ZAKARIA 12 - WE NU GALE 1995

NWA a kpasa sɛ Yeruzalɛmɛ do 'do nza

¹ Nɛ zélé toe kɛ NWA tumba ma hã obe Israɛlɛ gɛ. NWA ni, wi a wele kɛ a dɛa li nza, nɛ a zĩ nyanga nùi, nɛ a hã kpasi hã winɔ ni. A na:

² “Mi dɛ sɛ na, Owi Yeruzalɛmɛ wa ɔ nɛ bila dɔ̃ kɛ ma dunu do nɔ̃lɔ̃ zã 'da mi ni. Nɛ mi isi sɛ ma dɛ nu ogele winɔ vɛ̃ kɛ wa ɔ kɛ zã Yeruzalɛmɛ ni, nɛ wa nɔ sɛ ma, nɛ ma zĩ zu wa. Wa linggi sɛ Yeruzalɛmɛ, do olenɔ ngɔ nù Yuda vɛ̃.

³ Nɛ nde do 'da fala ni, mi nwa, mi dɛ sɛ na, Yeruzalɛmɛ ɔ nɛ ta kɛ ma dĩlĩ wena ni. Nɛ owinɔ kɛ wa fa sɛ we ba ma dɛ ngɔ ni, ma e sɛ dani tɛ wa. Nɛ ogele winɔ vɛ̃ wa zɔ sɛ ní, nɛ wa mba sɛ li ngba wa we bi Yeruzalɛmɛ.

⁴ Do 'da fala ni, nɛ mi dɛ sɛ na, ombalata bolonɔ 'da Owi sɛnɛ owi Yeruzalɛmɛ wa dɛ kili, nɛ li wa o. Nɛ mi vĩ sɛ 'bɔ zu osoda kũ mbalatanɔ 'da wa. Nɛ nde mi zɔ sɛ mɔ tɛ Oyuda.

⁵ Nɛ ogã wi ngɔ wa wa tɔ̃ sɛ dɛ ngbala wa na: ‘NWA Gale ngɔ mɔ nyanga nza vɛ̃ hã ngawi hã owinɔ 'da a tɛ Yeruzalɛmɛ.’

⁶ “Do 'da fala ni, nɛ mi dɛ sɛ na, ogã winɔ ngɔ nù Yuda wa ɔ nɛ nyɛa we kɛ ma te tɛ zamɔ tabi fɔ, nɛ ma bɛlɛ ma, nɛ wa amba zãa ni. Wa kumu sɛ ogele winɔ vɛ̃ kɛ zã wa ni. Nɛ owi Yeruzalɛmɛ wa 'bana sɛ tɛ ɔ dɛ kɔ le 'da wa.

⁷ “Mi NWA, mi kpasa sɛ dati a nu fɛlɛ Yuda na, da dɛ kɔ obe zã Davidi do Owi Yeruzalɛmɛ wa kpá dɔ̃lɔ̃ li gã nɛ ngɔ tala owi ngɔ nù Yuda gɔ.

⁸ Do 'da fala ni, nɛ mi nwa, mi amba sɛ zu owi Yeruzalɛmɛ vɛ̃. Nɛ gɛnɛ kɔ osulu winɔ kɔ wa ni, nɛ wa nganda sɛ nɛ́ Davidi ni. Nɛ obe zã Davidi wa kpe sɛ dati owi Yeruzalɛmɛ nɛ́ anzɛ 'da mi NWA, tabi nɛ́ mi NWA do tɛ mi ngboo ni.”

Owinɔ vɛ wa he sɛ kɔ̃a wi wa gbɛa a ni

⁹ NWA tɔ̃a na: “Do 'da fala ni, nɛ mi kumu sɛ ogele winɔ vɛ̃ kɛ wa tɛ sɛ we bi Yeruzalɛmɛ ni.

¹⁰ Mi dɛ sɛ na, obe zã Davidi do ogele winɔ kɔ le Yeruzalɛmɛ ni, wa hɔ wi dia zã, nɛ wa sambala mi. Nɛ wa lengge sɛ wi toe 'da mi kɛ wa dumu zi gbãlã ngu'du a, nɛ wa gbɛ a ni, nɛ wa he sɛ kɔ̃a a wena, ɔ nɛ kɛ wele he do kɔ̃a fio kpo bulu be tabi kuti be 'da a ni.

¹¹ Do 'da fala ni, nɛ hia kɔ̃a ma wele sɛ kɔ Yeruzalɛmɛ gboo, nɛ ma we sɛ kɔ̃ do hia kɔ̃a kɛ wa hia zi we Hadadɛ-Rimoni tɛ kɔ gbangɔlɔ̃ Megido i ni.

^12-14 Nu fɛlɛ kula kpo kpo ngɔ nù Yuda gɛ wa he sɛ kɔ̃a dɛ nu di 'da wa. Nu fɛlɛ kulanɔ ni sɛ a obe zã Davidi, obe zã Natanɛ, obe zã Levi, obe zã Simei, do tala ogele nu fɛlɛ kulanɔ. Owi wilinɔ kɔ nu fɛlɛ kula kpo kpo wa mba sɛ, nɛ wa he kɔ̃a, nɛ owukonɔ vɛ̃ wa mba tɛ mɛ 'bɔ ngba wa, nɛ wa he kɔ̃a.”