ZAKARIA 14 - WE NU GALE 1995

NWA a hɔ sɛ we gɔnɔ ngbangga

¹ Kɔ̃ tũ kɛ NWA nɛ gɔnɔ do ngbangga ni kɔlɔ ia. Nɛ ogele wele wa kala sɛ odia mɛnɔ kɔ le Yeruzalɛmɛ, nɛ wa kɛ̃ sanga nɛ dɛ li Owele lenɔ ni.

² NWA a ngɛmɛ sɛ li ogele winɔ vɛ̃ na, wa nɛ we bi le Yeruzalɛmɛ. Nɛ wa ba sɛ le, nɛ wa kala dia mɛnɔ kɔ tɔanɔ, nɛ wa ɔ do wukonɔ di ni ni do nga nɛ. Nɛ wa kala sɛ ombe winɔ kɔ le ni si do wa kɔlɔ 'duli, nɛ tala ombe wa 'bana sɛ dɛ kɔ le ni.

³ 'Do nɛ, nɛ nwa a tɛ sɛ we bi ogele winɔ ni, ɔ nɛ kɛ a dɛ tɛ bolonɔ kɛ ma la zi fai ni.

⁴ Do 'da fala ni, nɛ a yolo sɛ dɛ ngɔ kala Olivɛ, kɛ mɔ yolo Yeruzalɛmɛ, nɛ nde ma si 'biti gba wese ni. Nɛ kala Olivɛ ma gba sɛ sanga tɛ ngbɛ ɛ bɔa, nɛ mbe kala la si 'biti gba wese, nɛ mbee nɛ la si 'biti gɛ̃a wese, nɛ ma fi gbongbo dɛ gbogbo.

⁵ Nɛ nɛ, owi Yeruzalɛmɛ, nɛ yu sɛ do kɔ gbongboe ngbala kalanɔ ni, we kɛ ma la sɛ gbaa dɛ kɔ le Asalɛ. Nɛ yu sɛ, ɔ nɛ kɛ oyaa nɛ wa dɛa zi do ngba soe nùi tana do 'da fala 'da Oziasi, nwa ngɔ nù Yuda ni. Nɛ NWA Gale 'da mi, a tɛ sɛ fala nɛ kpo do oanzɛnɔ 'da a vɛ̃.

⁶ Do 'da fala ni, wese do zɛkɛ sɛ bina, nɛ gɛ̃ɛ, tabi gbãlã mũlũ sɛ 'bɔ bina.

⁷ Nɛ fo sɛ 'bɔ gba tũ bina, mɛ sɛ fai a sa fala iko. Nɛ wi ĩ ti 'da fala ma nɛ hɔ sɛ nɛ ni a NWA zu a kpo.

⁸ Do 'da fala ni, nɛ fua lì ma go'do sɛ kɔ le Yeruzalɛmɛ, nɛ ma gɔnɔ sɛ sanga tɛ ngbɛ ɛ dɛ gbogbo, nɛ mbe kpo fo dɛ 'dɔ gba lì Ndɔ Fio, nɛ mbee nɛ fo dɛ 'dɔ gba lì Meditɛrane. Nɛ gɛnɛ kɔ zɔlɔ sabɛlɛ, tabi zɔlɔ lì kolo, nɛ nde ma fo sɛ fua fai.

⁹ Nɛ NWA Gale a dungu sɛ nwa ngɔ nùi vɛ̃. Nɛ do 'da fala ni, nɛ winɔ vɛ̃ wa dɔnggɔ sɛ tati a zu li a kpo.

¹⁰ Nɛ nùi vɛ̃ kɛ zã Yeruzalɛmɛ, yolo Geba si gbãlã ngɔ, we hɔ Rimoni si ba gɔtɔ, ma kifi sɛ mbɛ nù. Nɛ le Yeruzalɛmɛ ma kusu sɛ dɛ ngɔ, nɛ ngbala nɛ ma ndo sɛ do nu ngbo Bɛnzamɛ we hɔ tɛ nu ngbo kɛ li nɛ a “Gbala dɛlɛ” tɛ fala ã gbɛlɛ nu ngboe zi dati ni. Nɛ ma yolo sɛ 'bɔ tɛ ngbala tɔa Hananeɛlɛ we hɔ tɛ fala kpĩ̀lĩ̀ do dɔ̃ɛ 'da nwa.

¹¹ Nɛ owinɔ wa ɔ sɛ dɛ kɔ le ni do dia nɛ, nɛ nde wele tɛ́ sɛ 'bɔ we bi bolo di ni gɔ.

¹² Nɛ NWA a tombo sɛ o'dã zɛlɛ dɛ ngɔ ogele winɔ kɛ zã nù Yuda kɛ wa nɛa we bi le Yeruzalɛmɛ ni. Mulu tɛ wa ma mbulu sɛ, nɛ nde wa 'bana do tunu li wa. Nɛ gbali wa ma mbulu sɛ dɛ kɔ kɔa nɛ, nɛ lɛfɛ wa ma mbulu dɛ kɔ nu wa.

¹³ Do 'da fala ni, nɛ NWA a dɛ sɛ na, kili ba wa nganda wena, nɛ zu wa vĩ, nɛ wele do wele siki li a dɛ tɛ ngba a we bi a.

¹⁴ Owi wilinɔ kɔ nu kpala Yuda wa bi sɛ ngɔ le Yeruzalɛmɛ, nɛ wa kala sɛ kpamɛnɔ 'da ogele winɔ ni vɛ̃. Wa kala sɛ mɔ mbali, do fɛ̃a mɔ bolo, do ogba gili tulu.

¹⁵ Nɛ kpo 'dã zɛlɛnɔ kɛ ma te sɛ ngɔ owi sɛnɛ Oisraɛlɛ ni, ma te sɛ ngɔ ombalatanɔ do opundanɔ, do osamonɔ wa kũ ngɔ wa ni, do ogele sa'denɔ, tɛ fala ɔi 'da wa ni vɛ̃.

¹⁶ 'Do nɛ, nɛ tala owinɔ wa 'bana sɛ nza kɔ ogele winɔ kɛ wa nɛa we 1 bi le Yeruzalɛmɛ ni, wa nɛ sɛ tɛ Yeruzalɛmɛ i sabɛlɛ kpo kpo, we dɔnggɔ nwa ngɔ mɔ nyanga nza vɛ̃. Nɛ wa nɛ sɛ 'bɔ i mɔ we dungu ɛngga Ɔ ti Da.

¹⁷ Kɔ fala kɛ mbe gele nu kɔnggɔ wele kpo ngɔ nù gɛ bɛ̃ we nɛ tɛ Yeruzalɛmɛ i we dɔnggɔ NWA, nɛ nde kolo tɛ́ sɛ ngɔ nùi 'da wa gɔ.

¹⁸ Nɛ fala kɛ Oezipeto wa nɛ̀ tɛ Yeruzalɛmɛ i we dungu ɛngga Ɔ ti Da gɔ, nɛ kpo 'dã zɛlɛnɔ ma ba ogele winɔ wa bɛ̃a we dungu ɛngga Ɔ ti Da ni, ma ba sɛ wa.

¹⁹ Ki ni a tɛlɛ tɛ etumbu kɛ ma kpa sɛ Oezipeto do ogele winɔ kɛ wa bɛ̃ sɛ we dungu ɛngga Ɔ ti Da gɛ a ni.

²⁰ Do 'da fala ni, nɛ gɛnɛ kɔ ngbengbe wa kpo dati mbalatanɔ ni, nɛ wa kɔmɔ sɛ ngɔ nɛ na: “Mbalata 'da Gale.” Nɛ okpana gi do mɔ kɔ Tɛmpɛloe ma hɔ sɛ santo, kpasaa nɛ́ obila kpɔ do tɔkɔ sa'denɔ wa e ma dɛ dati gbagala ni.

²¹ Nɛ okpananɔ kɔ le Yeruzalɛmɛ, tabi kɔ lenɔ ngɔ nù Yuda vɛ̃, ma hɔ sɛ santo we dɛ do to hã NWA ngɔ mɔ nyanga nza vɛ̃. Owinɔ kɛ wa tɛ sɛ we gbɛ sa'de, we dɔnggɔ do NWA ni, wa gi sɛ sa'de dɔnggamɛ 'da wa do kpananɔ ni. Kɔ ma hɔ 'da fala ni, nɛ fo sɛ 'bɔ wi be gole kɔ tɔa Tɛmpɛloe 'da NWA ngɔ mɔ nyanga nza vɛ̃ bina.