ZAKE 3 - WE NU GALE 1995

Nɛ fɔ́mɔ́ lɛnggɛ nu nɛ

¹ Aa onyae, ma wè na, owinɔ sanga nɛ kɛ wa kɔ̃a we hɔ Owi be mɔ ni, wa dɛlɛ wena gɔ. Mba gɔ, nɛ ĩ na, Gale a 'bili sɛ we 'da lɛ Owi be mɛnɔ nganda nɛ ngɔ kɛ 'da ogele winɔ.

² Lɛ vɛ, lɛ dɛ 'dã mɔ wena. Nɛ nde wi kɛ a yɔ́ nu a fala kpo gɔ ni, a a dia wi ngboo, nɛ a ĩ 'bɔ ti zimi tɛ̃ a do dia nɛ.

³ Lɛ fi fɛlɛ mɔ bolo nu mbalata, takɔ a zele lɛ, nɛ a la do li wala kɛ lɛ kɔ̃a ni.

⁴ Nɛ masua, gɛnɛ kɔ ma gã wena, nɛ gba bũ tɛ ili ma ngɔ lì i ni, nɛ nde wele wia tɛ kã ma do be yinda ngɔ go'do nɛ ni, nɛ ma la do fala kɛ zã a kɔ̃a ni.

⁵ Lɛfɛ wi ɔ tɛ mɛ 'bɔ kpasaa na mɛ ni, mɛ a be mɔ sĩ kɔ kili tɛ wi iko, nɛ nde ma wia we dɔnggɔ tɛ̃ ɛ na, ɛ dɛ gba mɔ wena. Nɛ zɔ́, bi kalĩ we sĩ wia tɛ bɛlɛ gã zamɔ vɛ̃.

⁶ Lɛfɛ wi ɔ nɛ we ni, ma a ma ko 'dã mɛnɔ nù gɛ vɛ. Mɛ a be mɔ sĩ kɔ kili tɛ lɛ, nɛ nde ma wia we 'danga kili tɛ lɛ vɛ. Lɛfɛ wi, mɛ a we kɛ ma yolo tɛ lifɛlo, nɛ ma yulu 'dã mɔ kɔ dungi 'da lɛ vɛ.

⁷ Wele wia do dala osa'denɔ vɛ, tabi osa'de zamɔ, onɔɛ, sa'denɔ kɛ wa hala do ngu'du wa, do okɔyɔ, nɛ wa zele nu a. Nɛ mbe winɔ wa dɛ ni dɛa.

⁸ Nɛ nde wele kpo wè tɛ e mbula ngɔ lɛfɛ ɛ gɔ. Lɛfɛ wi a 'dã mɔ kɔ kili tɛ wele, nɛ ma ɔ́mɔ́ tɛ dɛ 'dã mɔ gɔ. Mɛ a 'dã ina, kɛ ma gbɛ wi gbɛa.

⁹ Lɛ dɔnggɔ Baa lɛ Nwa Gale do lɛfɛ lɛ, nɛ do kpo kpo lɛfɛ lɛ ni, lɛ fɔmbɔ 'bɔ owinɔ kɛ Gale dɛa wa ɔ nɛ tɛlɛ tɛ a ni.

¹⁰ Dia lɛnggɛ dɔnggɔ do Gale, do 'dã lɛnggɛ fɔmbɔ do wele, ma yolo vɛ dɛ kpo kpo nu lɛ gɛ. Kɔ aa onyae, ma wè na, ma ɔ ní gɔ.

¹¹ Dia lì do 'dã lì wia tɛ kũ dɛ kɔ 'de kpo nde?

¹² Onyae, mangge wia tɛ ko ndimɔ nde? Nɛ wala mbɔmbi wia tɛ hɔ tɛ mangge nde? Na mɛ ni, wa wè tɛ kpa dia lì nɔ nɔa 'dɔ 'dã lì gɔ.

Hã zã kɛ ma yolo 'da Gale

¹³ Sanga nɛ gɛ, wi hã zã, kɛ a a wi ĩ ti mɔ ni, a boe nde? Fala kɛ a boe, nɛ ma wia na, a be ma do dia dɛa to tɛ̃ a, nɛ wa ĩ sɛ na, a a wi gɛ̃a sila, do wi hã zã.

¹⁴ Kɔ fala kɛ nɛ ɔ do bɔnɛ dɛ tɛ ongba nɛ, hã nɛ fa we nɛ ngɔ ngba nɛ, nɛ nɛ tɛ bà tɛ nɛ dɛ ngɔ gɔ, nɛ nɛ tɛ kìfì gbãlã we do bɛlɛ iko gɔ.

¹⁵ Hã zã ki ni, ma yòlò 'da Gale gɔ, mɛ a hã zã ngɔ nù gɛ, ma yolo kɔ wele, nɛ mɛ a hã zã mɔ́ Satana.

¹⁶ Mba gɔ, fala kɛ Owele wa ɔ do bɔnɛ dɛ tɛ ngba wa, hã wa fa we nɛ ngɔ ngba wa, nɛ kpawe do 'dã mɔ kpi do kpi sɛ di ni boe.

¹⁷ Nɛ nde hã zã kɛ ma yula 'da Gale ni, ma si tɛ ɛ do ki ni. Wi kɛ a do hã zã kɛ ma yula 'da Gale ni, a a wi kɛ sila a a sa, a a wi dɛ na, do wi gɛ̃a sila, nɛ gbãlã zã a boe. A do 'bako ongba a li a boe, nɛ a a wi dɛ de mɔ. A sáká bula li wele gɔ, nɛ a ɔ́lɔ́ wele gɔ.

¹⁸ Owi hã zã wa a Owi 'dafa dɛa na sanga Owele. Wa ɔ nɛ Owi kɛ wa mi dia kpalɛ ni. Nɛ kpalɛ wa mi ni, mɛ a dɛa na kɛ ma ko bɔlɔ zu.