ZAKE 1 - WE NU GALE 1995

¹ Wi a mi Zake, wi dɛa toe 'da Gale do Nwa Yezu Kristo, mi tombo balɛ hã nɛ owinɔ 'da Gale, kɛ nɛ pɛsa do kɔ gele lenɔ ngɔ nù gɛ vɛ̃ ni.

Gale hã hã zã hã owinɔ kɛ wa kɔ̃a a ni

² Aa onyae, 'da fala kɛ nɛ kpa ngamɔ tɛ̃ ɛ do tɛ̃ ɛ, nɛ nɛ dɛ́ yangga.

³ Mba gɔ, nɛ ĩ́ na, 'da fala nɛ kunu sila nɛ ngɔ ngamɛnɔ kɛ ma yamba kɔ̃a we 'da nɛ ni, nɛ sila nɛ ma nganda sɛ.

⁴ Nɛ nde ma wia na, nɛ nganda sila nɛ gbaa we hɔ ndɔti nɛ, takɔ nɛ hɔ dia wi ngboo, nɛ mɔ kpo tɛ zɔ̀lɔ̀ kɔ dɛa mɔ tɛ nɛ gɔ.

⁵ Kɔ fala kɛ wele sanga nɛ zɔlɔ hã zã, nɛ ma wia na, a gɔ ma kɔ̃ Gale, nɛ Gale a hã sɛ hã a, we kɛ Gale hã mɔ hã wele vɛ̃ do dia sila iko, nɛ a áká nu wele we nɛ gɔ.

⁶ Kɔ fala kɛ wele gɔ mɔ kɔ̃ Gale, nɛ ma wia na, a ɔ do kɔ̃a we na, Gale a hã sɛ mɛ ni hã ɛ, nɛ a tɛ ɔ̀ do kafi kɔ sila a gɔ. Mba gɔ, wi ba kafi ɔ nɛ ngele lì kɛ bũi da ma dɛ falanɔ vɛ ni.

⁷ Wi ba kafi ni tɛ lènggè na, Nwa a hã sɛ mɔ hã ɛ gɔ,

⁸ we kɛ sila a bɔa, nɛ a kpolo dɛa mɔ tɛ̃ a kpula fai.

Wi sã do wi kpamɔ

⁹ Ma wia na, nya lɛ wi kɔ̃a we, kɛ a a wi sã ni, a dɛ́ yangga kɛ Gale ba a dɛ ngɔ ni.

¹⁰ Nɛ wi kɔ̃a we kɛ a a wi kpamɔ ni, a dɛ́ yangga kɛ Gale ba a dɛ nù ni. Mba gɔ, gɛnɛ kɔ a do kpamɔ wena, nɛ nde a kolo sɛ ɔ nɛ fulɛlɛ ni.

¹¹ 'Da fala kɛ wese to, kɔ nùi ba we, nɛ wɔkɔsɛ kolo, nɛ do nɛ ala, nɛ ma 'bɔ a dia gɔ. Kɛ 'da wi kpamɔ ma ɔ kpasaa na mɛ ni, a fe sɛ tɛ fa kpamɛnɔ 'da a.

Wi yamba sila wele a wio nde?

¹² Yangga wena do wi kɛ a kunu sila a kɔ ngamɛnɔ kɛ ma yamba a ni. We kɛ Gale a si sɛ olo nɛ hã a do kpasi kɛ a kpua mbulu nɛ hã owinɔ wa kɔ̃a gɛnɛ a ni.

¹³ Wi kɛ sila a ɔlɔ a we dɛ 'dã mɔ nde, nɛ a tɛ tɔ̃̀ na, wi a Gale a ɔlɔ ɛ gɔ. Mba gɔ, 'dã mɔ wè tɛ ɔlɔ sila Gale gɔ, nɛ Gale ɔ́lɔ́ 'bɔ wele gɔ.

¹⁴ Mɛ kɛ ma ɔlɔ sila wele, mɛ a 'dã wɔ kɔ kili tɛ a wele nɛ. Wɛ ni ba a, nɛ ma tombo a we dɛ 'dã mɔ.

¹⁵ 'Dã wɛ kɛ wele kɔ̃ gɛnɛ nɛ ni, ma ko 'dã mɔ, kɔ 'dã mɛ ni gã, nɛ ma kã a dɛ li fio.

¹⁶ Aa onyae ngɔ sila mi gɛ, nɛ tɛ ɔ̀lɔ̀ tɛ nɛ gɔ!

¹⁷ Dia mɛnɔ vɛ̃ ma yolo 'da Baa lɛ Gale tɛ ngɔ i, kɛ a dɛa wese, do zɛkɛ, do sɔlanɔ ni. Gale kpóló tɛlɛ tɛ̃ a gɔ. A ɔ̀ nɛ wese kɛ ma le nù, nɛ ma la lɛ dɛ kɔ gba tũ ni gɔ.

¹⁸ A kɔ̃a do sila a, nɛ a hã kpasi hã lɛ do wala 'da we nu a kɛ mɛ a gbãlã we ni. A dɛa ni, takɔ lɛ ɔ Owi dati kɔ mɛnɔ a dɛa ma ni vɛ̃.

Le zélé we nu Gale, nɛ Iɛ dɛ́ ma

¹⁹ Aa onyae ngɔ sila mi gɛ, dɔ tɛ zu nɛ élé ngɔ we gɛ gɔ: Ma wia na wele zele we dɔ̃, nɛ nde a tɛ wèlè we dɔ̃ dɔ̃ gɔ, nɛ zã a tɛ nɔ̃̀lɔ̃̀ dɔ̃ dɔ̃ gɔ.

²⁰ Mba gɔ, wi nɔ̃lɔ̃ zã wè tɛ dɛ mɔ kɛ ma a bɔlɔ li Gale ni gɔ.

²¹ Kɔ we duzu ma, nɛ bé gɛnɛ mɛnɔ kɛ ma hã ndi kɔ sila wele ni, do 'dã dɛa mɔ tɛ wi vɛ̃. Nɛ nɛ kɔ̃́ gɛnɛ we nu Gale kɛ a ia kɔ sila nɛ ni do dia nɛ, we kɛ ma wia do kpasa nɛ.

²² Nɛ dɛ́ mbula 'da Gale, nɛ tɛ zèlè do zala nɛ iko gɔ. Ní gɔ, nɛ nde nɛ ɔlɔ tɛ nɛ iko.

²³ Mba gɔ, wi kɛ a zele we nu Gale do zala a iko, nɛ nde a dɛ́ mbula nɛ gɔ ni, a ɔ nɛ wi kɛ a zɔ bula li a kɔ talatala iko ni.

²⁴ A zɔ ma, nɛ a la, nɛ do ti, nɛ tɛ zu a ele ngɔ tɛlɛ tɛ kɛ bula li a ɔ nɛ ni do'do.

²⁵ Kɔ wi kɛ a yambala mbulanɔ 'da Gale ngboo, nɛ a kɔ̃̀ na, ɛ zele do zala ɛ iko gɔ, nɛ a dɛ ma dɛa fai ni, nɛ Gale a wele sɛ nu a tɛ a kɔ dɛa tonɔ 'da a vɛ̃. Mba gɔ, mbulanɔ 'da Gale ma a dia ngboo, nɛ ma kpasa lɛ kɔ 'dã mɔ.

²⁶ Kɔ fala kɛ mbe wele lengge na, ɛ a wi dɔnggɔ Gale, kɔ a ĩ̀ ti fɔmɔ lɛnggɛ nu a gɔ, nɛ nde a ɔlɔ tɛ a iko, nɛ dɔngga wi a dɔnggɔ do Gale ni ma yala iko.

²⁷ Ngbongbo dɔnggɔ wi kɛ Baa lɛ Gale kɔ̃a gɛnɛ nɛ ni, mɛ a kɛ na, mɔ gálá obe gula, do Owi fio wili kɔ ngamɛnɔ 'da wa. Nɛ mɔ fɔ́mɔ́ sila mɔ wele nɛ na, dɔ 'dã mɛnɔ nù gɛ 'dángá ma gɔ.