ZAKARIA 6 - WE NU GALE 1995

Zakaria zɔa ongilingili nalɛ

¹ Mi ka 'bɔ mɔ do li yalɛ, nɛ mi zɔ ongilingili nalɛ kɛ ma yolo dɛ sanga okala bɔa, nɛ wa dɛa kalanɔ ni do mɔ bolo.

² Nɛ wa kpua ofila mbalata tɛ ngilingili kɛ dati, nɛ wa kpo otũ mbalata tɛ kɛ bɔa,

³ nɛ wa kpo ofɛ̃a mbalata tɛ kɛ talɛ, nɛ wa kpo ombalata kɛ tɛ wa ɔ mbala mbala do fila mɔ ni tɛ kɛ nalɛ.

⁴ Nɛ mi aka anzɛ kɛ a wele we hã mi ni na: “Aa nwa, gulu ngilingilinɔ gɛ a ge nde?”

⁵ Nɛ a gese hã mi na: “Mɛ a Ohi Wi nalɛ, kɛ wa yolo dɛ kɛ zã NWA ngɔ mɔ nyanga nza vɛ̃ ni. Kɔ ngangga ni, wa tɛ la ngɔ nùi.”

⁶ Nɛ ngilingili kɛ otũ mbalatanɔ wa gbɔtɔ ma ni, ma la dɛ ngɔ nù Babilonia si gbãlã ngɔ. Nɛ ofɛ̃a mbalatanɔ wa la si 'biti gɛ̃a wese. Nɛ ombalatanɔ kɛ tɛ wa a mbala mbala do fila mɛnɔ ni, wa la dɛ ngɔ nù kɛ si ba gɔtɔ.

⁷ Nɛ ofila mbalatanɔ wa tɛa, nɛ wa bi we la nɛ, takɔ wa yɛnggɛ ngɔ nùi vɛ̃. Nɛ NWA tɔ̃ hã wa na: “Nɛ nɛ́, kɔ nɛ yɛnggɛ ngɔ nùi.” Wa nɛa, nɛ wa dɛ na mɛ ni.

⁸ Nɛ NWA sa mɔ hã mi, nɛ a tɔ̃ hã mi na: “Mɔ zɔ ombalatanɔ kɛ wa la dɛ ngɔ nùi si gbãlã ngɔ i ni, wa dɛ sɛ na, Hi Wi 'da mi zĩlĩ ngɔ nùi ni.”

NWA ba nu a na wa dɛ ndasa nwa hã Yozue

⁹ Nɛ NWA ba nu a hã mi Zakaria na:

¹⁰ “Mɔ zɔ̃ Hɛldai, Tobia do Yɛdaya, wa yula kɔlɔ 'duli kɔ wa si, nɛ wa ɔ kɔ tɔa 'da Yozia, be 'da Sɛfania. Wa tɛa do fɛ̃a mɔ bolo do mɔ mbali we 'dɔlɔ hã mi. Kɔ mɔ nɛ sɔɛ gɛ kɔ tɔa 'da Yozia i,

¹¹ nɛ mɔ kala fɛ̃a mɔ bolo do mɔ mbali di ni, nɛ mɔ dolo do ndasa nwa, nɛ mɔ gu sɛ ma zu gã nwa nganga Yozue, be 'da Yosadakɛ.

¹² Nɛ mɔ tɔ̃ hã a na, NWA ngɔ mɔ nyanga nza vɛ̃ tɔ̃a na: Do 'do nza, nɛ wele kpo a hɔ sɛ, li a a Kpalawele. Nɛ kpasi ma yolo sɛ kɔ a, nɛ ma kunu. Wi nɛ dɛ sɛ tɔa Tɛmpɛloe 'da mi dɛ olo nɛ wi a a.

¹³ Do gbãlã we, a sɛ a a nɛ dɛ tɔa Tɛmpɛloe dɛ olo nɛ. A he'de sɛ tulu nwa, nɛ a dungu ngɔ kpongbo nwa, nɛ a sɛ a nwa ngɔ owinɔ. Nɛ nganga kpo a yolo sɛ dɛ kɛ zã a. Nɛ sanga tɛ ngba wa bɔa ni ma lɔ sɛ wena.

¹⁴ Nɛ ndasa nwa ni, ma 'bana sɛ fai dɛ kɔ Tɛmpɛloe ni, we gba ta zu winɔ ngɔ Hɛldai, Tobia do Yɛdaya, do dia sila 'da Yozia, be 'da Sɛfania.”

¹⁵ Owele wa yolo sɛ nyɛlɛ wena, nɛ wa tɛ we gala dɛa to tɔa Tɛmpɛloe 'da NWA. Kɔ 'da fala ma dɛ tɛ̃ ɛ na mɛ ni, nɛ nɛ ĩ sɛ ngboo na, wi a NWA ngɔ mɔ nyanga nza vɛ̃ hã a tumba mi Zakaria hã nɛ. Nɛ mɛnɔ ni vɛ̃ ma dɛ sɛ tɛ̃ ɛ, 'da fala kɛ nɛ dɛ olo nu NWA Gale 'da nɛ do wala olo nɛ ngboo ni.