ZAKARIA 8 - WE NU GALE 1995

Gale kpua mbulu 'dafa Yeruzalɛmɛ dɛ olo nɛ

¹ NWA ngɔ mɔ nyanga nza vɛ̃ wila 'bɔ mbé we hã mi Zakaria na:

² “Mi NWA, mi kɔ̃a we gala owi Yeruzalɛmɛ, we kɛ mi do gã kɔ̃a zã we wa, nɛ kɔ̃a zã ni la mɔ vɛ̃. Sila mi fai dɛ ngɔ wa.

³ Ma kɛ mi tɔ̃a na, mi kpolo sɛ tɛ mi dɛ Yeruzalɛmɛ, nɛ mi ɔ sɛ mbé nɛ dɛ di ni. Nɛ wa sa sɛ li Yeruzalɛmɛ na: ‘Le dɛ mbula.’ Nɛ wa e sɛ li kala 'da mi Sioni na: ‘Kala Santo.’

⁴ Nɛ okpasa wi wili do okpasa wuko, kɛ wa ba dɔndɔlɔ we gba dɔa sabɛlɛ 'da wa ni, wa tɛ sɛ 'bɔ we dungu dɛ li fanda le Yeruzalɛmɛ ni.

⁵ Nɛ gba gili obulu be do oboko be wa dunu sɛ li wala tɛ dɛ sa.

⁶ “We ni ma ɔ li obe Israɛlɛ, kɛ wa 'bana nza ngangga ni nɛ́ kɛ ma wè tɛ dɛ tɛ̃ ɛ gɔ ni. Nɛ nde ma wè tɛ gana mi nwa gɔ.

⁷ Mi fo sɛ owinɔ 'da mi, kɛ wa kɔlɔ 'duli tɛ ngɔ nùnɔ si 'biti gba wese, do si 'biti gɛ̃a wese ni,

⁸ nɛ mi gese sɛ wa dɛ kɔ le Yeruzalɛmɛ na, wa ɔ dɛ di ni. Nɛ wa sɛ a owinɔ 'da mi, nɛ mi sɛ a Gale 'da wa. Nɛ mi dungu sɛ nwa ngɔ wa do bɔlɔ nɛ, do dia zã.

⁹ “Ngangga ni, nɛ zila'bɔ kpo wenɔ kɛ owi gba olo nu mi Gale wa tɔ̃a zi hã nɛ, do 'da fala e nyanga dɛ tɔa Tɛmpɛloe 'da mi dɛ olo nɛ ni. Kɔ nɛ ngo tɛ nɛ.

¹⁰ Zɛ́ dati a ki ni, Owele wa dɛ to, nɛ nde wa kpá si olo dɛa toe 'da wa gɔ, tabi wa kpá mɔ olo sa'denɔ 'da wa gɔ. Mi kifi zi li owinɔ dɛ tɛ ngba wa, nɛ wa sɛnɛ ngba wa. Nɛ wa wè zi tɛ yɛnggɛ ngɔ gɔ.

¹¹ Nɛ nde ngangga ni, mi dɛ́ sɛ 'bɔ ni do tala obe Israɛlɛ kɛ wa 'bana nza gɛ gɔ.

¹² Mi e sɛ dungu fio ngɔ nùi, nɛ kolo ma tɛ sɛ wena, nɛ ote vinɔ ma ko sɛ wala nɛ, nɛ nùi ma ko sɛ okpalɛ. Mi hã sɛ dia mɛnɔ ni vɛ̃ hã tala owinɔ 'da mi kɛ wa 'bana nza ni.

¹³ Aa nɛ, Oyuda do Oisraɛlɛ! Zɛ́ dati, ogele winɔ wa fɔmbɔ zɛ́ ngba wa na: ‘E kɔ Gale hã ngamɔ hã mɔ, ɔ nɛ kɛ a hã ma hã Oyuda do Oisraɛlɛ ni.’ Nɛ nde ngangga ni, mi kpasa sɛ nɛ, nɛ ogele winɔ ni wa tɔ̃ sɛ hã ongba wa na: ‘E kɔ Gale wele nu a tɛ mɔ, ɔ nɛ kɛ a wele nu a tɛ Oyuda do Oisraɛlɛ ni.’ Nɛ ngo tɛ nɛ, nɛ nɛ tɛ dɛ̀ 'bɔ kili gɔ.”

¹⁴ NWA ngɔ mɔ nyanga nza vɛ̃ tɔ̃a na: “'Da fala oyaa nɛ wa nɔ̃lɔ̃ zi zã mi ni, nɛ mi 'bili zi na, mi hã zɛlɛ tɛ hã wa, nɛ mi kpòlò zi 'bɔ nu mi gɔ.

¹⁵ Nɛ nde ngangga ni, mi 'bili we wele nu mi tɛ nɛ, owi Yeruzalɛmɛ do Oyuda. Kɔ nɛ tɛ dɛ̃ kili gɔ.

¹⁶ Nɛ zɔ mɛnɔ kɛ ma wia na nɛ dɛ gɛ: Wele do wele a tɔ̃ gbãlã we hã ngba a. 'Da fala tɔ̃ ngbangga, nɛ nɛ 'bili wenɔ do bɔlɔ nɛ, do tɛlɛ tɛ kɛ na ma hã dungu fio ni.

¹⁷ Nɛ tɛ 'dàfà 'dã mɔ we dɛ do ngba nɛ gɔ, nɛ nɛ tɛ zònggò tɛ nɛ do bɛlɛ gɔ. We kɛ mi nwa, mi sɛnɛ tɛlɛ tɛ dɛa mɛnɔ na mɛ ni wena.”

Okɔ̃ tũ bɛ̃ nyɔngɔmɔ ma kifi sɛ ngba soe ɛngga

¹⁸ NWA ngɔ mɔ nyanga nza vɛ̃ wila we hã mi Zakaria na:

¹⁹ “Mi NWA, mi tɔ̃ hã nɛ Oyuda na, bɛ̃a nyɔngɔmɛ kɛ nɛ bɛ̃ do zɛkɛ 'da nalɛ, do zɛkɛ 'da mɔlɔ, do sambo, do zɛkɛ 'da 'bu kɔ sabɛlɛ ni, ma kifi sɛ ngba soe yangga we nɛ. Kɔ ma wia na, nɛ dɛ gbãlã we dɛa mɔ, nɛ nɛ fá we ɔ do dungu fio do ongba nɛ.”

²⁰ NWA ngɔ mɔ nyanga nza vɛ̃ tɔ̃a na: “Ogele winɔ wa yolo sɛ kɔ gba gili lenɔ, nɛ wa tɛ dɛ Yeruzalɛmɛ gɛ.

²¹ Nɛ owinɔ kɔ mbe le kpo, wa tɔ̃ sɛ hã wanɔ kɔ gele le na: ‘Nɛ tɛ́, kɔ lɛ nɛ we dɔnggɔ NWA ngɔ mɔ nyanga nza vɛ̃, nɛ lɛ sambala a, takɔ a wele nu a tɛ lɛ.’ Nɛ owinɔ kɔ gele le ni wa gese sɛ na: ‘Lɛ nɛ́ do nɛ.’

²² Ogba gili wele do ogele winɔ kɛ wa nganda wena ni, wa tɛ sɛ dɛ Yeruzalɛmɛ we fa mi NWA ngɔ mɔ nyanga nza vɛ̃, nɛ wa ala sɛ nu wa hã mi na, mi wele nu mi tɛ wa.

²³ Mi NWA mi tɔ̃a na, do ngba soe ni, nɛ ogele wele 'bu, kɛ lɛnggɛ nu wa tɛ̃ ɛ do tɛ̃ ɛ ni, wa 'be sɛ nu gã tulu tɛ be Yuda kpo, nɛ wa tɔ̃ hã a na, lo kɔ̃a we kpe li wala do a kpo, we kɛ lo zila na, Gale do Oyuda boe.”