ZAKARIA 5 - WE NU GALE 1995

Zakaria zɔa kasa 'buku fɔmba

¹ Mi ka 'bɔ mɔ do li yalɛ, nɛ mi zɔ kasa 'buku, wa yala li nɛ yala, nɛ ma tɛ bũlũ do zã bũ gɛ.

² Nɛ anzɛ ni aka mi na, mi zɔ ge nde? Nɛ mi gese hã a na: “Mi zɔ kasa 'buku, wa yala li nɛ yala, nɛ ma tɛ bũlũ do zã bũ gɛ. 'Da du nɛ a mɛtrɛ 'bu, nɛ 'da dɔ nɛ a mɛtrɛ mɔlɔ.”

³ Nɛ a tɔ̃ hã mi na: “Mɛ wa kɔma kɔ 'buki ni a fɔmba kɛ NWA nɛ tombo sɛ dɛ ngɔ nùi vɛ̃ ni. Dɛ li mbee kulu 'buki ni kpo, wa kɔma na, NWA a ndaka sɛ Owi zũnɔ vɛ̃ ngɔ nùi do'do. Nɛ tɛ mbee kulu nɛ, wa kɔma na, NWA a ndaka sɛ owinɔ vɛ̃ kɛ wa zonggo tɛ wa do bɛlɛ ni.

⁴ NWA ngɔ mɔ nyanga nza vɛ̃ tɔ̃a na, ɛ do tɛ̃ ɛ hã ɛ nɛ tombo fɔmba ni. Nɛ ma le sɛ kɔ tɔa 'da wi zũ kpo kpo, do wele kpo kpo kɛ a zonggo tɛ̃ a do zu li ɛ do bɛlɛ ni. Nɛ fɔmba ni ma 'bana sɛ dɛ kɔ tɔanɔ 'da wa, nɛ ma 'danga sɛ tɔanɔ 'da wa vɛ̃.”

Zakaria zɔa gã yele do wuko kɔ nɛ

⁵ Nɛ anzɛ ni tɛa 'bɔ, nɛ a tɔ̃ hã mi na: “Ká mɔ sɛ! Mɛ mɔ zɔ ma tɛ tɛ i mɔ ni a ge nde?”

⁶ Nɛ mi aka a na: “Ki ni a ge nde?” Nɛ a gese na: “Mɛ a gã yele kɛ ma dunu do 'dã mɛnɔ 'da winɔ ngɔ nùi gɛ vɛ̃.”

⁷ Do 'da fala ni, nɛ mɔ nu yele, kɛ wa dɛa do mɔ bolo kɛ ma dĩlĩ wena ni, ma hũi. Nɛ mi zɔ wuko a dungu nù dɛ kɔ nɛ ni!

⁸ Nɛ anzɛ ni tɔ̃ hã mi na: “Wuke ni, a be a 'dã mɔ.” A nɛa we tɔ̃ ni do'do, nɛ a isi wuke ni dɛ kɔ gã yele i, nɛ a kpe nu nɛ dɛ olo nɛ.

⁹ Mi nɛa we ba li mi dɛ ngɔ, nɛ mi zɔ owuko bɔa, nɛ nde wa do sala 'baka wa ɔ nɛ kɛ 'da nɔɛ ngele ni, wa tɛ bũlũ do zã bũi. Nɛ wa tɛa, nɛ wa ba gã yele ni, nɛ wa bũlũ do ma dɛ li ngɔ i.

¹⁰ Nɛ mi aka anzɛ ni na: “Wukonɔ ni wa la do gã yele dɛ do nde?”

¹¹ Nɛ a gese hã mi na: “Wa la do ma dɛ ngɔ nù Babilonia, nɛ wa 'dafa sɛ tɔa i mɔ, nɛ wa e gã yele ni kɔ nɛ.”