ZAKARIA 2 - WE NU GALE 1995

Zakaria zɔa oza sa'de

¹ Mi ka 'bɔ mɔ do li yalɛ ni, nɛ mi zɔ oza sa'de nalɛ.

² Nɛ mi aka anzɛ na: “Gulu oza sa'denɔ gɛ a ge nde?” Nɛ a gese hã mi na: “Ma be ngawi 'da ogele winɔ kɛ wa pɛsɛ Oyuda mba do Owi Yeruzalɛmɛ do Oisraɛlɛ dɛ gele fala ni.”

³ Nɛ NWA bia Owele nalɛ hã mi, wa a Owi dɛ dula.

⁴ Nɛ mi aka a na: “Mɛ winɔ gɛ wa tɛa we dɛ nɛ ni a ge nde?” Nɛ a gese hã mi na: “Wa tɛa we a kili tɛ ogele winɔ, kɛ wa 'danga mɛnɔ 'da Oyuda do owi Yeruzalɛmɛ do Oisraɛlɛ vɛ̃, nɛ wa pɛsɛ wa ni. Owi dɛ dulanɔ ni wa isi sɛ ogele winɔ dɛ nù.”

Zakaria zɔa fɛlɛ we do 'da du mɔ

⁵ Mi ka 'bɔ mɔ do li yalɛ, nɛ mi zɔ wele, nɛ nde a 'bia fɛlɛ we do 'da du mɔ dɛ kɔ̃ a.

⁶ Nɛ mi aka a na: “Mɔ nɛ do nde?” Nɛ a gese hã mi na, ɛ nɛ Yeruzalɛmɛ, takɔ ɛ we 'da du le do 'da dɔ nɛ.

⁷ Nɛ anzɛ kɛ a wele sɔ we hã mi ni tili dɛ dati, takɔ a gɔnɔ dati mbe gele anzɛ, kɛ a tɛ tɛ dɛ 'da a nga ni.

⁸ Nɛ anzɛ wele kɛ dati ni tɔ̃ hã wele ki ni na: “Mɔ yú 'do be zagbãlã a 'bia fɛlɛ dɛ kɔ̃ a ni, nɛ mɔ tɔ̃ hã a na, wa dɛ́ sɛ gba ngbo zĩ 'do le Yeruzalɛmɛ gɔ, we kɛ owinɔ do onadalamɛnɔ di ni wa dɔ wena.

⁹ Nɛ NWA 'bili na, ɛ do tɛ̃ ɛ, ɛ ɔ sɛ di ni nɛ́ gba ngbo, kɛ ma zĩ le takpa, nɛ ɛ nyɛ sɛ ɔ nɛ we ni dati owi sɛnɛ nɛ, takɔ ɛ fɔmɔ le. Nɛ ɛ ɔ sɛ dɛ di ni do dɔ̃lɔ̃ li 'da ɛ vɛ̃.”

NWA sa mɔ hã Owi kɔlɔ 'dulinɔ na wa kpolo tɛ wa

^10-11 NWA tɔ̃a hã owinɔ 'da a na: “Mi pɛsɛ zi nɛ fatata do nyanga nza vɛ̃. Nɛ nde ngangga ni, nɛ, owi kɔlɔ 'dulinɔ tɛ ngɔ nù Babilonia si gbãlã ngɔ, nɛ kúlú ngɔ, kɔ nɛ kpolo tɛ nɛ dɛ Yeruzalɛmɛ.”

¹² Na mɛ ni, NWA ngɔ mɔ nyanga nza vɛ̃ tumba mi do toe gɛ dɛ ngɔ ogele winɔ kɛ wa bi nɛ owinɔ 'da a, nɛ wa pɛsɛ nɛ ni na: “Wele bi nɛ, nɛ nde a bi Owi kɛ wa ngɔ sila mi ɔ nɛ gbali mi ni.

¹³ Do gbãlã we, mi kifi sɛ li mi dɛ tɛ ogele winɔ. Nɛ nɛ kɛ wa 'danga zi mɛnɔ 'da nɛ, nɛ wa kala nɛ do ngbá ni, nɛ 'danga sɛ mɛnɔ 'da wa.” Kɔ 'da fala ma dɛ tɛ̃ ɛ na mɛ ni, nɛ nɛ ĩ sɛ na, wi a NWA ngɔ mɔ nyanga nza vɛ̃ hã a tumba mi Zakaria hã nɛ.

¹⁴ NWA tɔ̃a na: “Aa nɛ owi Yeruzalɛmɛ, nɛ dɛ̃ yangga, nɛ nɛ zɛ́ kaliã, we kɛ mi nɛ tɛ we ɔ dɛ sanga nɛ.

¹⁵ Nɛ do ngba soe ni, nɛ gba gili ogele winɔ wa tɛ sɛ dɛ 'da mi, nɛ wa hɔ owinɔ 'da mi. Nɛ mi ɔ sɛ dɛ sanga nɛ obe Israɛlɛ.” Kɔ 'da fala ma dɛ tɛ̃ ɛ na mɛ ni, nɛ nɛ ĩ sɛ na, wi a NWA ngɔ mɔ nyanga nza vɛ̃ hã a tumba mi Zakaria hã nɛ.

¹⁶ Nɛ nù Yuda ma hɔ sɛ 'bɔ nù mɔ NWA, nɛ a saka sɛ 'bɔ le Yeruzalɛmɛ do mɔ́ a.

¹⁷ E kɔ owinɔ vɛ̃ wa dungu fioo dati NWA, we kɛ a nɛ yolo tɛ fala ɔi 'da a kɛ ma santo ni, we tɛ nɛ hã ni.