ZAKARIA 3 - WE NU GALE 1995

Zakaria zɔa gã nwa nganga Yozue

¹ Nɛ NWA Gale bia 'bɔ mbé mɔ hã mi Zakaria. Mi ɔa yala, nɛ mi zɔ gã nwa nganga Yozue, nɛ nde a yula dɛ dati anzɛ 'da NWA. Nɛ Satana yula dɛ kɛ zã Yozue do si ngɔ ngawili kɔ a we da a na, a dɛa 'dã mɔ.

² Nɛ anzɛ 'da NWA tɔ̃ hã Satana na: “Satana, e kɔ NWA hã etumbu hã mɔ! E kɔ NWA, wele kɛ a saka le Yeruzalɛmɛ do mɔ́ a ni, a 'bili ngbangga 'da mɔ! Mɔ ĩ kɛ na, Yozue a wi kɛ Gale fua a kɔ fɛna fio, ɔ nɛ gua kɛ wa tili ma nu we dɛ 'do ni gɔ nde?”

³ Mi zɔa na tuli kɛ Yozue hi'da ma, nɛ a yolo do ma dɛ dati anzɛ ni, ma ba ndi wena.

⁴ Nɛ anzɛ ni tɔ̃ hã owinɔ kɛ a yula do wa li nza i ni na: “Nɛ hɔ́lɔ́ ndi tulunɔ gɛ tɛ̃ a do'do.” Nɛ a tɔ̃ hã Yozue na: “Mɔ zɔ́! Mi fua 'dã mɛ 'da mɔ zu mɔ ia, kɔ mi nɛ he'de tulu ɛngga hã mɔ.”

⁵ Nɛ a ba nu a na, wa kpo sa kitambala 'da nganganɔ zu Yozue. Wa kpua ma zu a, nɛ wa he'de sa tulu hã a dɛ li anzɛ ni.

⁶ Nɛ anzɛ tɔ̃ hã Yozue na:

⁷ “NWA ngɔ mɔ nyanga nza vɛ̃ tɔ̃a na: Fala kɛ mɔ dɛ mbula 'da mi, kɔ mɔ yɛnggɛ do li wala 'da mi, nɛ mɔ dungu sɛ gã wi ngɔ Tɛmpɛlo 'da mi, do li fandanɔ di ni. Nɛ mi yulu sɛ mɔ kɔ owinɔ wa dɛ toe dati mi ni.

Gale a sa sɛ mɔ hã wi toe 'da a na a tɛ

⁸ “Kɔ aa mɔ Yozue, gã nwa nganga, mɔ zélé! Nɛ nɛ, ongba a nganganɔ, nɛ zélé! Nɛ ɔ dɛ nɛ bia mɔ si ngɔ dia dungu kɛ ma tɛ sɛ 'do gɛ ni. Mi nɛ sa mɔ hã wi toe 'da mi kɛ li a a Kpalawele ni na, a tɛ.

⁹ Mi ba sɛ ta kpo, nɛ mi zĩ sɛ ma dati Yozue, nɛ ta ni sɛ do kpolo nɛ sambo, nɛ ma ndele sɛ gɔ̃lĩ gɔ̃lĩ. Mi do tɛ mi, mi kɔmɔ sɛ mɔ dɛ ngɔ nɛ. Nɛ mi fo sɛ 'dã mɛ kɛ ma 'danga nùi gɛ ni 'do tũ kpo iko. Mi NWA ngɔ mɔ nyanga nza vɛ̃, mi tɔ̃a ni.

¹⁰ Ngba soe ni ma we, nɛ nɛ sa sɛ mɔ hã ongba nɛ, nɛ nɛ dungu ti gɔ̃lɔ̃ ote vinɔnɔ do figɛnɔ 'da nɛ do gɛ̃a sila. Nɛ fo sɛ wi tulu nɛ bina.”