ZAKARIA 7 - WE NU GALE 1995

Gale bɛ̃a tɛlɛ tɛ kɛ Oisraɛlɛ wa bɛ do nyɔngɔmɛ ni

¹ Do zɛkɛ 'da kusi, tabi zɛkɛ Kisle, kɔ̃ nɛ nalɛ, do kɔ nalɛ sabɛlɛ dɛa to nwa 'da Dariusi, nɛ NWA wila 'bɔ mbé we hã mi.

² Owi Betɛlɛ wa tumba zi Sarɛsɛrɛ do Regɛmɛ-Melɛkɛ do ombe wele na, wa nɛ tɛ kɔ Tɛmpɛloe 'da NWA ngɔ mɔ nyanga nza vɛ̃, kɔ wa gɔ wila nu 'da Gale,

³ nɛ wa aka onganganɔ do Owi gba olo nu Gale na: “Ma la di ni sabɛlɛ dɔ wena, lɛ hia zi kɔ̃a we kɛ Tɛmpɛloe 'danga, nɛ lɛ bɛ̃a nyɔngɔmɔ do zɛkɛ 'da mɔlɔ, do zɛkɛ 'da sambo. Kɔ ma wia na, lɛ 'bana dɛ na mɛ ni fai nde?”

⁴ Nɛ NWA ba nu a hã mi na,

⁵ mi tɔ̃ gisa nu we 'da a hã onganganɔ do owinɔ ngɔ nù gɛ vɛ̃ na: “'Do 'bu sabɛlɛ sambo, nɛ tɛ ala nu nɛ do bɛ̃ nyɔngɔmɔ fai do zɛkɛ 'da mɔlɔ, do zɛkɛ 'da sambo. Nɛ dɛ̀ na mɛ ni na, ma dɔnggɔ mi gɔ.

⁶ Nɛ 'da fala ni, nɛ nyɔngɔ mɔ, nɛ nɛ nɔ dɔ̃, takɔ ma hã yangga hã nɛ wele nɛ iko.”

⁷ Nwa mbisa zɛ́ 'bɔ owinɔ dati gɛ do wala 'da owi gba olo nu a kpasaa na mɛ ni. Ma zɛ́ do 'da fala owinɔ kɔ le Yeruzalɛmɛ wa kpa zi dungu fio, nɛ ogba gili winɔ wa ɔ zi kɔ be lenɔ kɛ zã Yeruzalɛmɛ, do li gba zɔ̃ Negɛvɛ, do nyanga kalanɔ si 'biti gɛ̃a wese ni.

Gulu kɛ obe Israɛlɛ wa la zi kɔlɔ 'duli ni

⁸ NWA ngɔ mɔ nyanga nza vɛ̃ wila we hã mi Zakaria na:

⁹ “Mi NWA, mi tɔ̃a zɛ́ hã nɛ owinɔ 'da mi belee na, nɛ gɔ́nɔ́ wenɔ do bɔlɔ nɛ, nɛ nɛ bé kɔ̃a zã do dia zã hã ongba nɛ.

¹⁰ Nɛ tɛ zɛlɛ tɛ Owi fio wilinɔ, do obe gulanɔ gɔ, nɛ nɛ tɛ zɛlɛ 'bɔ tɛ ogɛnɛnɔ, do owi sãnɔ gɔ. Nɛ tɛ 'dàfà 'dã mɔ we dɛ do ngba nɛ gɔ.”

¹¹ Nɛ gɛnɛ kɔ nwa tɔ̃a zɛ́ na mɛ ni, nɛ nde owinɔ wa zèlè gɔ. Wa kifi 'do wa hã a, nɛ wa kpe zala wa na, da dɛ kɔ lo zélé we ni gɔ.

¹² Wa nganda sila wa nɛ́ ta ni, nɛ wa bɛ̃ we zele bia wenɔ kɛ Hi Wi 'da NWA ngɔ mɔ nyanga nza vɛ̃ be zi hã wa, do wala 'da Owi gba olo nu a zɛ́ dati gɛ ni. We duzu ki ni, ma kɛ zã NWA Gale nɔ̃lã zi dɛ tɛ wa nganda wena,

¹³ nɛ a tɔ̃ na: “Ɔ nɛ kɛ mi sa mɔ hã wa, nɛ wa zèlè mi gɔ ni, wa sa mɔ hã mi, nɛ nde mi zélé sɛ wa gɔ.

¹⁴ Nɛ mi pɛsɛ wa dɛ sanga ogele winɔ kpi do kpi, kɛ wa ĩ zi ti wa dati gɔ ni. Nɛ nùi olo wa ni 'danga vɛ̃. Dia nùi 'da wa ma kifi li go, nɛ wele ɔ́ 'bɔ di ni gɔ.”