ZAKARIA 9 - WE NU GALE 1995

Gale hã etumbu hã ogele winɔ kɛ zã Israɛlɛ

¹ Nɛ zélé we NWA wila gɛ! A 'bili we tombo etumbu dɛ ngɔ owi Hadrakɛ do owi Damasi. We kɛ nwa zɔ́ mɔ tati a tɛ onu kpala Israɛlɛ iko gɔ, nɛ nde a zɔ mɔ tɛ mɛ 'bɔ tɛ ogele winɔ vɛ̃.

² A zɔ mɔ tɛ le Hamatɛ, kɛ ma dɔ̃ɔ do Damasi, nɛ a zɔ 'bɔ mɔ tɛ le Tirɛ do Sidoni, kɛ owi kɔ nɛ wa ĩ ti dɛ to wena ni.

³ Owi Tirɛ wa zĩ gba ngbo 'do le 'da wa takpa, nɛ wa ngɛmɛ li fɛ̃a mɔ bolo do mɔ mbali dɛlɛ wena, nɛ ma kpa falanɔ vɛ̃ ɔ nɛ gbãlã kɛnzɛ ni.

⁴ Nɛ nde NWA a kala sɛ mɛnɔ ni kɔ̃ wa vɛ̃, nɛ a gbini sɛ gba ngbonɔ 'da wa, nɛ a da ma 'dɔ gba lì, nɛ a fi we tɛ le, nɛ ma bɛlɛ vɛ̃.

⁵ Nɛ owi Askaloni wa zɔ sɛ na mɛ ni, nɛ kili ba wa. Nɛ owi Gaza wa tana sɛ 'bɔ kili gbulu gbulu. Nɛ owi Ekroni wa dɛ sɛ 'bɔ na mɛ ni, we kɛ fo sɛ 'bɔ owi Tirɛ, kɛ wa gbini zi zã wa do wa ni bina. Nɛ fo sɛ 'bɔ nwa tɛ kɔ le Gatɛ bina. Owinɔ wa yu sɛ kɔ le Askaloni, nɛ ma kulu sɛ.

⁶ Nu kpala Owele kpi do kpi wa ba sɛ ko sanga tɛ ngba wa, nɛ wa tɛ sɛ we ɔ kɔ le Asdɔdɛ. NWA tɔ̃a na: “Zu Ofilisti gã wena, kɔ mi hã sɛ sape hã wa na mɛ ni.

⁷ Mi dɛ sɛ na wa tɛ nyɔngɔ 'bɔ mulu kɛ tɔkɔ 'bana zã nɛ ni, tabi mulu kɛ wa dɔnggɔ do kpikima ni gɔ. Nɛ tala owinɔ 'da wa kɛ wa 'bana nza ni, wa hɔ sɛ owinɔ 'da mi, nɛ wa hɔ sɛ nɛ́ owi kɔ nu kpala Yuda ni. Owi Ekroni wa le sɛ sanga owinɔ 'da mi, ɔ nɛ kɛ Oyebuzi wa dɛa zi ni.

⁸ Mi zɔ sɛ mɔ tɛ nùi 'da mi, nɛ mi amba ogele sodanɔ na, wa tɛ là do di ni gɔ. Nɛ mi ha sɛ 'bɔ wala na, wele tɛ we zɛlɛ tɛ owinɔ 'da mi gɔ, we kɛ ngangga ni, gbali mi tɛ sala dɛ ngɔ owinɔ 'da mi.”

Nwa a tɛ sɛ we e dungu fio ngbala winɔ

⁹ Aa nɛ, owi Yeruzalɛmɛ, nɛ dɛ́ yangga, nɛ nɛ zɛ́ kaliã. Nɛ zɔ́ nwa 'da nɛ, a tɛ tɛ nɛ. A a wi bɔlɔ zu, nɛ a nɛa ngɔ owi sɛnɛ a li bolo. Nɛ nde a ba tɛ̃ a dɛ nù, nɛ a kũ ngɔ be punda.

¹⁰ A fo sɛ ngilingili do ombalata bolo ngɔ nù Israɛlɛ, nɛ a gbini sanga nzabele bolo. A e sɛ dungu fio ngbala owinɔ, nɛ a dungu sɛ nwa ngɔ winɔ nyanga nza gɛ vɛ̃. A sɛ a nwa ngɔ winɔ, yolo nu gba lì Meditɛrane we hɔ nu lì Efratɛ.

NWA a gɔnɔ sɛ zu Owi kɔlɔ 'dulinɔ

¹¹ NWA tɔ̃a na: “Aa nɛ Oisraɛlɛ, mi lengge sɛ gba tɔkɛ kɛ mi gba zi do nɛ, nɛ mi gbangba 'da nɛ do wala tɔkɔ sa'denɔ kɛ nɛ gbɛ wa hã mi ni, nɛ mi fo sɛ winɔ 'da mi kɔlɔ 'duli, ɔ nɛ kɛ wa fo do wele kɔ gba 'du kɔ̃ dɛ nza ni.

¹² Aa nɛ, owi 'dulinɔ, kɛ nɛ gbini zi zã nɛ do Gale ni, nɛ kpóló tɛ nɛ dɛ kɔ le 'da nɛ Yeruzalɛmɛ, kɛ gba ngboe zĩ ma takpa ni. Mi tɔ̃ hã nɛ ngangga ni na, mi si sɛ olo zɛlɛ tɛ 'da nɛ. Mi wele sɛ nu mi tɛ nɛ, nɛ mi hã dia mɔ hã nɛ fala bɔa.

¹³ Mi e sɛ Oyuda ɔ nɛ nzabele bolo, nɛ Oisraɛlɛ sɛ a kpili li nɛ. Mi ba sɛ Owi Yeruzalɛmɛ dɛ kɔ̃ mi nɛ́ du kɔya bolo ni, nɛ mi bi sɛ Owi Grɛsɛ.”

¹⁴ NWA Gale a yolo sɛ si ba gɔtɔ, nɛ a tɛ do gba kolo, nɛ a dama mɔtũlũ tɛ la do ma. A hɔ sɛ, nɛ a yolo dɛ ngɔ owinɔ 'da a, nɛ a da sɛ kpilinɔ 'da a, nɛ ma la do ngɔ wa ɔ nɛ nyɛa li kolo ni.

¹⁵ NWA ngɔ mɔ nyanga nza vɛ̃ a zɔ sɛ mɔ tɛ owinɔ 'da a. Nɛ a ndɔlɔ sɛ owi sɛnɛ wa do lasi, nɛ a gbɛ wa. Owinɔ 'da a wa e sɛ dani tɛ owi sɛnɛ wa, nɛ tɔkɔ tɛ wa ma fo sɛ nɛ́ lì dɔ̃, tabi nɛ́ tɔkɔ tɛ sa'de kɛ ma dunu bila, nɛ wa kpã ma dɛ li gbala gbagala ni.

¹⁶ Do ngba soe ni, NWA Gale a kpasa sɛ owinɔ 'da a, ɔ nɛ kɛ wi fɔmɔ bata kpasa sa'denɔ 'da a kɔ ngamɔ ni. Nɛ tɛ wa ma ndele sɛ ngɔ nùi 'da a gɔ̃lĩ gɔ̃lĩ, ɔ nɛ odia ta olo gã gole, kɛ wa nãlã tɛ ndasa nwa ni.

¹⁷ Nùi ma de sɛ wena, nɛ owinɔ wa kpa sɛ dia dungu. Obe zagbãlã do obe zɔnga wa nyɔngɔ sɛ dia nyɔngɔmɔ, nɛ wa nɔ mbé dɔ̃ ngɔ nùi ni, nɛ wa gã, nɛ wa nganda.