Yozue 7 - WE NU GALE 1995

Akanɛ dɛa 'dã mɔ

¹ NWA ba zi nu a hã obe Israɛlɛ na, wa 'danga le Yeriko, do mɛnɔ kɔ nɛ ni vɛ̃. Nɛ nde ombe sanga wa wa dɛ̃ mbula olo nu NWA gɔ. Mbe wele kpo, li a a Akanɛ, a kala ombe mɛnɔ do mɔ́ a. We duzu ma, nɛ dã ba NWA dɛ tɛ obe Israɛlɛ wena. Akanɛ zi a nu fɛlɛ Zera, kɔ nu kpala Yuda. A a be 'da Karmi, nɛ a 'bɔ a be yaa a Zabdi.

² Wa 'bana tɛ Yeriko, nɛ Yozue tombo owi miã bɔa na, wa nɛ, hã wa zɔ le Ai, do lenɔ kɛ zã nɛ ni. Ai ma dɔ̃ɔ do Betɛlɛ, tɛ si 'biti gba wese. Ma nyɛ̀lɛ̀ do le Bɛtɛ-Avɛnɛ gɔ. Nɛ owinɔ wa nɛa nɛ́ kɛ Yozue tɔ́a ni. Nɛ wa si,

³ nɛ wa tɔ̃ hã Yozue na: “Ai mɛ a gã le gɔ. Ma wè na mɔ tombo sodanɔ 'da lɛ vɛ̃ we bi le ni gɔ. Mɔ tombo tati a osoda koto bɔa tabi talɛ, nɛ ma we nɛ.”

⁴ Na mɛ ni, nɛ Yozue tumba osoda Israɛlɛ dɔ̃ɔ do koto talɛ we bi le Ai, hã wa ba ma. Wa nɛa we hɔ i mɔ, nɛ owi Ai wa ndaka wa, nɛ wa yu.

⁵ Nɛ wa ndaka 'dɔkɔlɔ wa fai, yolo do nu ngbo le we zĩlĩ dɛ Sebarimɛ, nɛ wa gbɛa obe Israɛlɛ 'bu wa talɛ ngɔ wa gazɛlɛ. Obe Israɛlɛ wa nɛa we zɔ ní, nɛ sila wa gɔnɔ zurr, nɛ wa mbɔkɔ vɛ̃.

⁶ Nɛ Yozue do okumu Israɛlɛ wa ɛ̃a tulu tɛ wa do 'bako. Nɛ wa ndɔ bũ zu wa, nɛ wa te nzɛlɛ dɛ dati Sanduku Gba Tɔkɛ 'da NWA. Nɛ wa ɔa dɛ di ni gbaa gɛ̃a wese.

⁷ Nɛ Yozue ma ngɔ sambala Gale do nga gɛlɛ na: “Aa NWA Gale! Gulu kɛ mɔ dɛa na, lɛ kũ dɛ kulu lì Yɔrdanɛ nga we ge nde? Mɔ dɛa ni takɔ mɔ 'dɔlɔ lɛ hã Oamori na, wa gbɛ lɛ nde? Ma dia sɔ fɛ̃ na, lɛ 'bana dɛ kulu lì 'di.

⁸ Aa NWA, osodanɔ 'da lɛ wa yu owi sɛnɛ lɛ. Kɔ mi nɛ tɔ̃ 'bɔ na ge nde?

⁹ Fala kɛ Okanana do ogele winɔ ngɔ nùi gɛ, wa zele we nɛ, nɛ wa mba sɛ ngba wa we zĩ lɛ takpa, hã wa gbɛ lɛ vɛ̃. Kɔ wa dɛ ní, nɛ sako li mɔ ma 'dángá sɛ sanga owinɔ vɛ̃ gɔ nde?”

¹⁰ Nɛ NWA gisa hã Yozue na: “Mɔ kúlú ngɔ! Gulu kɛ mɔ te nzɛlɛ we ge nde?

¹¹ Obe Israɛlɛ wa dɛa 'dã mɔ. Mi ba zi nu mi hã wa na, wa 'danga mɛnɔ kɔ le Yeriko vɛ̃. Nɛ nde wa dɛ̃ mbula ni gɔ. Wa zũ mbe mɛnɔ kɔ le, nɛ wa usu ma do mɔ wa.

¹² Gã gulu kɛ wa wè tɛ nɛ ngɔ owi sɛnɛ wa gɔɛ gɛ, ma hã ni. Wa 'danga we 'da wa do tɛ wa wele nɛ ngboo. Na mɛ ni, wa yu sɛ owi sɛnɛ wa fai. Ma wia na, nɛ 'danga mɛnɔ kɛ mi bɛ̃a na, nɛ tɛ bà gɔ ni. Kɔ fala kɛ nɛ 'dàngà ma gɔ, nɛ nde mi sɛ 'bɔ 'do nɛ bina.

¹³ Kɔ mɔ kúlú ngɔ, hã mɔ ba nu mɔ hã owinɔ na, wa fɔlɔ tɛ wa, we hɔ sa wi li mi. Nɛ wa 'dafa tɛ wa, we yolo sɛ dati mi bindɛ. Hã mɔ zélé we kɛ mi NWA Gale 'da nɛ obe Israɛlɛ, mi tɔ̃ hã nɛ gɛ! Nɛ, obe Israɛlɛ, mi hã zi mbula hã nɛ we 'danga mɛnɔ kɔ le Yeriko vɛ̃. Nɛ nde nɛ kala mbe mɛnɔ kɛ mi bɛ̃a zi na, nɛ tɛ kàlà gɔɛ ni. Kɔ fala kɛ nɛ 'dàngà omɛnɔ ni gɔ, nɛ nde nɛ wé sɛ we nɛ ngɔ owi sɛnɛ nɛ gɔ.

¹⁴ We duzu ma, hã bindɛ do titole, nɛ nu kpala kpo kpo wa hɔ sɛ dati mi, nɛ nu kpala kɛ mi be sɛ kɔ̃ mi tɛ nɛ ni, wa ngbɔ sɛ dɛ dati. Kɔ nu kpala ni, nu fɛlɛ wele kpo do kpo wa hɔ sɛ. 'Do nɛ, nɛ nu fɛlɛ wi kɛ mi be sɛ kɔ̃ mi tɛ nɛ ni, wa ngbɔ sɛ dɛ dati. Kɔ nu fɛlɛ wi ni, nu fɛlɛ kula kpo do kpo wa hɔ sɛ. Nɛ nu fɛlɛ kula kɛ mi be sɛ kɔ̃ mi tɛ nɛ ni, wa ngbɔ sɛ dɛ dati. Nɛ kɔ nɛ ni, wele kpo do kpo a hɔ sɛ.

¹⁵ Na mɛ ni, mi be sɛ kɔ̃ mi tɛ wi ba mɛ kɛ mi bɛ̃a zi na, nɛ tɛ bà gɔ ni. We duzu kɛ a bɛ̃a we dɛ mbula ni, a hã gã sape hã nɛ obe Israɛlɛ. Ma kɛ wa gbɛ sɛ a do nu fɛlɛ a, nɛ wa da wa li we, do mɛnɔ 'da wa vɛ̃.”

¹⁶ Nɛ fala sa, do titole belee, nɛ Yozue tɔ̃ hã obe Israɛlɛ vɛ̃ na, nu kpala kpo do kpo ngbɔ dɛ dati NWA. Wa nɛa we ngbɔ nɛ, nɛ NWA be kɔ̃ ɛ tɛ nu kpala Yuda.

¹⁷ Nɛ Yozue tɔ̃ hã owi nu kpala Yuda na, nu fɛlɛ winɔ kɔ nɛ kpo do kpo, wa ngbɔ dɛ dati. Wa ngbɔa, nɛ NWA be kɔ̃ ɛ tɛ nu fɛlɛ Zera. Nɛ Yozue tɔ̃ hã nu fɛlɛ Zera na, nu fɛlɛ kula kpo do kpo ngbɔ dɛ dati. Wa ngbɔa do'do, nɛ nwa be kɔ̃ ɛ tɛ nu fɛlɛ kula 'da Zabdi.

¹⁸ Nɛ Yozue tɔ̃ hã nu fɛlɛ kula 'da Zabdi na, wele kpo do kpo ngbɔ dɛ dati. Wa ngbɔa, nɛ nwa be wá kɔ̃ ɛ tɛ Akanɛ, be 'da Karmi, kɛ a 'bɔ a be yaa Zabdi ni.

¹⁹ Nɛ Yozue tɔ̃ hã Akanɛ na: “Be 'daa, ma wia na mɔ dɛ kili NWA Gale 'da lɛ obe Israɛlɛ. Mɔ tɛ kàfà gɔ, kɔ mɔ tɔ̃ kɛ vɛ̃ mɔ dɛa ni. Mɔ tɛ ùsù mɔ kpo gɔ.”

²⁰ Nɛ Akanɛ gese na: “Ĩi, wi a mi hã mi dɛa 'dã mɔ dɛ 'da NWA Gale 'da lɛ obe Israɛlɛ. Nɛ zɔ́ mɛ kɛ mi dɛa gɛ:

²¹ Kɔ mɛnɔ mi kala ni, mi zɔa gã tulu kɛ ma yula tɛ Mezopotami, nɛ ma de wena. Nɛ mi zɔ 'bɔ ngɔ gili fɛ̃a mɔ bolo kama bɔa, nɛ mɔ mbali kilo kpo mbee bɔa. Nɛ ma dia tɛ mi nɛ ge nde ni, nɛ mi kala ma, nɛ mi zã kɔ ti tɔa tande 'da mi ni, nɛ mi mi ma dɛ di ni. Mi ia fɛ̃a mɔ bole do go'do kɔ̃ɛ. Kɔ nɛ kpa sɛ ma dɛ di ni.”

²² Nɛ Yozue tumba mbe winɔ na, wa wɛ́lɛ́ tɛ wa dɛ ti tɔa tande 'da Akanɛ i. Wa hɔa 'di mɔ, nɛ wa kpa mɛnɔ vɛ̃ nɛ́ kɛ Akanɛ tɔ̃a ni.

²³ Wa kala dɛ nza, nɛ wa tɛ nɛ hã Yozue do obe Israɛlɛ. Nɛ wa ia ma dati NWA.

²⁴ Nɛ Yozue do obe Israɛlɛ, wa ba Akanɛ do omɛnɔ kɛ a zũ ni, nɛ wa kala 'bɔ obulu benɔ do oboko benɔ 'da a, do ongɔmbɔ, opunda, obata, do tɔa tande, do tala mɛnɔ 'da a vɛ̃, nɛ wa la do wa dɛ kɔ gbangɔlɔ̃ Akɔrɛ.

²⁵ Nɛ Yozue tɔ̃ hã Akanɛ na: “Mɔ hã ngamɔ hã lɛ wena. Kɔ di dɔ̃ ni, NWA nɛ hã ngamɔ hã mɔ.” Yozue tɔ̃a ni, nɛ obe Israɛlɛ wa ma ngɔ lo Akanɛ do nu fɛlɛ a do ta, nɛ wa gbɛ wa. Ma ia, nɛ wa dɔ wɔlɔ wa, do mɛnɔ 'da a vɛ̃.

²⁶ Nɛ wa ngɛmɛ ngɔ gili ta dɛ ngɔ wa, nɛ ma 'bana dɛ di ni tia do sɔɛ gɛ. Gulu nɛ hã, gbaa we hɔ sɔɛ gɛ, wa sa li fala ni na, Gbangɔlɔ̃ Akɔrɛ. Gulu nɛ na: “Gbangɔlɔ̃ Ngamɔ.” Akanɛ fia wá, nɛ zã NWA bũ.