ZAKARIA 4 - WE NU GALE 1995

Zakaria zɔa mɔ e do mwinda do ote olivɛ bɔa

¹ Nɛ anzɛ kɛ a wele sɔ we hã mi ni tɛa, nɛ a tunu mi, ɔ nɛ kɛ wa tunu wele li yala ni.

² Nɛ a aka mi na, mi zɔ ge nde? Nɛ mi gese na: “Mi zɔ mɔ e do mwinda, kɛ ma vɛ̃ do mɔ mbali, nɛ daka nɔ dɛ ngɔ nɛ. Nɛ wa dɛa ongbɔnɔ sambo, yolo tɛ daka nɔɛ ni dɛ ngɔ, takɔ ma gbɔtɔ nɔɛ dɛ tɛ omwinda sambo na ma nyɛ.

³ Nɛ ote olivɛ bɔa dɛ kɛ zã daka nɔɛ ni, kpo si ngawili kɔ̃, nɛ kpo si gale.”

⁴ Nɛ mi aka anzɛ kɛ a wele we hã mi ni na: “Aa nwa, gulu kɛnɔ gɛ vɛ̃ a ge nde?”

⁵ Nɛ a aka mi na: “Mɔ ĩ̀ ti nɛ gɔ nde?” Nɛ mi gese hã a na, mi ĩ̀ gɔ.

^6a Nɛ a tɔ̃a gulu nɛ hã mi na:

^10b “Omwindanɔ sambo ni, ma be gbali nwa, kɛ a zɔ mɛnɔ vɛ̃ ma la ngɔ nù gɛ ni.”

¹¹ Nɛ mi aka 'bɔ a na: “Gulu ote olivɛnɔ bɔa, kɛ ma fi mɔ e do mwinda dɛ gbogbo ni a ge nde?

¹² Nɛ gulu ongbɔnɔnɔ bɔa kɛ ma dɛ ngbala ogbakɔ̃ te olivɛnɔ bɔa, kɔ nɔɛ hɔ nɛ ni a ge nde?”

¹³ Nɛ a aka mi na: “Mɔ ĩ̀ gɔ nde?” Nɛ mi gese hã a na, mi ĩ̀ gɔ.

¹⁴ Nɛ a tɔ̃ gulu nɛ hã mi na: “Mɛnɔ ni ma be owinɔ bɔa kɛ wa saka wa, nɛ wa a nɔ zu wa, takɔ wa dɛ toe 'da Gale, NWA ngɔ mɔ nyanga nza vɛ̃ ni.”

NWA kpua mbulu hã Zorobabɛlɛ

^6b Nɛ anzɛ ni tɔ̃ hã mi na, mi gba nu lɛnggɛ gɛ hã Zorobabɛlɛ, gã wi ngɔ le na: “NWA ngɔ mɔ nyanga nza vɛ̃ tɔ̃a na, mɔ kpá sɛ si olo toe 'da mɔ do ngawi 'da osodanɔ 'da mɔ, tabi do ngawi 'da mɔ zu mɔ kpo gɔ. Nɛ nde wi sɛ a Hi Wi 'da mi hã a nɛ hã ngawi mɛnɔ vɛ̃ hã mɔ.

⁷ Nɛ ngamɛnɔ kɛ ma ɔ sɛ dati mɔ nɛ ngala kala ni, ma fo sɛ tɛ̃ ɛ. Mɔ dɛ sɛ Tɛmpɛloe dɛ olo nɛ. Kɔ mɔ nɛ sɛ we e tala dɛa toe nɛ́, nɛ owinɔ wa zɛ sɛ kaliã na: ‘Nɛ zɔ̀ dia mɔ kɛ gɛ!’ ”

⁸ Nɛ NWA tɔ̃a 'bɔ mbé we gɛ hã mi na:

^9-10a “Zorobabɛlɛ ndua nyanga Tɛmpɛloe ia, nɛ a dɛ sɛ to nɛ, nɛ ma e. Nɛ nɛ tɛ zɔ̀ dɛa to tɔa kɛ wa ndua ma bi sĩ ni li nɛ yala gɔ. Nɛ nde nɛ dɛ́ yangga, we zɔ Zorobabɛlɛ tɛ dɛ tɔa Tɛmpɛloe dɛ dati.” Nɛ 'da fala ma dɛ tɛ̃ ɛ na mɛ ni, nɛ nɛ ĩ sɛ na, wi a NWA ngɔ mɔ nyanga nza vɛ̃ hã a tumba mi Zakaria hã nɛ.