YUDA 1 - WE NU GALE 1995

¹ Wi a mi Yuda, wi dɛa toe 'da Yezu Kristo, nɛ mi 'bɔ a nya Zake. Mi kɔmɔ mbɛti gɛ hã nɛ, owinɔ kɛ Baa lɛ Gale kɔ̃a gɛnɛ nɛ, nɛ a saka nɛ do winɔ 'da a, nɛ Yezu Kristo zɔ mɔ tɛ nɛ ni.

² E kɔ Gale ĩ 'bako hã nɛ, nɛ a hã gɛ̃a dungu do kɔ̃a zã hã nɛ, nɛ ma la mɔ vɛ̃.

Owi be we bɛlɛnɔ

³ Aa oyali ngba mi, mi zi do wɔ wena we kɔmɔ mbɛti gɛ hã nɛ, takɔ mi tɔ̃ mbe gulu kpasi kɛ Gale hã ma hã lɛ do nɛ ni. Nɛ mi zɔa na, mi wia we kɔmɔ mbɛti gɛ hã nɛ, we hã kpã sila hã nɛ, takɔ nɛ bi nganda ngɔ we nu Gale, kɛ a hã ma hã owinɔ 'da a, nɛ ma yápá sɛ gɔ ni.

⁴ Mi tɔ̃ we gɛ hã nɛ, we kɛ ombe wele kɛ wa dɔ́nggɔ́ Gale gɔ ni, wa lia sanga nɛ do 'dã hã, nɛ wa kpolo lɛnggɛ dia zã 'da Gale kɛ a bia ma hã lɛ ni. Wa kpolo ma, takɔ wa yolo dɛ ngɔ nɛ we dɛ mɔ sape kɛ zã wa kɔ̃a ni. Nɛ wa bɛa gɛnɛ Yezu Kristo, kɛ a zu a kpo a Wele lɛ, do Nwa 'da lɛ ni. Nɛ nde wa kɔmɔ zɛ́ li wa belee ia na, Gale a fi sɛ wa li ngbangga.

⁵ Gɛnɛ kɔ nɛ ĩ ti wenɔ kɛ mi nɛ tɔ̃ hã nɛ gɛ ĩ, nɛ nde mi kɔ̃a we gba 'bɔ ta zu nɛ ngɔ nɛ. Nwa Gale a kpasa zɛ́ obe Israɛlɛ tɛ ngɔ nù Ezipeto, nɛ a fua wa dɛ nza. Nɛ 'do nɛ, nɛ a gbɛa 'bɔ wanɔ kɛ wa kɔ̃̀ zi we nu a gɔ ni.

⁶ Nɛ lénggé anzɛnɔ, kɛ wa dɛ̀ zɛ́ yangga tonɔ Gale hã hã wa ni gɔ, nɛ wa la fala 'da wa do'do ni. Gale a wa kɔ gba tũ do ti nù, nɛ a ɛnzɛ wa do dɔkpɔ gbaa we 'bɔ 'da ngba soe 'bili ngbangga.

⁷ Nɛ nɛ lénggé 'bɔ le Sodɔmɛ do Gomɔrɛ, do ombe gele lenɔ kɛ zã nɛ ni. Owi kɔ lenɔ ni wa hã zi 'bɔ tɛ wa we dɛ mɔ sape kpasaa ɔ nɛ anzɛnɔ ni, nɛ wa dɛa 'dã mɛnɔ kɛ wele wè tɛ dɛ ma gɔ ni. Kɔ wa tɛ kpa etumbu tɛ li gba nyɛa we kɛ ma bí sɛ fala kpo gɔ ni. Ki ni a mbisa we we owinɔ vɛ.

⁸ Kɔ nɛ zɔ́, owinɔ wa lia sanga lɛ gɛ, wa tɛ dɛ 'bɔ kpo kpo 'dã mɛnɔ ni. Wa yala zu wa, nɛ yalɛnɔ ni tombo wa we dɛ 'dã mɔ kɛ ma 'danga kili tɛ wa wele nɛ ni. Nɛ wa zɔ ngawi 'da Gale li wa yala iko, nɛ wa dã anzɛnɔ kɛ wa do dɔ̃lɔ̃ li ni.

⁹ Gɛnɛ kɔ Mikaɛlɛ ngboo, kɛ a a nwa ngɔ oanzɛnɔ vɛ̃ ni, nɛ nde a dã̀ zi Satana gɔ. 'Da fala kɛ Mikaɛlɛ wɛlɛ zɛ́ zu wɔlɔ Mɔizɛ do Satana ni, nɛ a bà zɛ́ tɛ̃ dɛ ngɔ gɔ, nɛ a tɔ̃ zɛ́ 'dã we hã Satana gɔ. Nɛ nde a tɔ̃a zɛ́ hã a na: “E kɔ Nwa Gale do tɛ̃ a a hã etumbu hã mɔ!”

¹⁰ Kɔ owinɔ gɛ, wa tɔ̃ 'dã we tɛ omɛnɔ kɛ wa ĩ́ ti gulu nɛ gɔ, nɛ wa dɛ mɛnɔ do ta zu wa iko ɔ nɛ osa'de ni. Kɛ wa dɛ ni, wa 'danga kili tɛ wa wele nɛ.

¹¹ 'Bako do wa! Mba gɔ, wa ba wala 'da Kaina. Wɔ mbili tombo wa we dɛ mɔ bɛlɛ, ɔ nɛ kɛ Balamɛ dɛa zi ni. Nɛ Gale gbɛa wa we duzu nga zu 'da wa, ɔ nɛ kɛ a gbɛa zi Kore ni.

¹² 'Da fala nɛ mba li ngba nɛ we nyɔngɔ mɔ dɛa na, kɔ wa le sanga nɛ, nɛ dɛa mɔ tɛ wa hã sape hã nɛ wena. Mba gɔ, wa dɛ nga'ba, nɛ wa lengge tati a kɔ zã wa wele nɛ iko, nɛ sape li wa bina. Wa ɔ nɛ lĩ kolo kɛ ma tũ kpã kpã, nɛ bũi kala ma, nɛ nde kole tɛ́ gɔ ni. Wa ɔ 'bɔ nɛ tenɔ, kɛ gɛnɛ kɔ zɔlɔ wala tenɔ, nɛ nde ma wálá gɔ ni. Wa ɔ nɛ tenɔ kɛ ma mbi do liã nɛ, nɛ ma kolo vɛ ni.

¹³ Wa ɔ nɛ ngele gba lì ni, wa dúngú zirr gɔ, nɛ 'dã mɛnɔ 'da wa ma be tɛ́ ɛ nza ɔ nɛ ngɔnzɔlɔ ndi kɛ fua lì a ma nu kolo lì ni. Wa ɔ́ nɛ osɔla kɛ wa yɔa wala olo wa do'do ni. Gale 'dafa fala kɔ gba tũ hã wa, nɛ wa 'bana sɛ dɛ di ni fai ndɔti nɛ bina.

¹⁴ Zɛ́ belee, nɛ Henɔkɛ, wi sambo nu fɛlɛ kula kɛ ma ndua do Adamu ni, a tɔ̃a zɛ́ we 'da owi be we bɛlɛnɔ na: “Nɛ ká mɔ, Nwa Gale tɛ tɛ ma fala nɛ kpo do gba gili anzɛnɔ 'da a.

¹⁵ A 'bili sɛ we 'da owinɔ vɛ̃, nɛ a fi sɛ winɔ kɛ wa bɛa gɛnɛ we nu a ni li ngbangga, we duzu 'dã dɛa mɛnɔ 'da wa, do 'dã wenɔ kɛ wa tɔ̃a do zu li a ni.”

¹⁶ Winɔ ni wa lungu we, nɛ wa he tɛ wa fai, nɛ wa dɛ tati a 'dã mɛnɔ kɛ zã wa kɔ̃a ni. Wa wele we do wali, nɛ wa tɛmbɛlɛ owinɔ we kpa mɔ kɔ̃ wa.

Mbisa wenɔ

¹⁷ Nɛ nde nɛ, oyali ngba mi, ta zu nɛ tɛ èlè ngɔ wenɔ kɛ Owi nɛ tonɔ 'da Nwa 'da lɛ Yezu Kristo, wa mbisa zi do nɛ ni gɔ.

¹⁸ Wa tɔ̃a zi hã nɛ na: “Do ndɔti tũnɔ, dati kɛ Nwa nɛ tɛ sɛ nɛ ni, nɛ mbe winɔ wa hɔ sɛ, nɛ wa mɔmɔ sɛ nɛ, nɛ wa dɛ sɛ mɛnɔ vɛ kɛ 'dã wɔ kɔ zã wa kɔ̃a ni.”

¹⁹ Winɔ ni wa fi sɛ sɛnɛmɔ sanga winɔ na, wa kɛ sanga tɛ ngba wa. Linggamɔ kɔ zã wa a kɛ 'da Owi nù iko, nɛ fo Hi Wi 'da Gale kɔ wa bina.

²⁰ Nɛ nde nɛ, oyali ngba mi, nɛ dɛ́ nganda na, kɔ̃a we 'da nɛ kɛ ma santo ni ma gã dɛ dati. Nɛ nɛ sámbálá Gale do ngawi 'da Hi Wi Santo.

²¹ Nɛ 'dáfá dɛa mɔ tɛ nɛ we do kɛ 'da winɔ kɛ wa ĩ na, Gale kɔ̃a gɛnɛ lo wena ni. Nɛ dɛ́ ni fai gbaa we 'bɔ do 'da ngba soe kɛ Nwa 'da lɛ Yezu Kristo a ĩ sɛ do 'bako hã lɛ, nɛ a hã kpasi kɛ ma é sɛ gɔ ni hã lɛ ni.

²² Nɛ ĩ́ 'bako hã Owi ba kafinɔ.

²³ Wa ɔ nɛ kɛ wa tia li we ni, kɔ nɛ fó wa li we do'do. Nɛ nde ombe nɛ, nɛ ĩ́ 'bɔ 'bako hã wa, nɛ li nɛ sɔ̃, nɛ nɛ sɛnɛ mɛnɔ wa dɛ ni. Nɛ nɛ tɛ 'bè tɛ tulunɔ 'da wa kɛ ma ba ndi tɛ 'dã mɛnɔ ni gɔ.

Lɛ dɔ́nggɔ́ Gale

²⁴ Lɛ dɔ́nggɔ́ Gale, kɛ a do ngawi we zɔ mɔ tɛ nɛ na, dɔ nɛ té gɔ ni. A a wi kɛ a fo 'dã mɔ kɔ nɛ vɛ̃, nɛ a 'dafa nɛ na, nɛ we tɛ hɔ dati yele ngbala 'da a do yangga vɛ.

²⁵ Lɛ dɔ́nggɔ́ Gale, kɛ a a Gale zu a kpo, nɛ a kpasa lɛ do wala 'da Nwa 'da lɛ Yezu Kristo ni. E kɔ winɔ wa dɔnggɔ a, nɛ wa hã dɔ̃lɔ̃ li hã a! A do ngawi, nɛ a dungu sɛ nwa fai. Ma ɔ zɛ́ ni dati gbaa we hɔ sɔɛ gɛ, nɛ ma sɛ 'bɔ na mɛ ni kɔ sabɛlɛ do sabɛlɛ! Amɛ.