1 Kɔrinto 11 - Fana Ngbangɔ 1987

¹ Ale ĩ mu nzɔ̃ lɛ lo tɛ mbi nga ma se mɛ mbi ndomu na nzɔ̃ lɛ lo tɛ Yezo Kristo.

Kɔli na wali ka gbɛlɛ Nzapa

² Mbi gonda ĩ, na lo ko la ĩ ndoda bɛ ĩ na mbi ngoi zu, nga na lo ko la ĩ ndoli ye mɛ ndo mbi ha na ĩ.

³ Ko mbi ye ya, ĩ hĩnga ya, Yezo Kristo lo Gbia ti ndo akɔli zu, kɔli gbia ti ndo ya lo, ko Nzapa tɛ lo Gbia ti ndo Yezo Kristo.

⁴ Na ngoi ti sambela, kɔli ko la avɔrɔ Nzapa, bere apa tɛnɛ tɛ Nzapa na kpɔtɔ li lo ko, afa ya, ta lo tɔndɔ Yezo Kristo ma.

⁵ Se ta wali adu na kitambala li lo na ngoi sambela ma, ko lo vɔrɔ Nzapa, bere lo pa tɛnɛ tɛ Nzapa ko, afa nga ya, ta lo tɔndɔ kɔ lo ma. Kamɛnɛ na gbɔ̃ngɔ lo, nga ma se mɛ kamɛnɛ ndogbɔ̃ na wali mɛ akiɔ li lo ngoro ngoro.

⁶ Se ta wali agbe kitambala li lo ma ko, ale lo fa kwa li lo! Wa nga ma la adu kamɛnɛ na lo tɛ wali mɛ afa kwa li lo, bere akiɔ li lo ko, nzɔ̃ni ale lo gbe kitambala li lo.

⁷ Wa tɛ kɔli ko, ale ta lo du na kpɔtɔ li lo na ngoi ti sambela ma, na lo mɛ ya, kɔli adu limɔ tɛ Nzapa, lo ndofa nga ndima tɛ Nzapa. Kanda wali ndofa tɛ lo ndima tɛ kɔli.

⁸ Ta sanga ma, ngoi mɛ ndo Nzapa ali na kɔli ko, ta lo mu ndo pɛnzɛ tɛrɛ wali la lo li na kɔli ma. Kanda ngoi mɛ ndo lo li na wali ko, lo mu ndo pɛnzɛ tɛrɛ kɔli la lo li na wali.

⁹ Ta Nzapa ali ndo kɔli hɛ̃ wali ma, kanda lo li ndo wali hɛ̃ kɔli.

¹⁰ Nda mɛ na lo tɛ aangelo ko, ale wali ndogbe kitambala li lo, so fangɔ ya, kɔ ni adu gbia ti ndo ni la.

¹¹ Kanda na popo tɛ e azi mɛ e ye lo tɛ Gbia Yezo ko, ta wali mɛ ya zo alengbi ti lingɔ ye na se bɛ lo ma. Ko ta kɔ wali alengbi nga ti lingɔ ye na se bɛ lo ma.

¹² Ta sanga ma, nga ma la Nzapa amu ndo pɛnzɛ tɛrɛ kɔli la ali na wali ko, se mɛ nga wali ndodú kɔli na olo la. Ko ye zu andolo ka tɛ Nzapa.

¹³ Ĩ nvɛni ĩ fa ngbanga ti tɛnɛ olo: na ngoi ti sambela, se ta wali adu na kitambala li lo ma, ko lo vɔrɔ Nzapa ko, ĩ hũ ka lɛ ĩ ya, adu nzɔ̃ni?

¹⁴ Se mɛ Nzapa ali na azi ndofa ya, se kwa li kɔli agbɔ̃ sĩ ko, adu nga kamɛnɛ sĩ na lo tɛ lo.

¹⁵ Kanda se kwa li wali agbɔ̃ sĩ ko, adu ndima na lo tɛ lo. Ta sanga ma, Nzapa ahɛ̃ ndo wali kwa li mɛ ndogbɔ̃ sĩ ya, avĩ li lo.

¹⁶ Wa se zo aye bimbingɔ tɛnɛ na ndo tɛnɛ olo ko, ale lo hĩnga ya, ta e hĩnga se li ye mɛ ndɛ̃ ma, ko ta azi ti Eklezia ahĩnga nga ma.

Se mɛ e lengbi ti tɛngɔ na Tɛ tɛ Gbia

¹⁷ Tɛnɛ mɛ mbi na pangɔ hɛ̃ ĩ ko, ta mbi na gondangɔ ĩ na lo ni ma. Ta sanga ma, na ngoi mɛ ĩ ndobombi tɛrɛ ĩ so vɔrɔngɔ Nzapa ko, ta ĩ ndoli nzɔ̃ ye ma, kanda ĩ ndoli ye mɛ siɔni.

¹⁸ Ti kɔzoni, apa hɛ̃ mbi ya, na ngoi mɛ ĩ ndobombi tɛrɛ ĩ so vɔrɔngɔ Nzapa ko, ĩ ndokangbi popo tɛ ĩ, ko mbi da bɛ mbi ya, alengbi ti dungɔ biani.

¹⁹ Biani, ale ĩ ndokangbi popo tɛ ĩ, wadila azi ahĩnga abɛta awa Kristo mɛ na popo tɛ ĩ.

²⁰ Ngoi mɛ ĩ ndobombi tɛrɛ ĩ ko, ta adu Tɛ tɛ Gbia la ĩ ndotɛ ma.

²¹ Ta sanga ma, ngoi mɛ ĩ ndoga so tɛngɔ ye ko, zo kɔi kɔi ndogbangbi bo tɛngɔ ye tɛ lo nvɛni mɛ lo ga na ni. Na lo ni ko, ambanga azi ndongbã na gwɛ̃ ya la, ko kana ndogbɔ̃ ambanga mɛ ndɛ̃.

²² Ta ĩ na da tɛ ĩ ya, ĩ tɛ ye, bere ĩ nyɔ ye da ma? Ĩ ye samanangɔ na Eklezia tɛ Nzapa? Ĩ ye nga sangɔ kamɛnɛ na lɛ azi mɛ ta ala na ye kɔi ti la ma? Tɛnɛ mɛ ĩ ye ya mbi tɛnɛ hɛ̃ ĩ nɛ? ĩ ye ya mbi gonda ĩ? Ipɔ, ta mbi lengbi ti gondangɔ ĩ bɛ fani kɔi ma!

²³ Tɛnɛ mɛ ndo mbi ma ka nyɔ Gbia Yezo, mbi pa nga hɛ̃ ĩ lo mɛ: Na bi mɛ ndo aka na Yezo ko, Yezo amu ndo mapa,

²⁴ lo ĩ hɛ̃ sia kɔli hɛ̃ Nzapa we ko, lo kongbi ya ni, lo pa hɛ̃ ava lo ya: “Mapa olo ĩ tɛ ko, adu tɛrɛ mbi mɛ mbi ka so ĩ. Ale ĩ li so, so dangɔ bɛ ĩ na mbi.”

²⁵ Ala ĩ onzi tɛngɔ ye wɛ ko, lo mu nga kangu mɛ vinɔ da, lo pa hɛ̃ ava lo ya: “Kangu ti vinɔ olo ndofa fana ngbangɔ mɛ Nzapa na azi agbe na lege ti mɛnɛ tɛrɛ mbi. Wa ngoi zu mɛ ĩ na nyɔngɔ vinɔ ni ko, ĩ li so, so dangɔ bɛ ĩ na mbi.”

²⁶ Tɛnɛ olo afa ya, nga ka gbanda Gbia Yezo aga na ni ko, ĩ ndopa lo ti kwá tɛ lo ngoi zu hɛ̃ azi, na ngoi mɛ ĩ ndotɛ na mapa olo, ĩ ndonyɔ nga na vinɔ olo.

²⁷ Nda mɛ se zo atɛ mapa tɛ Gbia Yezo, bere anyɔ vinɔ tɛ lo na se kɔdɛ mɛ ta alengbi ma ko, ngbanga ati na zo ni ko la. Ngbanga ati na lo, na lo mɛ ya, lo samana na tɛrɛ Gbia Yezo, lo samana nga na mɛnɛ tɛrɛ lo.

²⁸ Ale zo kɔi kɔi abinga bɛ lo, wadila lo tɛ mapa, lo nyɔ nga vinɔ.

²⁹ Ta sanga ma, se zo atɛ mapa, anyɔ nga vinɔ, wa se ta lo tɔndɔ ni ya, adu tɛrɛ Gbia Yezo ma ko, afa ya, lo ye luangɔ etumbu.

³⁰ Nda mɛ tɛrɛ ambanga azi ma wo ma na popo tɛ ĩ ndosɔ, ambanga gba ndodu woni, ko ambanga mɛ ndɛ̃ ndokpili la.

³¹ Se adu ya, e ndobinga bɛ e nvɛni uzu na ndo asiɔ ye tɛ e ko, ale ta ngbanga mɛ gbanda Nzapa afa alengbi ti tingɔ na e ma.

³² Kanda Gbia Nzapa ndofa ngbanga tɛ e, ndohɛ̃ nga e etumbu ya, e hĩnga ndo. Lo ndoli so ya, wa gbanda na lá ti fangɔ ngbanga ko, ta ni bombi e na azi ti le sese, ni fa ngbanga, ni bi li e ma.

³³ Aya bua, na lo ni ko, ngoi mɛ ĩ ndobombi tɛrɛ ĩ so tɛngɔ Tɛ tɛ Gbia ko, ale ĩ ndoku afɔ̃ ĩ.

³⁴ Se gwɛ̃ agbɔ̃ zo, uzu ti lo gangɔ ka ndo ti bombingɔ na tɛrɛ ĩ ko, ale lo tɛ ye ka ndo tɛ lo, so Nzapa afa ngbanga, abi li ĩ na ngoi mɛ ĩ bombi na tɛrɛ ĩ. Ngoi mɛ se mbi si ka tɛ ĩ, wa mbi lɛkɛ alo mɛ ndɛ̃.