Yozue 8 - WE NU GALE 1995

Obe Israɛlɛ wa ba le Ai

¹ Nɛ NWA tɔ̃ hã Yozue na: “Mɔ tɛ mbɔkɔ gɔ, nɛ mɔ tɛ dɛ̃ 'bɔ kili gɔ. Mɔ kálá sodanɔ 'da mɔ vɛ̃, kɔ mɔ nɛ́ do wa, we bi le Ai. Mɔ zɔ́, mi 'dolo nwa ngɔ le Ai do winɔ 'da a hã mɔ, nɛ mi ba le do nùi 'da a hã mɔ.

² Ma wia na, mɛ kɛ mɔ dɛa do le Yeriko do nwa ngɔ nɛ ni, mɔ dɛ́ 'bɔ ma do le Ai do nwa ngɔ nɛ. Nɛ nde mɔ do sodanɔ, nɛ wia we kala odia mɛnɔ, do onadalamɛnɔ kɛ nɛ kpa sɛ kɔ le ni do mɔ́ nɛ. Kɔ mɔ nɛ́, nɛ mɔ usu mbe kɔ sodanɔ 'da mɔ 'do le, takɔ wa bi sɛ ma do gbanga nɛ.”

³ Yozue zila ní, nɛ a 'dafa na, a nɛ do sodanɔ 'da a vɛ̃ tɛ Ai i. A saka onwa bolo 'bu koto talɛ sanga owinɔ 'da a, nɛ a tombo wa do tũ.

⁴ Nɛ a tɔ̃ hã wa na: “Nɛ nɛ́, kɔ nɛ usu tɛ nɛ dɔ̃ɔ do le Ai, nɛ nɛ 'bɔ dɛ di ni we bi ma.

⁵ Nɛ mi do tala owinɔ 'da mi, lɛ nɛ sɛ, nɛ lɛ kɔlɔ do le. Kɔ fala kɛ owi Ai wa tɛ we bi lɛ nde, nɛ lɛ kifi sɛ 'do lɛ hã wa, nɛ lɛ yu nɛ́ kɛ zi ni.

⁶ Nɛ wa lengge sɛ na, lɛ yu wa nɛ́ kpo kɛ zi ni ia. Hã wa ndaka 'do lɛ, nɛ lɛ yu sɛ do hã na, wa tɛ 'do lɛ, hã wa nyɛlɛ do le.

⁷ Do 'da fala ni, nɛ nɛ hɔ́ nza, nɛ nɛ ba le. We kɛ NWA Gale 'da lɛ hã le ni hã lɛ ia.

⁸ Kɔ fala nɛ ba le, nɛ nɛ fi we tɛ nɛ, ɔ nɛ kɛ NWA ba do nu a ni. Ma wia na, nɛ dɛ kɛ vɛ̃ mi tɔ́a hã nɛ ni.”

⁹ Olo we ni, nɛ Yozue tumba onwa bolonɔ dɛ fala usu tɛ wi kɛ wa saka ni. Wa nɛa, nɛ wa usu tɛ wa kɛ zã le Ai, do si 'biti gɛ̃a wese. Fala ni, mɛ a ngbala le Ai do Betɛlɛ. Nɛ do tũi ni, wa ɔa dɛ di ni. Nɛ Yozue do tala sodanɔ wa 'dafa gele fala, nɛ wa ɔ nɛ.

¹⁰ Fala sa titole belee, nɛ Yozue ngɛmɛ li sodanɔ 'da a. Nɛ a do okpasa winɔ wa kpe dati sodanɔ we nɛ Ai i.

¹¹ Yozue do sodanɔ wa nɛa, nɛ wa yolo nù si dati gã nu ngbo le Ai, do si gbãlã ngɔ, nɛ wa 'dafa te wa dɛ di ni. Nɛ ngbala wa do le mɛ zi a gbangɔlɔ̃.

¹² Yozue saka Owele koto mɔlɔ, nɛ a ba nu a hã wa na, wa usu tɛ wa dɛ ngbala le Ai do Betɛlɛ si 'biti gɛ̃a wese.

¹³ Gba gili sodanɔ wa 'dafa zi fala ɔi 'da wa dɔ̃ɔ do Ai do si gbãlã ngɔ, nɛ ombe nɛ wa ɔa zi do si 'biti gɛ̃a wese. Nɛ Yozue ɔa kɛ 'da a do tũi ni kɔ gbangɔlɔ̃ i.

¹⁴ Fala sa titole, nɛ nwa ngɔ le Ai zɔ obe Israɛlɛ. A nɛa we zɔ wa ni, nɛ a wɛlɛ tɛ̃ a we hɔ nza kɔ le do sodanɔ 'da a vɛ̃, we bi obe Israɛlɛ dɛ kpo kpo fala zi dati, si kɔ gbangɔlɔ̃ lì Yɔrdanɛ ni. Nɛ nde a ĩ̀ na, mbe obe Israɛlɛ wa bi sɛ a do 'do a nga gɔ.

¹⁵ Nɛ Yozue do winɔ 'da a wa kpolo tɛ wa 'do, nɛ wa yu dɛ zamɔ, si 'biti li gba zɔ̃ i.

¹⁶ Nɛ nwa ngɔ le Ai, sa mɔ hã owi wilinɔ kɔ le ni vɛ̃, we ndaka obe Israɛlɛ. Na mɛ ni, nɛ wa ndaka 'do wa gbaa, nɛ wa nyɛlɛ do le.

¹⁷ Nɛ nde wa là mbe wi wili kpo olo wa, we bi ngɔ le gɔ. Wa vɛ̃ wa ndaka 'do obe Israɛlɛ, nɛ nu le 'bana do fĩ nɛ gbangba tala.

¹⁸ Do 'da fala ni, nɛ nwa tɔ̃ hã Yozue na: “Mɔ kúsú sɛlɛ 'da mɔ ngɔ, nɛ mɔ be nu nɛ dɛ ngɔ Ai, we kɛ mi nɛ 'dɔlɔ le ni hã mɔ.” Nɛ Yozue dɛa kɛ vɛ̃ NWA tɔ̃a hã a ni.

¹⁹ Kɔ 'da fala Yozue nɛa we kusu sɛlɛ dɛ ngɔ ni, nɛ sodanɔ 'da a kɛ wa usu sɔ tɛ wa 'do le i ni, wa kulu ngɔ fala kpo, nɛ wa yu gbaa, nɛ wa le dɛ kɔ le i. Wa ba le, nɛ wa fi we tɛ nɛ do ti.

²⁰ Kɔ owi Ai wa nɛa we ka mɔ 'do wa, nɛ wa zɔ zɛ̃ we kɛ ma kutu dɛ li nza i ni. Hã wa nɛ ka mɔ, nɛ nde fo mbé gele wala na, wa yu nɛ bina, we kɛ obe Israɛlɛ kɛ wa yu sɔ dɛ li gba zɔ̃ i ni, wa kpula tɛ wa, we bi wa.

²¹ Mba gɔ, Yozue do owinɔ 'da a wa nɛa we zɔ na, tala osoda Israɛlɛ kɛ wa usu tɛ wa 'do le ni, wa ba ma, kɔ wa fi we tɛ nɛ ni, nɛ wa siki li wa dɛ tɛ owi Ai, nɛ wa ma ngɔ gbɛ wa.

²² Nɛ obe Israɛlɛ kɛ wa ba le Ai ni, wa tɛ we kpa ngba wa do onya wa, we bi owi Ai. Na mɛ ni, nɛ osoda Israɛlɛ, wa zĩ owi Ai takpa, nɛ wa gbɛ wa vɛ̃. Wele kpo kpàsà zi li bole ni gɔ.

²³ Nɛ obe Israɛlɛ wa ba nwa ngɔ le Ai do tunu li a, nɛ wa nɛ do a hã Yozue.

²⁴ Obe Israɛlɛ wa gbɛa owi Ai vɛ̃ dɛ li zɔ̃ɛ kɛ wa ndaka sɔ 'do wa dɛ tɛ nɛ ni. 'Do nɛ, nɛ wa kpolo tɛ wa dɛ kɔ le i, nɛ wa gbɛ 'bɔ tala winɔ, kɛ wa 'bana sɔ i mɔ ni vɛ̃.

^25-26 Yozue bia nu sɛlɛ 'da a kɛ a kusu ngɔ ni dɛ ngɔ Ai gbaa na, owi Ai wa kumu vɛ̃ sɛ nɛ de. Nɛ owinɔ ni wa fia vɛ̃ do wese ni, wa zi a owele koto 'bu ngɔ wa bɔa.

²⁷ Nɛ obe Israɛlɛ, wa kala nadalamɛnɔ do mɛnɔ kɛ wa kpa kɔ le ni do mɔ wa, ɔ nɛ kɛ nwa tɔ̃a hã Yozue ni.

²⁸ Nɛ Yozue do owinɔ 'da a, wa dɔa le, nɛ ma ngutu gbulu gbulu, nɛ ma kifi li go. Nɛ ma 'bana ni tia do sɔɛ gɛ.

²⁹ 'Do nɛ, nɛ wa gãlã nwa ngɔ le Ai nu te, nɛ wa gbɛ a. A fia, nɛ wɔlɔ a 'bana dɛ di ni gbaa gɛ̃a wese. Kɔ ma hɔa gɛ̃a wese, nɛ Yozue ba nu a na, wa zumu wɔlɔ a, kɔ wa da ma dɔ̃ɔ do nu ngbo le, nɛ wa ngɛmɛ gili ota dɛ ngɔ a. Nɛ ma 'bana dɛ di ni fai tia do sɔɛ gɛ.

Yozue tɔlɔ 'buku mbula 'da Mɔizɛ hã winɔ

³⁰ Dɛ 'do ki ni, nɛ Yozue ba nu a hã winɔ 'da a na, wa kala ta, nɛ wa dɛ do gbagala ngɔ kala Ebalɛ, we dɔ do sa'de hã NWA Gale 'da wa obe Israɛlɛ.

³¹ Nɛ wa kala ta, nɛ nde wa sɛ̀ zi ma sɛa gɔ. We kɛ wa kɔma kɔ 'buku mbula 'da Mɔizɛ, wi dɛa to 'da Gale na, wa tɛ dɛ gbagala hã Gale do ta kɛ wa sɛa do mɔ bolo ni gɔ. Wa dɛa gbagala ni do'do, nɛ wa dɔ osa'de hã NWA Gale, nɛ wa gbɛ 'bɔ sa'de hã a we be dɛa na.

³² Nɛ ngɔ kala i, Yozue ba mbula kɛ Mɔizɛ dɛa zi ma ni, nɛ a kɔma ma dɛ ngɔ ta, dɛ gbali obe Israɛlɛ ni.

³³ Obe Israɛlɛ do owi gɔnɔ wenɔ, do okpasa winɔ, do okumunɔ 'da wa, wa mba fala nɛ kpo do ogele winɔ, kɛ wa ɔ zi sanga wa ni, nɛ wa vɛ̃ wa fi Sanduku Gba Tɔkɛ 'da Gale dɛ gbogbo, nɛ wa yolo dɛ dati onganga levitɛnɔ kɛ wa ba zi ma ni. Nɛ kpo mbe bɔa kɔ owinɔ, wa siki 'do wa dɛ ngɔ kala Garizimɛ, nɛ tala nɛ wa siki 'do wa dɛ ngɔ kala Ebalɛ. Wa dɛa ni, we kɛ Mɔizɛ, ba zi nu a na, 'da fala onganganɔ wa wele do nu wa tɛ winɔ ni, nɛ wa yolo na mɛ ni.

³⁴ Wa yula ni do'do, nɛ Yozue tɔlɔ 'buku mbula 'da Mɔizɛ hã wa. Nɛ a tɔlɔ tɛlɛ tɛ kɛ onganganɔ wa wele sɛ do nu wa, do tɛlɛ tɛ kɛ wa fɔmbɔ sɛ do wele, ɔ nɛ kɛ ma kɔ 'buku mbula ni.

³⁵ Yozue tɔlɔ wenɔ kɔ 'buki vɛ̃, nɛ a là mɔ kpo gɔ. A tɔlɔ dɛ dati owi wilinɔ vɛ̃, mba do owukonɔ, do obenɔ, do ogele winɔ kɛ wa ɔ zi sanga obe Israɛlɛ ni.