1 Kɔrinto 1 - Fana Ngbangɔ 1987

Balangɔ

¹ Mbi Polo mɛ ndo Nzapa asara mbi na se bɛ lo akpã ya, mbi du wa pangɔ kwa tɛ Yezo Kristo, nga na Sɔstɛnɛ mɛ nyita e wa Kristo la e to mbɛti olo hɛ̃ ĩ. E bala ĩ.

² E to mbɛti olo hɛ̃ ĩ azi ti Eklezia mɛ ka Kɔrinto, ĩ mɛ ndo Nzapa aili ĩ ya, ĩ na Yezo Kristo ĩ ti bo kɔi, la ĩ ti azi tɛ ni. Lo ili nga azi zu mɛ ndovɔrɔ Gbia tɛ e Yezo Kristo na ndo kwɛ zu. Lo Gbia tɛ e na la zu.

³ To e Nzapa na Gbia Yezo Kristo ali bɛ nzɔ̃ bɛ hɛ̃ ĩ, ali bɛ nga ya, bɛ ĩ adu pii ma ke!

Anzɔ̃ lo mɛ ndo Nzapa ali hɛ awa Kristo ti Kɔrinto

⁴ Mbi ndohɛ̃ sia kɔli hɛ̃ Nzapa ngoi zu na lo tɛ ĩ, na lo ko la lo li ndo nzɔ̃ bɛ hɛ̃ ĩ ti ndo Yezo Kristo.

⁵ Ta sanga ma, ngoi mɛ ndo ĩ na Yezo Kristo ĩ ti bo kɔi ko, Nzapa ahɛ̃ ndo ĩ nguru kwa zu, mai bo nguru ti hĩngangɔ na bɛta lo tɛ Nzapa nga na ti pangɔ bɛta lo ni.

⁶ Ngoi mɛ ndo e pa na tɛnɛ tɛ Yezo Kristo hɛ̃ ĩ ko, ĩ bata ndo tɛnɛ ni nzɔ̃ni ka ya bɛ ĩ.

⁷ Nda mɛ Nzapa ahɛ̃ nguru kwa zu hɛ̃ ĩ azi mɛ ĩ ndoku lá ti diringɔ tɛ Gbia tɛ e Yezo Kristo la.

⁸ Gbia tɛ e Yezo Kristo gbanda la ali ya, ĩ kpengba na ya lo yengɔ tɛ ĩ ngbĩi ĩ si ka ndani gbɔ, so gbanda abela ĩ, na lá ti diringɔ tɛ lo.

⁹ Nzapa aili ndo ĩ ya, dangɔ bɛ tɛ ĩ na tɛ Nyi ni Yezo Kristo mɛ Gbia tɛ e ati bo kɔi. Ko ta lo ndoweza kapa mɛ lo ndoko ma.

Ale mangbingɔ adu na popo tɛ awa Kristo

¹⁰ Aya bua, mbi gbɔ̃ gɛrɛ ĩ na ili Gbia tɛ e Yezo Kristo ya, ĩ tɛnɛ tɛnɛ nyɔ ĩ kɔi, ta ĩ kangbi popo tɛ ĩ ma, ĩ du na mangbingɔ, ale dangɔ bɛ tɛ ĩ na kɔdɛ ti lingɔ ye tɛ ĩ adu kɔi.

¹¹ Aya bua, mbi nɛ hɛ̃ ĩ so, na lo mɛ ya, azi ti nda se wa tɛ zo wali mɛ ili lo la Kloe apa hɛ̃ mbi ya, ĩ ndopa pa na popo tɛ ĩ.

¹² Mbi separa pangɔ ya, mbi ma ya, ta nyɔ ĩ zu ndose kɔi ma. Ambanga ndopa ya, ani azi tɛ mbi Polo, ambanga ndopa ya, ani azi tɛ Apolɔsɛ, ambanga ndopa ya, ani azi tɛ Petro, ko ambanga mɛ ndɛ̃ ndopa tɛ la ya, ani azi tɛ Yezo Kristo.

¹³ Ĩ da bɛ ĩ ya, tɛrɛ Yezo akangbi kɔi kɔi? Ta mbi Polo ndo la agɔngɔ mbi ka ndo krusi so ĩ ma! Ta ĩ mu ndo nga batisimɔ na ili mbi Polo ma.

¹⁴ Mbi hɛ̃ sia kɔli hɛ̃ Nzapa na lo ko la ta mbi hɛ̃ ndo batisimɔ hɛ̃ zo kɔi na popo tɛ ĩ ma, wenge bo Krispusi na Gayusi.

¹⁵ Na lo ni ko, ta zo kɔi alengbi ti pangɔ ya, mbi hɛ̃ ndo ĩ batisimɔ na ili mbi ma.

¹⁶ (Oo! Bɛ mbi ali na Stefanasi na azi ti nda se wa tɛ lo. Mbi hɛ̃ ndo nga la batisimɔ, ko mbi da bɛ mbi ya, ta mbi ti hɛ̃ ndo azi mɛ ndɛ batisimɔ ma.)

¹⁷ Ta Yezo Kristo ato ndo mbi ya, mbi hɛ̃ azi batisimɔ ma, kanda lo to ndo mbi ya, mbi pa hɛ̃ la Nzɔ̃ Pa tɛ ni. Ko lo pa ya, na ngoi ti pangɔ Nzɔ̃ Pa ni ko, ta mbi tɛnɛ tɛnɛ na se ndara tɛ azi ma, so azi ahũ kwá mɛ ndo ni kpi ka ndo krusi ka lɛ la gɛgɛrɛ.

Yezo Kristo ndofa ndara tɛ Nzapa

¹⁸ Na mangɔ tɛnɛ ti kwá mɛ ndo Yezo Kristo akpi ka ndo krusi ko, azi mɛ ayu lege tɛ Nzapa ndohũ tɛnɛ ni ka lɛ la nga ma tɛnɛ ti nyingɔ. Kanda e ko la e mu lege ti songɔ kwá ko, e ndohũ ni ka lɛ e nga ma tɛnɛ mɛ ndofa ya, Nzapa na nguru.

¹⁹ Ta sanga ma, asu ka ya Buku tɛ Nzapa ya: “Mbi Nzapa na gbɛ̃ngɔ ndara tɛ awa ndara, Mbi nga na hongɔ kɔdɛ tɛ awa kɔdɛ.”

²⁰ Na lo tɛnɛ ni ko, wa ndara, na wa mbɛti adu nga azi gɛgɛrɛ! Ko azi mɛ ndobimbi tɛnɛ na ngoi olo adu azi gɛgɛrɛ! Oko Nzapa afa ya, ndara tɛ azi ti lɛ sese adu gɛgɛrɛ!

²¹ Aye mɛ Nzapa ali ndofa ndara tɛ lo, ko ngoi mɛ azi ndohũ aye ni ko, ta ala ndohĩnga Nzapa na lege ti ndara mɛ ala na ni ma. Nda mɛ lo ye ndo songɔ azi mɛ aye lo tɛ lo na lege ti tɛnɛ mɛ e ndopa la. Ko azi ti lɛ sese ndopa tɛ la ya, tɛnɛ ni ko adu tɛnɛ ti nyingɔ.

²² Ezu ti Ayuda yengɔ ló ko, ala ndohũnda ya, ali aye ti kpɛnɛ ani hũ kwɛ, wadila ani ye ló ni. Ko azi ti sese ti Grɛsɛ ndoye tɛ la hĩngangɔ nda ye na ndara tɛ la nvɛni.

²³ Kanda tɛ e ko, e ndopa lo tɛ Yezo Kristo mɛ ndo agɔngɔ lo ndo krusi. Ko ngoi mɛ Ayuda ndoma lo ni ko, andosɔ bɛ la sĩ, ko azi mɛ ta Ayuda ma ndohũ ni ka lɛ la nga ma tɛnɛ ti nyingɔ.

²⁴ Kanda ambanga Ayuda, bere azi mɛ ndɛ̃ mɛ ta Ayuda ma, la Nzapa aili la ya, ala du azi tɛ ni ko, ta ala ndohũ tɛ la ni ka le la nga ma tɛnɛ ti nyingɔ ma. Ala hĩnga tɛ la ya, Yezo Kristo ndofa ya, Nzapa na nguru, lo nga na ndara.

²⁵ Ambanga azi ko ndoda bɛ la ya, ye ko la Nzapa ali, adu ye ti nyingɔ ko, ale ala hĩnga ya, ye ti nyingɔ ni aɔ ndara tɛ ani. Ko azi ko ndoda nga bɛ la ya, Nzapa lo woni ko, ale ala hĩnga ya, wongɔ tɛ Nzapa aɔ nguru tɛ ani.

²⁶ Aya bua, ĩ ko la Nzapa aili ndo ĩ ya, ĩ du azi tɛ ni ko, ĩ da bɛ ĩ na tɛrɛ ĩ nvɛni! Se ĩ ba kpa, na se dangɔ bɛ tɛ azi ko, ta awa ndara da gba na popo tɛ ĩ ma, ta awa nguru da gba ma, ta akota azi nga da gba ma.

²⁷ Kanda azi ko la azi ti lɛ sese ndohũ la ya, ta ala awa ndara ma ko, Nzapa asara ndo la akpa ya, ala du azi tɛ ni. Lo sara ndo la lo kpã so sangɔ kamɛnɛ na Ĩɛ awa ndara. Azi ko la azi ti lɛ sese ndohũ la ya, ala woni ko, Nzapa asara ndo la akpa ya, ala du azi tɛ ni. Lo sara ndo la lo kpã so sangɔ kamɛnɛ na lɛ awa nguru.

²⁸ Azi ko nga la azi ti lɛ sese ndosamana na la, ndomu nga la ya, ala ambumbusɛ azi, azi gɛgɛrɛ ko, Nzapa asara ndo la akpa ya, ala du azi tɛ ni. Lo sara ndo la lo kpã so sangɔ kamɛnɛ na lɛ akota azi.

²⁹ Nzapa ali ndo aye ko zu so ya, ta zo kɔi ayakɛ tɛrɛ lo hɛ̃ ni ma.

³⁰ Nzapa abombi e na Yezo Kristo ndoni kɔi, ko na lo ni ko, Yezo Kristo adu ndara tɛ e, Nzapa amu e ka lɛ lo ya, e abɛta azi, lo tɔ e na ya siɔ ye, ko lo li ya, e du azi tɛ ni.

³¹ Nda mɛ asu ka ya Buku tɛ Nzapa ya: “Zo ko la asepara gondangɔ tɛrɛ lo ko, ale lo gonda tɛrɛ lo na lo ye mɛ Gbia Nzapa ali” la.