɛ lo.

⁶ Kwa mɛ azi ndoli ko, lɛ ni ndodu ndɛ̃ ndɛ̃ ndɛ̃, kanda bo Gbia Nzapa kɔi la ndohɛ̃ nguru hɛ̃ azi zu ya, ala li na akwa ni ko zu.

⁷ Tɔrɔ Santo ndofa ya, ni na ya tɛrɛ zo kɔi kɔi na popo tɛ ĩ. Lo ndoli so ya, ĩ za afɔ̃ ĩ na nguru kwa mɛ ni hɛ̃ ĩ.

⁸ Tɔrɔ Santo ndohɛ̃ ambanga azi nguru ti tɛnɛngɔ tɛnɛ mɛ na ndara, ko nga bo lo la ndohɛ̃ ambanga azi mɛ ndɛ̃ nguru ti hĩngangɔ na ndo, wa ala tɛnɛ na tɛnɛ ni.

⁹ Bo Tɔrɔ Santo ko kɔi la ndohɛ̃ ambanga azi nguru ti yengɔ lo tɛ Yezo Kristo na bɛ la kɔi, ko nga bo lo la ndohɛ̃ ambanga mɛ ndɛ̃ nguru ti sarangɔ na awa ngã.

¹⁰ Tɔrɔ Santo ndohɛ̃ ambanga azi nguru ti lingɔ na aye ti kpɛnɛ, bo lo la ndohɛ̃ ambanga mɛ ndɛ̃ nguru ti pangɔ na nyɔ Nzapa, ko nga bo lo la ndohɛ̃ ambanga mɛ ndɛ̃ nguru ya, ala hĩnga na ye mɛ alo ka tɛ Tɔrɔ Santo, na aye mɛ alo ka tɛ asiɔ tɔrɔ. Tɔrɔ Santo ndohɛ̃ ambanga azi nguru ti pangɔ tɛnɛ na yanga mɛ ta ala hĩnga ma, ko nga bo lo la ndohɛ̃ ambanga mɛ ndɛ̃ nguru ti tɔndɔngɔ na nda tɛnɛ ni.

¹¹ Bo Tɔrɔ Santo ko kɔi la ndohɛ̃ nguru ti lingɔ aye ni ko zu. Nguru mɛ Tɔrɔ Santo ndohɛ̃ azi ko, lɛ nguru ni ndodu ndɛ̃ ndɛ̃ ndɛ̃, ko lo ndohɛ̃ ni na se bɛ lo.

Azi tɛ Nzapa adu nga ma ngbonga tɛrɛ zo kɔi

¹² Yezo Kristo adu nga ma ngbonga tɛrɛ zo kɔi mɛ na apɛnzɛ sĩni. Bɛ se apɛnzɛ tɛrɛ zo adu ndɛ̃ ndɛ̃ ndɛ̃ ko, ala bo na ndo ngbonga tɛrɛ kɔi.

¹³ Ngoi mɛ ndo e zu e mu batisimɔ ko, e ti ndo bo kɔi na lo nguru tɛ Tɔrɔ Santo. E Ayuda, bere azi mɛ ta Ayuda ma, ambɛ bere abɔrɔ, Nzapa ahɛ̃ ndo e zu Tɔrɔ Santo kɔi.

¹⁴ Ta ngbonga tɛrɛ zo ndodu bo na pɛnzɛ tɛrɛ kɔi ma, kanda andodu na apɛnzɛ tɛrɛ sĩni.

¹⁵ Se gɛrɛ apa ya, nga ma la ta ni ti ma ko, ta ni nga pɛnzɛ tɛrɛ ma, bɛ se lo pa so ko, lo bo pɛnzɛ tɛrɛ.

¹⁶ Ko se ma apa ya, nga ma la ta ni lɛ ma ko, ta ni nga pɛnzɛ tɛrɛ ma, bɛ se lo pa so ko, lo bo pɛnzɛ tɛrɛ.

¹⁷ Se adu ya, ngbonga tɛrɛ zo adu bo lɛ zo kɔi ko, kɔdɛ mɛ zo alengbi ti mangɔ ndo sia? Ko se adu nga ya, ngbonga tɛrɛ zo adu bo ma zo kɔi ko, kɔde mɛ zo alengbi ti mangɔ finya sia?

¹⁸ Ti biani, pɛnzɛ tɛrɛ kɔi kɔi mɛ zo na ni ko, Nzapa akpa ni nga ma se mɛ bɛ lo aye.

¹⁹ Se adu ya, pɛnzɛ tɛrɛ zo adu bo kɔi ko, ale ta ngbonga tɛrɛ zo adu nga da ma!

²⁰ Kanda ti biani ko, apɛnzɛ tɛrɛ zo da sĩni, wa ngbonga tɛrɛ zo bo kɔi.

²¹ Ta lɛ alengbi ti pangɔ hɛ̃ ti ya: “Ta mbi na gwɛ̃ tɛ mɔ ma!” Ko ta li alengbi nga ti pangɔ hɛ̃ gɛrɛ ya: “Ta mbi na gwɛ̃ tɛ mɔ ma!”

²² Kanda apɛnzɛ tɛrɛ mɛ e ndohũ ya, adu woni aɔ ala mɛ ndɛ̃ ko, ala la ngbondoni sĩ.

²³ Apɛnzɛ tɛrɛ mɛ ta e ndohũ ni ngbondoni ma ko, e ndobata ni nzɔ̃ni aɔ ala mɛ ndɛ̃. Apɛnzɛ tɛrɛ mɛ e ndoma kamɛnɛ na lo ni ko, e ndobata ni nzɔ̃ni sĩ.

²⁴ Wa apɛnzɛ tɛrɛ mɛ ta e ndoma kamɛnɛ na lo ni ma ko, ta e ndobata ni nzɔ̃ni ma. Ngoi mɛ ndo Nzapa ali na ngbonga tɛrɛ e ko, lo li ndo apɛnzɛ tɛrɛ e mɛ ta adu ngbondoni ma ya, e mu ni na ndima aɔ maka.

²⁵ Lo li ndo so ya, ta ya ngbonga tɛrɛ akangbi ma. Kanda lo li ndo so ya, apɛnzɛ tɛrɛ ndɛ̃ ndɛ̃ ndɛ̃ zu aza afɔ̃ la.

²⁶ Se mbanga pɛnzɛ tɛrɛ kɔi ahũ pɛnɔ ko, apɛnzɛ tɛrɛ mɛ ndɛ̃ zu ahũ nga pɛnɔ ni. Se mbanga pɛnzɛ tɛrɛ kɔi alua ndima ko, lo na ambanga pɛnzɛ tɛrɛ mɛ ndɛ̃ zu asaba na lo ni.

²⁷ Ĩ zu ĩ du ngbonga tɛrɛ Yezo Kristo, ko zo kɔi kɔi na popo tɛ ĩ adu pɛnzɛ tɛrɛ lo.

²⁸ Se mɛ nga Nzapa akpa azi na lɛ kwa ndɛ̃ ndɛ̃ ndɛ̃ ka ya Eklezia la. Ti kɔzoni, lo kpã awa pangɔ kwa tɛ Yezo. Ti sɛ, lo kpã awa pangɔ nyɔ Nzapa. Ti ta, lo kpã nga awa hangɔ tɛnɛ tɛ lo. So pɛni, lo kpã azi mɛ na nguru ti lingɔ ye ti kpɛnɛ, na ala mɛ na nguru ti sarangɔ awa ngã, na ala mɛ na nguru ti zangɔ afɔ̃ la, na ala mɛ na nguru ti lɛngɔ gbia ndo afɔ̃ la, nga na ala mɛ na nguru ti pangɔ tɛnɛ na yanga mɛ ta ala hĩnga ma.

²⁹ Ta azi zu adu awa pangɔ kwa tɛ Yezo, bere awa pangɔ nyɔ Nzapa, bere awa hangɔ tɛnɛ tɛ Nzapa ma. Ta azi zu nga awa lingɔ ye ti kpɛnɛ,

³⁰ bere awa sarangɔ awa ngã, bere awa pangɔ tɛnɛ na yanga mɛ ta ala hĩnga ma, bere awa tɔndɔngɔ nda tɛnɛ ni ko ma.

³¹ Kanda ale ĩ ndodu na gwɛ̃ ti luangɔ angbondo nguru kwa mɛ Tɔrɔ Santo ndohɛ̃ azi. Wa na olo ko, mbi na fangɔ ĩ na lege mɛ aɔ alege zu.