ZAKE 2 - WE NU GALE 1995

Winɔ vɛ̃ wa wia kɔ̃ li Gale

¹ Onyae, nɛ a owinɔ kɛ nɛ kɔ̃a zu li Nwa 'da lɛ Yezu Kristo, kɛ a do dɔ̃lɔ̃ li wena ni, nɛ ma wè na, nɛ saka bula li wele gɔ.

² Nɛ lénggé we gɛ sɛ: Fala kɛ nɛ mba li ngba nɛ, nɛ mbe wele hɔ, nɛ nde a hi'da dia tulu, nɛ a do pɛtɛ mɔ mbali zu kɔ̃ a. Nɛ mbé nɛ hɔ 'bɔ, nɛ nde a a wi sã, nɛ a do ɛ̃a tulu tɛ a.

³ Nɛ nɛ hã dĩ hã wi he'de dia tuli, nɛ nɛ tɔ̃ hã a na: “Mɔ tɛ́, hã mɔ dúngú tɛ dia fala gɛ!” Nɛ kɛ 'da wi sã, nɛ tɔ̃ hã a na: “Mɔ yóló dɛ i mɔ” tabi: “Mɔ dúngú nù dɛ ti nyanga mi gɛ!”

⁴ Kɔ fala nɛ dɛ ní, nɛ nde ma bé na, ombe winɔ wa la ngba wa li nɛ la gɔ nde? Nɛ nɛ hɔ̀ Owi 'bili we do 'dã hã gɔ nde?

⁵ Aa onyae ngɔ sila mi gɛ, nɛ zélé mi sɛ: Gale saka owinɔ kɛ wa zɔ wa nɛ́ Owi sã ngɔ nù gɛ ni na, wa hɔ Owi kɔ̃a we, nɛ kɔ̃a we ni a kpamɛ 'da wa, nɛ wa le sɛ kɔ le nwa 'da a, kɛ a kpua zɛ́ mbulu nɛ hã owinɔ wa kɔ̃a gɛnɛ a ni.

⁶ Nɛ nde nɛ, nɛ hã́ dĩ hã Owi sãnɔ gɔ. Nɛ ĩ̀ na, owinɔ kɛ wa hã ngamɔ hã nɛ, nɛ wa da nɛ dati Owi 'bili wenɔ ni, wi a Owi kpamɛnɔ gɔ nde?

⁷ Nɛ wi 'dángá 'bɔ dia zu li Kristo, kɛ Gale ia zu nɛ ni, wi a kpo kpo Owi kpamɛnɔ ni gɔ nde?

⁸ Wa kɔma mbula 'da Nwa Gale kɔ 'Buki 'da a na: “Mɔ kɔ̃́ gɛnɛ ngba mɔ, ɔ nɛ kɛ mɔ kɔ̃a do kili tɛ mɔ wele nɛ ni.” Kɔ fala kɛ nɛ dɛ mbula ni, nɛ nɛ dɛ do dia nɛ.

⁹ Kɔ fala kɛ nɛ gɔnɔ sanga Owele gɔna, nɛ nde nɛ dɛa 'dã mɔ, nɛ mbula ma hã sɛ ngbangga hã nɛ li Gale, we kɛ nɛ 'danga ma.

¹⁰ Wi kɛ a dɛ mbulanɔ 'da Gale, kɔ a yɔ mbe sanga nɛ kpo iko, nɛ nde a yɔa mbulanɔ vɛ ia.

¹¹ Mba gɔ, Gale kɛ a tɔ̃a na: “Mɔ tɛ ɔ̀ do wili tabi do wuko mɔ́ ngba mɔ gɔ” ni, a tɔ̃a 'bɔ na: “Mɔ tɛ gbɛ̀ wi gɔ.” Na mɛ ni, gɛnɛ kɔ mɔ ɔ̀ do wili tabi do wuko mɔ́ ngba mɔ gɔ, kɔ mɔ gbɛ wele, nɛ nde mɔ 'danga mbula 'da Gale vɛ̃ ia.

¹² Kɔ we duzu ki ni, nɛ 'dáfá wila we nu nɛ, do dɛa mɔ tɛ nɛ, we kɛ nɛ ĩ na, Gale a 'bili sɛ we 'da nɛ do 'da mbula kɛ ma do ngawi we kpasa wele kɔ 'dã mɔ ni.

¹³ Wi kɛ a ĩ́ 'bako hã ngba a gɔ, kɔ Gale nɛ 'bili we 'da a, nɛ a ĩ́ sɛ tɛ mɛ 'bɔ 'bako hã a gɔ. Nɛ nde wi kɛ a ĩ 'bako hã ngba a, nɛ Gale a ĩ sɛ tɛ mɛ 'bɔ 'bako hã a, nɛ a té sɛ li ngbangga gɔ.

Mɔ kɔ̃ zu li Gale, nɛ mɔ dɛ́ de mɔ

¹⁴ Aa onyae, fala kɛ wele tɔ̃ na, ɛ kɔ̃a zu li Gale, kɔ a dɛ́ mɛnɔ kɛ zã Gale kɔ̃a ni gɔ, nɛ gulu wenɔ kɛ a tɔ̃ ni na ge nde? Kɔ̃a we ki ni ma kpasa sɛ a nde?

¹⁵ Fala kɛ mbe nya nɛ wi kɔ̃a we hɔ, nɛ nde a do tulu bina, nɛ a zɔla 'bɔ nyɔngɔmɔ do'do,

¹⁶ kɔ mbe kpo sanga nɛ tɔ̃ hã a na: “Mɔ sí do dia nɛ! Mɔ hé'dé tulu dɛ tɛ mɔ, nɛ mɔ nyɔ́ngɔ́ mɔ!” Nɛ nde nɛ hã̀ mɛnɔ a zɔla ni hã a gɔ, nɛ mɛ ma nɛ gala a ni a ge nde?

¹⁷ Kɔ̃ zu li Gale ma ɔ na mɛ ni. Fala kɛ wele tɔ̃ na, ɛ kɔ̃a Gale, nɛ nde a dɛ́ mɛnɔ kɛ zã Gale kɔ̃a ni gɔ, nɛ nde kɔ̃a we 'da a fi fia.

¹⁸ Mbe wele wia we tɔ̃ na: “Mbe winɔ wa kɔ̃a zu li Gale, nɛ ombe wa dɛ de mɔ.” Nɛ mi tɔ̃ sɛ hã a na, mɔ bé kɔ̃a we 'da mɔ kɛ fo de dɛa mɔ olo nɛ bina ni hã mi, nɛ mi be sɛ tɛ mɛ 'bɔ kɔ̃a we 'da mi, kɛ ma be tɛ̃ ɛ kɔ dɛ de dɛa mɛnɔ ni hã mɔ.

¹⁹ Mɔ kɔ̃a na, Gale kpo iko gɔ nde? Ma a dia! Nɛ nde gɛnɛ kɔ o'dã hi winɔ wa kɔ̃ 'bɔ na mɛ ni, nɛ wa tana kili.

²⁰ Mɔ, yɔndɔ wi gɛ, mɔ kɔ̃a na, mi be gulu kɛ na, wele kɔ̃ Gale, kɔ a dɛ̀ de mɔ olo kɔ̃a we ni gɔ, nɛ nde kɔ̃a we 'da a ma yala iko ni hã mɔ nde?

²¹ Mɔ lénggé yaa lɛ Abrahama sɛ! A hɔa zɛ́ wi bɔlɔ zu li Gale do wala ge nde? Ma do wala mɛ kɛ a dɛa zɛ́ ni gɔ nde? A ia be 'da a Izaka ngɔ gbagala we hã a do dɔnggamɔ hã Gale.

²² Mɔ zɔ́, kɔ̃a we 'da Abrahama ma nɛ zi fala nɛ kpo do mɛnɔ a dɛ ni. Nɛ mɛnɔ a dɛ zi ni, ma 'dafa kɔ̃a we 'da a, nɛ ma wia ngboo.

²³ Ní a wenɔ wa kɔma kɔ 'Buki 'da Gale ni, ma dɛa gbãlã we. Wa kɔma na: “Abrahama kɔ̃a zu li Gale, nɛ we duzu kɔ̃a we ni, Gale ba a na, a a wi bɔlɔ zu.” Nɛ Gale sa zi li a na yali ngba ɛ.

²⁴ Ma kɛ lɛ zɔa na, wele hɔ́ wi bɔlɔ zu li Gale, tati a we kɔ̃a we iko gɔ, nɛ nde ma 'bɔ we mɛnɔ a dɛ ni.

²⁵ Ma dɛa 'bɔ tɛ̃ ɛ na mɛ ni do Rahabɛ, wuko ndumba. A kɔ̃a zi gɛnɛ Owi miãnɔ 'da Oyudanɔ kɔ tɔa 'da a, nɛ 'do nɛ, nɛ a bia gele wala hã wa na, wa si do ma, hã wa kpasa. Nɛ we duzu mɛ a dɛa ni, nɛ Gale ia a do wi bɔlɔ zu.

²⁶ Nɛ ĩ na, fala kɛ wele ɔ́mɔ́ 'bɔ gɔ, nɛ nde a fia. Kɔ̃ zu li Gale ɔ tɛ mɛ 'bɔ na mɛ ni, fala kɛ wele dɛ̀ mɔ do nɛ gɔ, nɛ nde kɔ̃a we 'da a fia.