ZAKE 5 - WE NU GALE 1995

Nɛ, owi kpamɛnɔ, li nɛ sɔ̃

¹ Aa nɛ, Owi kpamɛnɔ, nɛ hé kɔ̃a, nɛ nɛ zɛ́ nu nɛ we ngamɛnɔ kɛ ma nɛ kpa nɛ ni!

² Kpamɛnɔ 'da nɛ ma mbulu, nɛ lonɔ wa li tulunɔ 'da nɛ ia.

³ Mbilinɔ 'da nɛ ma tua ngangge, nɛ ngangge ni be na, mɛnɔ vɛ̃ ma sɔkpɔ sɛ hã nɛ do 'dã nɛ. Kili tɛ nɛ ma 'danga sɛ vɛ, ɔ nɛ kɛ wa dɔa ma do we ni. Nɛ ngɛma okpamɔ wena, nɛ nde nɛ ĩ̀ na, ndɔti nùi gɛ kɔla ia ni gɔ nde?

⁴ Nɛ zélé! Winɔ kɛ wa wa fɔnɔ 'da nɛ, nɛ nɛ bɛa we futa wa olo toe 'da wa ni, wa tɛ he mɔ do zu li nɛ. Winɔ kɛ wa 'bɛ̃lã kpalɛnɔ kɔ fɔnɔ 'da nɛ hã nɛ ni, wa zɛa nu wa, nɛ zɛa nui 'da wa hɔa zala Gale, Nwa ngɔ mɔ nyanga nza vɛ̃.

⁵ Dungi 'da nɛ ngɔ nùi gɛ ma de zi wena, nɛ nɛ dɛa zi mɛnɔ vɛ ɔ nɛ kɛ zã nɛ kɔ̃a ni. Nɛ nyɔngɔ zi mɔ nga'ba, nɛ nɛ gã ɔ nɛ sa'de kɛ wa dala a de wena, we 'bɔ do 'da kɔ̃ tũi kɛ wa nɛ gbɛ sɛ do a ni.

⁶ Nɛ 'bili zi 'dã we dɛ zu Owele kɛ wa dɛ̀ 'dã mɔ gɔ ni, nɛ nɛ gbɛa 'bɔ wa, nɛ nde wa bì ngɔ kili tɛ wa gɔ.

Nɛ kúnú sila nɛ

⁷ Aa onyae, we duzu ki ni, nɛ kúnú sila nɛ gbaa we hɔ ngba soe kɛ Nwa 'da lɛ, a hɔ sɛ nɛ ni. Nɛ lénggé do wi wa fɔ. A wa fɔɛ, nɛ a kunu sila a gbaa na, kuti kolo tɛ, nɛ a mi kpalɛnɔ 'da a. Nɛ a kunu 'bɔ sila a gbaa na, tala ngɔ go'do kole tɛ, nɛ kpalɛnɔ ko do dia nɛ.

⁸ Kɔ nɛ kúnú tɛ mɛ 'bɔ sila nɛ nganda ɔ nɛ wi wa fɔ ni, we kɛ ngba soe tɛa 'da Nwa 'da lɛ kɔla ia.

⁹ Aa onyae, nɛ tɛ lùngù ngba nɛ gɔ, dɔ Gale 'bílí we 'da nɛ gɔ. Nɛ zɔ́, wi 'bili we hɔa nu tɔa nga ia.

¹⁰ Nɛ lénggé ngamɛnɔ kɛ Owi gba do nu Nwa Gale wa zɔa zi, nɛ wa kunu sila wa ngɔ ma ni, nɛ ma wia na, nɛ 'bã do kɔ̃ wa.

¹¹ Lɛ sa li wa na, wa a Owi yangga, we kɛ wa kunu zɛ́ sila wa kɔ ngamɔ. Nɛ zila we kɛ Yɔbɔ kunu zi do sila a 'da fala kɛ ngamɔ kpa zi a ni. Nɛ nɛ ĩ 'bɔ ti de mɛ kɛ Nwa Gale dɛa do a do ndɔti nɛ ni. Gbãlã we, Nwa a wi mbɔkɔ li, nɛ a ĩ 'bako hã Owele wena.

Nɛ tɛ kànà tɛ nɛ gɔ

¹² Onyae, dati ngboo, mi aka nɛ na, nɛ tɛ kànà tɛ nɛ do zu li Gale li nza i, tabi do zu li nùi gɛ, tabi do gele mɔ 'bɔ gɔ. 'Da fala ma we na mɔ kɔ̃ “ĩi”, nɛ mɔ kɔ̃ “Ĩi” iko. Kɔ ma we na mɔ tɔ̃ “Ɔ̃ ɔ̃”, nɛ mɔ tɔ̃ “Ɔ̃ ɔ̃” iko, da dɛ kɔ nɛ té li ngbangga 'da Gale gɔ.

Nɛ tɛ ɔ̀mɔ̀ tɛ sambala Gale gɔ

¹³ Fala kɛ wele sanga nɛ kɔ ngamɔ nde, nɛ a sámbálá Gale. Kɔ wele do yangga, nɛ a dɔ́nggɔ́ Gale do zuma.

¹⁴ Tabi wele sanga nɛ do zɛlɛ nde, nɛ a sá mɔ hã Owi zɔ mɔ tɛ eklezia na wa tɛ, nɛ wa sambala Gale we duzu a, nɛ wa kɔ nɔ tɛ a do zu li Nwa.

¹⁵ Kɔ fala kɛ wa kɔ̃ do kɔ sila wa na, Gale a zele sɛ sambala 'da lo nde, nɛ Gale a kpasa sɛ wi zɛlɛ ni. Hã fala kɛ wi ni dɛ zi 'dã mɔ dɛa nde, nɛ Gale a fo sɛ 'bɔ ku'da 'dã mɛ ni zu a.

¹⁶ Kɔ we duzu ki ni, mi tɔ̃ hã nɛ na, nɛ gbálá 'dã mɛnɔ 'da nɛ hã ongba nɛ, nɛ nɛ sámbálá 'bɔ Gale we ongba nɛ, takɔ nɛ kpasa tɛ zɛlɛ 'da nɛ. Sambala kɛ wi bɔlɔ zu sambala do sila a vɛ̃ ni, ma do ngawi wena.

¹⁷ Lɛ lénggé Elia! A zi a wele ɔ nɛ lɛ gɛ. Nɛ a sambala zɛ́ Gale do sila a vɛ̃ na, da dɛ kɔ kolo tɛ́ gɔ. Nɛ yolo do ngba soe ni, kolo tɛ̀ zi 'bɔ gɔ, gbaa we sabɛlɛ talɛ do zɛkɛ gazɛlɛ.

¹⁸ Nɛ 'do nɛ, nɛ Elia sambala 'bɔ na, kole tɛ, nɛ kole tɛa, nɛ okpalɛnɔ ma ngɔ hɔ nɛ.

¹⁹ Aa onyae, tabi wele sanga nɛ yɔ wala 'da Gale nde, nɛ ma wia na, mbe ngba a kpo gese a dɛ ngɔ wala.

²⁰ Nɛ nɛ ĩ́ na, wi kɛ a fo 'dã wi li wala 'dã mɔ, kɔ a gese a dɛ ngɔ wala 'da Gale, nɛ nde a kpasa hi wi ni kɔ fio, nɛ Gale a ele sɛ ogba gili 'dã mɛnɔ 'da a.