ZAKARIA 1 - WE NU GALE 1995

NWA sa mɔ hã obe Israɛlɛ na wa kpolo tɛ wa dɛ 'da a

¹ Do zɛkɛ 'da ngbɛ'dɛ'dɛ, kɔ bɔa sabɛlɛ dɛa to nwa 'da Dariusi tɛ ngɔ nù Pɛrsɛ, nɛ NWA Gale wila we hã Zakaria, wi gba olo nu a. Zakaria zi a be 'da Berekia, nɛ a 'bɔ a be yaa Ido.

^2-3 NWA tumba Zakaria na a nɛ, kɔ a tɔ̃ hã obe Israɛlɛ na: “Mi NWA ngɔ mɔ nyanga nza vɛ̃, mi tɔ̃ hã nɛ na, nɛ kpóló tɛ nɛ dɛ 'da mi, nɛ mi kpolo sɛ tɛ mi 'da nɛ. Zɛ́ dati, zã mi nɔ̃lɔ̃ zi dɛ tɛ oyaa nɛ wena.

⁴ Kɔ nɛ tɛ bà dɛa mɔ tɛ oyaa nɛ gɔ. Owi gba olo nu mi wa mbisa zi wa do zu li mi na, wa la fala 'dã dɛa mɔ tɛ wa, do 'dã linggamɔ zu wa. Nɛ nde wa zèlè zi nu mi gɔ.

⁵ Nɛ oyaa nɛ do Owi gba olo nu mi ni, wa 'bànà 'bɔ nza gɔ.

⁶ Nɛ nde mbulanɔ 'da mi ni ma 'bana fai. Oyaa nɛ wa bɛ̃a mbulanɔ do mbisa wenɔ 'da mi kɛ mi hã zi ma hã wa do wala 'da owi gba olo nu mi kɛ wa dɛ zi to 'da mi ni. Nɛ do Sɔkpɔ nɛ, nɛ oyaa nɛ wa kpa si olo nɛ, nɛ wa kpula dɛa mɔ tɛ wa. Nɛ wa ĩ zi na mi NWA, mi hã etumbu hã wa do 'da dɛa mɔ tɛ wa, ɔ nɛ kɛ mi 'bili zi ni.”

NWA BIA OMƆ NGBƐ'DƐ'DƐ LI ZAKARIA Zakaria zɔa ombalata

⁷ Do zɛkɛ 'da 'bu ngɔ nɛ kpo, tabi zɛkɛ Sɛbatɛ, kɔ̃ nɛ 'bu nɛ bɔa ngɔ nɛ nalɛ, do kɔ bɔa sabɛlɛ dɛa to nwa 'da Dariusi, nɛ nwa wila we hã Zakaria, be 'da Berekia, kɛ a 'bɔ a be yaa Ido ni.

⁸ Nɛ Zakaria tɔ̃a gulu nɛ na: Mi ɔa yala do tũ, nɛ mi zɔ mɔ do li yalɛ. Mi zɔa wele, nɛ nde a kũ ngɔ fila mbalata, nɛ a yula dɛ sanga odia te do kɔ gbangɔlɔ̃. Nɛ ogele mbalata do 'do a. Tɛ ombe a fila, nɛ tɛ ombe ɔ ngoo nɛ́ zɛ̃ we ni, nɛ tɛ ombe a fɛ̃a.

⁹ Nɛ mi aka anzɛ na: “Aa nwa, gulu ombalatanɔ gɛ a ge nde?” Nɛ a gese hã mi na: “Mi nɛ be gulu wa hã mɔ.

¹⁰ NWA Gale tumba wa na wa nɛ, kɔ wa yɛnggɛ ngɔ nùi we zɔ ma.”

¹¹ Nɛ owi kũ mbalatanɔ ni wa tɔ̃ hã anzɛ ni na: “Lɛ yɛngga ngɔ nùi vɛ̃, nɛ lɛ kpa na, fo bolo bina. Winɔ wa dungu fioo iko.”

¹² Nɛ anzɛ tɔ̃ na: “Aa NWA ngɔ mɔ nyanga nza vɛ̃, zã mɔ nɔ̃lã dɛ tɛ owi Yeruzalɛmɛ do owi kɔ gele lenɔ ngɔ nu Yuda di ni gbaa 'do 'bu sabɛlɛ sambo. Kɔ mɔ nɛ ĩ 'bako hã wa soe ki nge nde?”

¹³ Nɛ NWA gisa olɛnggɛ kpã sila hã anzɛ ni.

¹⁴ Nɛ anzɛ ni tɔ̃ hã mi na, mi gba nu lɛnggɛ kɛ NWA ngɔ mɔ nyanga nza vɛ̃ tɔ̃a ni na: “Mi do gã kɔ̃a zã we owi Yeruzalɛmɛ, le 'da mi, nɛ kɔ̃a zã ni la mɔ vɛ̃.

¹⁵ Nɛ nde mi do nɔ̃lɔ̃ zã wena dɛ tɛ ogele winɔ kɛ wa kpa dia dungu ni. Mba gɔ, 'da fala zã mi ndua zi nɔ̃lɔ̃ dɛ tɛ obe Israɛlɛ ni, nɛ ogele winɔ ni wa hã ngamɔ hã obe Israɛlɛ do 'da nɛ wena.

¹⁶ Ma kɛ mi NWA ngɔ mɔ nyanga nza vɛ̃, mi tɔ̃a na, mi kpolo sɛ 'bɔ tɛ mi dɛ kɔ le Yeruzalɛmɛ, takɔ mi be dia zã 'da mi hã owi Yeruzalɛmɛ. Wa dɛ sɛ 'bɔ Tɛmpɛloe 'da mi dɛ olo nɛ, nɛ wa 'dafa 'da le.”

¹⁷ Nɛ anzɛ ni tɔ̃ 'bɔ hã mi na, mi gba 'bɔ mbe olo nu NWA na: “Mi NWA ngɔ mɔ nyanga nza vɛ̃, mi dɛ sɛ na lenɔ 'da mi kpa dia dungu. Mi saka sɛ 'bɔ le Yeruzalɛmɛ do mɔ mi, nɛ mi gala sɛ ma.”