ZAKARIA 10 - WE NU GALE 1995

NWA kpua mbulu kpasa obe Israɛlɛ

¹ Nɛ áká nwa, kɔ a tombo kuti kolo kɔ sabɛlɛ hã nɛ do li zɔlɔ nɛ. Wi a NWA hã a dɛ na, gba kolo tɛ, nɛ kpalɛ li fɔnɔ 'da wele do wele ma de.

² Owinɔ wa nɛ 'da owi dɛ sɔ̃, do okpikima we aka wa do we. Nɛ nde gisa nu wenɔ 'da wa mɛ a bɛlɛ iko, nɛ ma do gulu nɛ bina. Ombe wa tɔ̃ gulu yalɛ, nɛ nde wa ɔlɔ nɛ iko, nɛ lɛnggɛ mbɔkɔ sila winɔ wa tɔ̃ ni, ma 'bɔ yala iko. Ma kɛ winɔ wa si do 'bako, nɛ wa pɛsɛ ɔ nɛ obata kɛ wa zɔlɔ wi fɔmɔ wa ni.

³ NWA tɔ̃a na: “Mi do nɔ̃lɔ̃ zã dɛ tɛ ogele winɔ wa dungu nwa ngɔ winɔ 'da mi ni. Ma kɛ mi nɛ hã etumbu hã wa. Mi NWA ngɔ mɔ nyanga nza vɛ̃, mi fɔmɔ sɛ owinɔ 'da mi, Oyuda. Nɛ mi e sɛ Oyuda ɔ nɛ ombalata bolonɔ 'da mi ni, nɛ wa bi sɛ bolo hã mi.

⁴ Nɛ Onwanɔ, do Owi kpe dati winɔ, do ogã wi ngɔ osodanɔ sɛ a Oyuda wele nɛ.

⁵ Wa nganda sɛ li bole wena, nɛ wa nɛ sɛ ngɔ owi sɛnɛ wa, nɛ wa ma wa do nyanga wa dɛ 'dɔ 'bɛ̃tɛ̃ li walanɔ. Nɛ gɛnɛ kɔ ogele soda kũ mbalatanɔ, nɛ wa nɛ sɛ ngɔ wa. We duzu kɛ mi nwa, mi fala nɛ kpo do wa li bole.

⁶ “Mi kpãlã sɛ sila Oyuda, nɛ mi kpasa sɛ Oisraɛlɛ. Mi ĩ sɛ 'bako hã wa, nɛ mi gese wa dɛ ngɔ nù olo wa. Mi be sɛ kɔ̃a zã 'da mi hã wa, nɛ ma ɔ sɛ nɛ mi bɛ̃̀ zi mbe gɛnɛ wa dati gɔ ni. Mi a NWA Gale 'da wa, mi gese sɛ nu sambalanɔ 'da wa hã wa.

⁷ Oisraɛlɛ wa ɔ sɛ nɛ onga osoda, nɛ wa dɛ sɛ yangga nɛ́ wi kɛ a nɔa dɔ̃ ni. Obe zã wa wa zɔ sɛ wa na mɛ ni, nɛ wa zɛ kaliã, nɛ wa dunu do yangga we mɛ mi NWA mi dɛa ni.

⁸ “Mi sa sɛ mɔ hã owinɔ 'da mi, nɛ mi ngɛmɛ li wa. We kɛ mi 'bili na mi gɔnɔ zu wa, nɛ wa dɔ sɛ 'bɔ nɛ́ kɛ wa zɛ́ dati ni.

⁹ Mi pɛsɛ zi wa dɛ sanga ogele winɔ, nɛ gɛnɛ kɔ wa nyɛlɛ wena ni, nɛ tɛ wa ma gba sɛ ngɔ mi. Wa do obe zã wa wa kpasa sɛ, nɛ wa kpolo sɛ 'bɔ tɛ wa dɛ ngɔ nùi 'da wa.

¹⁰ Mi fo sɛ wa ngɔ nù Ezipeto do Asiri, nɛ mi gese wa dɛ ngɔ nùi 'da wa. Mi gese sɛ 'bɔ wa dɛ ngɔ nù Galadɛ do Libanɛ, nɛ nde wa dɛlɛ sɛ, nɛ wa nɛ ngɔ nùnɔ ni.

¹¹ 'Da fala wa la sɛ do 'dɔ lì ngamɔ, nɛ mi NWA, mi gbɛsɛ sɛ ngele lì, nɛ lì Nilɛ ma ɔ̃sɔ̃ sɛ na nù. Gã zui 'da Oasiri ma si sɛ nù, nɛ ngawi 'da Oezipeto sɛ 'bɔ bina.

¹² Mi hã sɛ ngawi hã owinɔ 'da mi. Wa dɔnggɔ sɛ mi, nɛ wa zele nu mi. Mi NWA, mi tɔ̃a ni.”