1 Kɔrinto 10 - Fana Ngbangɔ 1987

Ĩ du na kpengba lɛ so ĩ vɔrɔ angbilondo

¹ Aya bua, mbi yɛ ya ĩ da bɛ ĩ na ye mɛ ndo ali akotara e, na ngoi mɛ ndo ala na Mɔizɛ agwe fɔnɔ ndoni kɔi. Da baba avĩ ndo la zu so ta lege, ko ala zu ako ndo ngu mɛ ili ni la Bengba Ngu na gɛrɛ la.

² Adu ndo nga ma ala zu amu batisimɔ ka ya da baba, amu nga ka ya ngu, wa ani ti azi tɛ Mɔizɛ.

³ Ala zu atɛ ndo bo tɛ kɔi mɛ ndo alo ka tɛ Nzapa,

⁴ ala zu anyɔ ndo nga bo ngu mɛ alo ka tɛ Nzapa. Ngu ni ndolo ndo ka ya do tɛnɛ la ndosi. Tɛnɛ mɛ ndo Nzapa ahɛ̃ la, ko andodɔ nɔ ndoni kɔi na la la Yezo Kristo.

⁵ Kanda ta bɛ Nzapa ade ndo na lo tɛ ambanga azi gba na popo tɛ la ma. Nda mɛ ndo ala kpili kɔi kɔi, ko kinda tɛ la angbã ka bɛ ndo la.

⁶ Aye olo afa e na lɛ lo ya, ta e du na gwɛ̃ ti siɔ ye nga ma se tɛ la ma.

⁷ Ambanga azi na popo tɛ akotara e ndovɔrɔ ndo angbilondo, nga ma se mɛ asu na ni ka ya Buku tɛ Nzapa ya: “Azi adunga ndo tise ya ani tɛ ye, ani nyɔ kana, so pɛni, ala longa ndozu ya, ani dɔ dɔ gbɛlɛ angbilondo.” Wa tɛ ĩ ko, ta ĩ vɔrɔ angbilondo nga ma se tɛ la ma.

⁸ Ambanga azi na popo tɛ la ndoli ndo siɔ ye ti kamɛne, azi ni ko ndo koto sui sɛ ndoni ta, ko Nzapa akpɔ ndo la bo na la kɔi. Wa tɛ e ko, ta é li siɔ ye ti kamɛnɛ nga ma se tɛ la ma.

⁹ Ambanga azi na popo tɛ la atara ndo bɛ Nzapa. Na lo ni ndo la angbɔ atɛtɛrɛkɛ la, ala kpili. Wa tɛ e ko, ta é tara bɛ Nzapa nga ma se tɛ la ma.

¹⁰ Ambanga azi na popo tɛ la adema ndo tɛrɛ la hɛ̃ Nzapa. Na lo ni ndo la angelo mɛ ndokpɔ azi aga ndo akpɔ la. Wa tɛ e ko, ta é dema tɛrɛ e nga ma se tɛ la ma.

¹¹ Asiɔ lo olo asi ndo na la so fangɔ azi mɛ ndɛ̃ na lɛ lo. Asu ndo lɛ lo ni so tisangɔ e, na lo mɛ ya, sese adoli ti wɛngɔ.

¹² Na lo ni ko, zo ko ndoda bɛ lo ya, ni lo kpengbani wɛ ko, ale lo du na kpengba lɛ, so lo ti.

¹³ Tarangɔ bɛ ko la Satana ndotara na bɛ ĩ ko, se mɛ nga lo ndotara na bɛ azi zu la. Wa ta Nzapa ndoweza kapa mɛ Ĩo ndoko ma, ta lo ndoye nga ya, Satana atara bɛ ĩ, ko tarangɔ bɛ ni aɔ ndo nguru tɛ ĩ ma. Kanda na ngoi ko la se Satana atara bɛ ĩ ko, Nzapa asa nguru bɛ ĩ ya, ĩ gbe bɛ ĩ, wadila ĩ si na ya ni.

¹⁴ Aya bua, na lo ni ko, ĩ du na kpengba lɛ, so ĩ vɔrɔ angbilondo.

¹⁵ Ngoi mɛ mbi ndotɛnɛ tɛnɛ hɛ̃ ĩ ko, mbi ndomu ĩ nga ma awa ndara. Ĩ nvɛni ĩ fa ngbanga ti tɛnɛ mɛ mbi ndotɛnɛ hɛ̃ ĩ.

¹⁶ Ngoi mɛ e ndobombi tɛrɛ e so tɛngɔ Tɛ tɛ Gbia ko, e ndohɛ̃ sia kɔli hɛ̃ Nzapa na lo ti kangu ti vinɔ, wa e nyɔ vinɔ ni, ko e na Yezo Kristo e ti bo kɔi na lo ti mɛnɛ tɛrɛ lo. Ngoi mɛ e ndokongbi ya mapa, e ndotɛ ko, e na Yezo Kristo e ti bo kɔi na lo ti tɛrɛ lo.

¹⁷ Mapa ni bo kɔi, ko bɛ se e du sĩni ko, e bo kɔi, ta sanga ma, e zu la e tɛ ni.

¹⁸ Ĩ da bɛ ĩ na se li ye tɛ awa Izrayɛlɛ hĩ: ala ndoho sa, alu na Nzapa. Ko awa tɛngɔ sa ni ana Nzapa ati bo kɔi.

¹⁹ Ĩ da bɛ ĩ ya, mbi separa pangɔ ya, angbilondo, bere sa mɛ andolu na angbilondo ko, nda ni dazu?

²⁰ Ipɔ, mbi separa pangɔ ya, aye mɛ apaganɔ ndolu ko, ta ala ndolu na Nzapa ma, ala ndolu na asiɔ tɔrɔ. Wa ta mbi ye ya, ĩ na asiɔ tɔrɔ ĩ du ndoni kɔi ma.

²¹ Ta ĩ lengbi ti nyɔngɔ vinɔ na ya kangu tɛ Gbia Yezo, ko í nyɔ nga ni na ya kangu tɛ asiɔ tɔrɔ ma. Ta ĩ lengbi ti tɛngɔ ye na ndo mɛsa tɛ Gbia Yezo, ko ĩ tɛ nga ye na ndo mɛsa tɛ asiɔ tɔrɔ ma.

²² Ale ta e li so ma, so ngɔnzɔ agbɔ̃ Gbia Nzapa hɛ̃ e! Ta ĩ da bɛ ĩ ya, e ɔ lo na nguru ma!

Ale e li ye zu so gondangɔ na Nzapa

²³ Ambanga azi na popo tɛ ĩ ndopa ya, ani lengbi ti lingɔ ye zu. Biani, kanda ta ye zu alengbi ti zangɔ zo ma. Ala ndopa ya, ani lengbi ti lingɔ ye zu. Biani, kanda ta lo yengɔ tɛ zo alengbi ti maingɔ na lo ti ye zu ma.

²⁴ Ale ta zo kɔi agi ya, ni li ye mɛ nzɔ̃ni bo na lo tɛ ni nvɛni ma, kanda ale lo gi ya, ni li ye mɛ nzɔ̃ni na lo tɛ afɔ̃ ni.

²⁵ Sa zu mɛ andoka ka lɛ ngere ko, ĩ lengbi ti vɔ̃ngɔ, tɛngɔ nga ma se mɛ bɛ ĩ aye. Wa ta ĩ hũnda ya, bere ka alu sa ni na ngbilondo ma, so bɛ ĩ asɔ.

²⁶ Ta sanga ma, asu ka ya Buku tɛ Nzapa ya: “Sese na ye zu mɛ na lɛ ni adu ye tɛ Gbia Nzapa.”

²⁷ Se mbanga paganɔ aili ĩ ya, ĩ nɔ ĩ tɛ ye, wa se ĩ ye ĩ nɔ ko, í tɛ ye zu mɛ lo na hɛ̃ngɔ ĩ. Ko ta ĩ hũnda ya, bere ka alu sa ni na ngbilondo ma, so bɛ ĩ asɔ.

²⁸ Wa se zo apa hɛ̃ mɔ ya: “Alu sa ni na ngbilondo” ko, ta mɔ tɛ ni ma, so asɔ bɛ zo mɛ atisa mɔ.

²⁹ Wa ta mbi tɛnɛ ya, mɔ mɛ mɔ tɛ sa ni ko, bɛ mɔ na sɔngɔ ma, kanda mbi tɛnɛ ya, bɛ zo mɛ atisa mɔ la na sɔngɔ. Bere se mbanga zo apa ya: “Mbi lengbi ti tɛngɔ ye zu, ko ta mbi hĩnga nda mɛ alengbi ti pangɔ hɛ̃ mbi ya, ta mbi tɛ ni ma, so asɔ bɛ fɔ̃ mbi.

³⁰ Se mbi hɛ̃ sia kɔli hɛ̃ Nzapa na lo ti tɛ mɛ mbi tɛ ko, nda mɛ alengbi ti dingɔ mbi na lo ti tɛ mɛ mbi hɛ̃ sia kɔli hɛ̃ Nzapa na lo ni nɛ?”

³¹ Tɛnɛ mɛ mbi na gbinyangɔ hɛ̃ lo lo mɛ: bɛ se mɔ tɛ ye, bɛ se mɔ nyɔ ye, bɛ se mɔ li ye mɛ ndɛ̃ ko, li ni zu so gondangɔ na Nzapa.

³² Ta ĩ́ li ya, Ayuda bere azi mɛ ta Ayuda ma, bere azi ti Eklezia ali siɔ ye na lo ti sé du tɛ ĩ ma.

³³ Ĩ li ye nga ma se tɛ mbi: mbi ndoli kpengbani ya, na ya ye zu ko, mbi li ye mɛ ndode bɛ azi zu. Ta mbi ndogi ya, mbi li ye mɛ nzɔ̃ni bo na lo tɛ mbi ma, kanda mbi ndogi ya, mbi li ye mɛ nzɔ̃ni na lo tɛ azi zu. Mbi ndoli so ya, Nzapa aso la.