ZAKARIA 11 - WE NU GALE 1995

Ogele gã nwanɔ wa te sɛ

¹ Aa nɛ, owi Libanɛ, nɛ hũi nu ngbonɔ 'da nɛ, kɔ we te kɔ le, hã ma bɛlɛ ote sɛdrɛnɔ 'da nɛ.

² Aa nɛ, ote siprɛnɔ, nɛ zɛ́ nu nɛ, we kɛ ote sɛdrɛnɔ ma ala. Odia tenɔ ni ma 'danga vɛ̃. Aa nɛ, ogã tenɔ ngɔ nù Basanɛ, nɛ zɛ́ nu nɛ, we kɛ wa wa gaza 'da nɛ kɛ ma sanga ngbɛ ɛ ni dɛ nù vɛ̃.

³ Owi kpe dati winɔ wa tɛ ala nu wa, we kɛ dɔ̃lɔ̃ li 'da wa ma ia. Nɛ ogbɔgbɔnɔ wa tɛ o dã, we kɛ wa 'danga fala ɔinɔ 'da wa tɛ nu kolo lì Yɔrdanɛ do'do.

Zakaria kala dɔ te bɔa dɛ kɔ̃ a

⁴ NWA Gale 'da mi tɔ̃a hã mi na: “Mɔ nɛ́, kɔ mɔ hɔ wi fɔmɔ batanɔ, kɛ wa nɛ gbɛ wa ni.

⁵ Owinɔ wa oso batanɔ ni, wa 'bili gɛlɛ wa, nɛ wa la iko, wa kpá etumbu gɔ. Wa be gole mulu batanɔ ni, nɛ wa tɔ̃ na: ‘Lɛ dɔ́nggɔ́ nwa, we kɛ lɛ hɔa wi kpamɔ.’ Gɛnɛ kɔ Owi fɔmɔ batanɔ ni, wa ĩ̀ 'bako hã batanɔ gɔ.”

⁶ (Mi nwa mi tɔ́a na: “Mi ĩ́ sɛ 'bɔ 'bako hã owinɔ ngɔ nù gɛ gɔ. Mi a sɛ wa ti mbula 'da Onwanɔ 'da wa. Nɛ Onwanɔ wa 'danga sɛ nùi, nɛ nde mi kpásá sɛ wele kpo ti kɔ wa gɔ.”)

⁷ Nɛ mi Zakaria, mi hɔa wi fɔmɔ batanɔ kɛ owinɔ wa oso wa we gbɛ wa ni. Nɛ mi kala dɔ te bɔa dɛ kɔ mi. Nɛ mi sa li mbe kpo na “Diazã”, nɛ mi sa li mbee nɛ na “Mbalina”, nɛ mi la we zɔ mɔ tɛ obatanɔ.

⁸ Nɛ kɔ zɛkɛ kpo iko, nɛ mi fua owi fɔmɔ bata talɛ, we kɛ wa ngba mi do'do. Nɛ wɔ zɔ 'bɔ mɔ tɛ obatanɔ ia tɛ mi do'do.

⁹ Nɛ mi tɔ̃ hã obatanɔ na: “Mi zɔ́ sɛ 'bɔ mbé mɔ tɛ nɛ gɔ. Wanɔ kɛ wa nɛ fe tɛ mɛ fia ni, nɛ wa fe iko! Tabi wanɔ kɛ wele kɔ̃ tɛ mɛ we gbɛ wa ni, nɛ a gbɛ wa iko! Nɛ wanɔ kɛ wa 'bana sɛ do tunu li wa ni, nɛ wa gbɛ ngba wa!”

¹⁰ Nɛ mi ba dɔ te kɛ li nɛ a Diazã ni, nɛ mi gbini sanga nɛ, takɔ mi yala gba tɔkɔ kɛ NWA gba do owinɔ vɛ̃ ni.

¹¹ Na mɛ ni, mi yala gba tɔkɛ do ngba soe ni. Nɛ owi be gole batanɔ kɛ wa tɛ zɔ mɔ tɛ mi ni, wa ĩ na, NWA wila we do wala mɛ mi dɛa ni.

¹² Nɛ mi tɔ̃ hã wa na: “Fala kɛ nɛ zɔ a dia, nɛ nɛ hã mbili olo toe 'da mi hã mi. Kɔ ni gɔ, nɛ nde we bina.” Wa nɛa we zele ní, nɛ wa tɔlɔ gbãlã mbili fɛ̃a mɔ bolo 'bu nɛ talɛ, nɛ wa futa do mi.

¹³ Nɛ NWA tɔ̃ hã mi na: “Mɔ á mbili ni dɛ kɔ kpamɛnɔ kɔ tɔa Tɛmpɛloe.” Na mɛ ni, mi kala be mbili sĩ wa lengge na ma gã wena ni, nɛ mi a ma dɛ kɔ kpamɛnɔ kɔ tɔa Tɛmpɛloe.

¹⁴ 'Do nɛ, nɛ mi gbini sanga dɔ te kɛ li nɛ a Mbalina ni, takɔ mi 'danga dɛa na sanga Oyuda do Oisraɛlɛ.

¹⁵ Nɛ NWA tɔ̃ hã mi na: “Mɔ dɛ́ 'bɔ to fɔmɔ batanɔ, nɛ mɔ dɛ mɔ tɛ mɔ ɔ nɛ yɔndɔ wi ni.

¹⁶ Mba gɔ, mi tombo mbé wi fɔmɔ bata dɛ ngɔ nùi, nɛ nde a ámbá sɛ zu obatanɔ kɛ Owele wa fa we gbɛ wa ni gɔ, nɛ a fá sɛ 'bɔ obatanɔ kɛ wa yɔa ni gɔ. A á sɛ dani tɛ wa gɔ, nɛ a ha sɛ nyɔngɔmɔ hã batanɔ kɛ wa 'bana do nga tɛ wa ni gɔ. Nɛ nde a nyɔngɔ sɛ mulu obatanɔ kɛ wa dɛ nɔ wena ni, nɛ a gbini sɛ nyanga wa.

¹⁷ 'Bako do wi fɔmɔ bata kɛ a la nadalamɛnɔ 'da a iko ni. E kɔ bolo te, nɛ ma 'danga ngawi 'da a vɛ̃. Nɛ e kɔ gbali a kɛ si ngawili kɔ ma o!”