ZAKE 4 - WE NU GALE 1995

Wi kɔ̃ gɛnɛ mɛnɔ nù gɛ a wi sɛnɛ Gale

¹ Bolonɔ do mɔ̃lãnɔ kɛ ma hɔ sanga nɛ fai ni, ma yolo ngɔ ge nde? Ma yòlò ngɔ 'dã wɔ kɔ kili tɛ wi, kɛ ma bi kɔ sila nɛ fai ni gɔ nde?

² Nɛ dɛ wɔ tɛ mɔ, nɛ nde nɛ kpá mɛ ni gɔ, nɛ nɛ fa we gbɛ wele. Nɛ dɛ nga'ba kpamɛnɔ, kɛ nɛ wè tɛ kpa ma gɔ ni, ma kɛ nɛ kpa we, nɛ nɛ bi bolo sanga nɛ ni. Nɛ zɔla mɛnɔ kɛ nɛ kɔ̃a we kpa nɛ ni, we kɛ nɛ gɔ̀ ma kɔ̃ Gale gɔ.

³ Nɛ gɛnɛ kɔ nɛ gɔ mɔ kɔ̃ Gale, nɛ nde nɛ kpá ma gɔ, we kɛ nɛ gɔ́ do dia nɛ gɔ. Nɛ gɔ tati a mɛnɔ kɛ ma ɛfɛ tɛ nɛ wele nɛ ni iko.

⁴ Nɛ, winɔ kɛ nɛ kɔ̃̀ gɛnɛ Gale ngboo gɔ gɛ, nɛ ĩ̀ na, wi kɛ a kɔ̃ gɛnɛ omɛnɔ nùi gɛ, nɛ nde a a wi sɛnɛ Gale ni gɔ nde? Wi kɛ a kɔ̃ gɛnɛ omɛnɔ nù gɛ ni, a hɔa wi sɛnɛ Gale ia.

⁵ Wa kɔma kɔ 'Buki 'da Gale na: “Gale do bɔnɛ Hi Wi 'da a kɛ a ia a kɔ lɛ ni.” Kɔ nɛ lengge na, wa kɔma we ni yala iko nde?

⁶ Nɛ nde dia zã kɛ Gale do ma dɛ 'da lɛ ni, ma gã la 'dã wɔ kɔ sila lɛ. Mba gɔ, wa kɔma kɔ 'Buki na: “Gale bɛa gɛnɛ owi dɛ gã zu, nɛ a do dia zã dɛ 'da owinɔ wa ba tɛ wa dɛ nù ni.”

⁷ We duzu ki ni, nɛ zélé nu Gale. Nɛ nɛ bé gɛnɛ Satana, nɛ a yu sɛ nɛ ndũu.

⁸ Nɛ kɔ́lɔ́ do Gale, nɛ a kɔlɔ sɛ tɛ mɛ 'bɔ do nɛ. Aa nɛ, Owi dɛ 'dã mɛnɔ, nɛ fɔ́lɔ́ kɔ̃ nɛ tɛ 'dã mɔ. Nɛ, owi ɔlɔ winɔ, nɛ fó 'dã linggamɛnɔ kɔ sila nɛ.

⁹ Nɛ ɔ́ do 'bako we 'dã mɛnɔ 'da nɛ. Nɛ dúngú gɛla, nɛ nɛ hé kɔ̃a. Nɛ dɛ́ na, mɔmu 'da nɛ kifi hia kɔ̃a, nɛ yangga 'da nɛ kifi 'bako.

¹⁰ Nɛ bá tɛ nɛ dɛ nù dati Nwa Gale, nɛ a ba sɛ nɛ dɛ ngɔ.

Nɛ tɛ 'bìlì we 'da ngba nɛ gɔ

¹¹ Onyae, nɛ tɛ tɔ̃̀ tɛ ngba nɛ gɔ. Wi kɛ a tɔ̃ tɛ ngba a, tabi a 'bili we 'da ngba a ni, a tɔ̃ 'dã we tɛ mbula 'da Gale, nɛ a 'bili 'bɔ we ni dɛ ngɔ mbula ni. Kɔ fala kɛ mɔ 'bili we dɛ ngɔ mbula 'da Gale, nɛ nde mɔ 'bɔ a wi zele mbula gɔ, mɔ hɔa wi 'bili we 'da mbula.

¹² Nɛ nde Gale zu a kpo a wele mbula do wi 'bili we. A zu a kpo, a wia tɛ kpasa wele, tabi tɛ dɛ na, wele yɔ. Hã mɔ, kɛ mɔ 'bili we 'da ngba mɔ gɛ, mɔ lengge na, mɔ a wio nde?

Nɛ tɛ dè gã zu gɔ

¹³ Aa nɛ, kɛ nɛ tɔ̃ na: “Sɔɛ gɛ tabi bindɛ, nɛ lɛ nɛ sɛ gɛnɛ kɔ le gɛ, tabi kɔ ki ni, nɛ lɛ ɔ sɛ i mɔ sabɛlɛ kpo, nɛ lɛ dɛ sɛ buliye, nɛ lɛ kpa sɛ mbili wena” ni, nɛ zélé mi sɛ!

¹⁴ Nɛ ĩ ti mɛ kɛ ma hɔ sɛ hã nɛ bindɛ ni nde? Kpasi 'da nɛ ma ɔ nɛ zɛ̃ we kɛ ma kutu, nɛ 'da kala gɔ, nɛ ma busu do'do ni.

¹⁵ Nɛ wia sɔ we tɔ̃ na: “Nwa kɔ̃, hã lɛ 'bana nza, nɛ lɛ dɛ sɛ kɛ gɛ, tabi ki ni.”

¹⁶ Nɛ nde do li tɔ̃ na mɛ ni, nɛ nɛ dɛ wali, nɛ nɛ dɔnggɔ tɛ nɛ. Ĩ na, dɛ wali na mɛ ni, ma dè gɔ.

¹⁷ Fala kɛ wele ĩ ti dia mɛ kɛ a wia sɔ tɛ dɛ nɛ ni, kɔ a dɛ̀ ma gɔ, nɛ nde a dɛa 'dã mɔ.