ZAKARIA 13 - WE NU GALE 1995

NWA a fo sɛ owi gba olo nu a do bɛlɛ ngɔ nùi

¹ NWA ngɔ mɔ nyanga nza vɛ̃ tɔ̃a na: “'Da fala ni ma we, nɛ fua lì ma go'do sɛ, nɛ mi fɔlɔ sɛ 'dã mɛnɔ 'da obe zã Davidi do tala winɔ kɔ le Yeruzalɛmɛ do lì ni.

² “Do 'da fala ni, nɛ mi fo sɛ kpikimanɔ ngɔ nùi, nɛ fo sɛ 'bɔ wi sa li ma bina. Nɛ mi fo sɛ wɔ dɔnggɔ kpikimanɔ kɔ sila winɔ do'do. Nɛ mi bisi sɛ 'bɔ owinɔ wa 'bili bɛlɛ na, lo a Owi gba olo nu mi Gale ni.

³ Na mɛ ni, fala kɛ wele ma ngɔ gba olo nu mi do bɛlɛ, nɛ baa a, do naa a ngboo ni, wa tɔ̃ sɛ hã a na, a wia do fio, we kɛ a kɔ̃a we ba tɛ̃ a na, ɛ a wi gba olo nu mi Gale, nɛ nde a 'bili bɛlɛ ni. 'Da fala wi ni a ma sɛ ngɔ gba olo nu mi do bɛlɛ ni, nɛ baa a do naa a ngboo ni, wa zɛ sɛ a, nɛ wa gbɛ a.

⁴ Do 'da fala ni, nɛ owi gba olo nu mi Gale do bɛlɛ, wa kpa sɛ sape gba olo nu mi, do tɔ̃ gulu yalɛnɔ 'da wa do bɛlɛ. Nɛ wa hé'dé sɛ 'bɔ gã tulu sala sa'de 'da owi gba olo nu mi Gale, takɔ wa ɔlɔ do winɔ gɔ.

⁵ Nɛ wele do wele a tɔ̃ sɛ na: ‘Mi a wi gba olo nu Gale gɔ. Mi a wi wa fɔ. Yolo ngɔ be tɛ mi gbaa sɔɛ gɛ, mi dɛ to fɔ.’

⁶ Na mɛ ni, fala kɛ wele aka wi gba olo nu mi Gale do bɛlɛ ni na: ‘Gulu daninɔ tɛ gbãlã ngu'du mɔ gɛ a ge nde?’ Nɛ a gese sɛ hã wi ni na: ‘Ngba mi wi tɔa hã ia daninɔ ni tɛ mi.’ ”

NWA ba nu a na wa gbɛ wi kpe dati winɔ 'da a

⁷ NWA ngɔ mɔ nyanga nza vɛ̃ tɔ̃a na: “Aa du kɔya, mɔ sí ngɔ, nɛ mɔ gbɛ́ wi fɔmɔ batanɔ kɛ a dɛ toe do mi ni. Mɔ gbɛ́ a, nɛ obatanɔ wa pɛsɛ sɛ ndɛ̃ ndɛ̃. “Mi NWA, mi bi sɛ owinɔ 'da mi,

⁸ nɛ bɔa mbee talɛ kɔ wa wa fe sɛ.

⁹ Nɛ mi yamba sɛ sila tala kpo mbee talɛ sanga winɔ wa 'bana nza ni, ɔ nɛ kɛ wele yamba do mɔ mbali do fɛ̃a mɔ bolo li we we fa dia nɛ zã nɛ ni, nɛ wa hɔ sɛ sa wi li mi. Na mɛ ni, nɛ wa sambala sɛ mi, nɛ mi zele sɛ wa. Nɛ mi tɔ̃ sɛ hã wa na, wa a owinɔ 'da mi, nɛ wa tɔ̃ sɛ hã mi na, mi a Gale 'da wa.”