Yozue 6 - WE NU GALE 1995

Obe Israɛlɛ wa ba le Yeriko

¹ Owi Yeriko wa kpia zi nu ngbo le 'da wa do dia nɛ, nɛ wa zɔ mɔ tɛ nɛ na, da dɛ kɔ obe Israɛlɛ wa bá ma gɔ. Wele wè zi we le kɔ le ni, tabi hɔ nza kɔ nɛ gɔ.

² Nɛ nwa tɔ̃ hã Yozue na: “Mi nɛ 'dɔlɔ le Yeriko, do nwa ngɔ nɛ, do onwa bolonɔ 'da wa hã mɔ.

³ Mɔ, do osodanɔ 'da mɔ, nɛ zĩ sɛ do 'do ngbo nu le. Nɛ nɛ dɛ sɛ ni 'do tũ gazɛlɛ. Tũ kpo, nɛ nɛ zĩ sɛ fala kpo.

⁴ Onganga sambo wa kala sɛ mɔtũlũ kpo kpo dɛ kɔ wa, nɛ wa kpe dati Sanduku Gba Tɔkɛ. Kɔ ma hɔ tɛ sambo tũi, nɛ nɛ vɛ̃ nɛ zĩ sɛ do 'do ngbo nu le fala sambo. Onganganɔ wa kpe sɛ dati Sanduku Gba Tɔkɛ, nɛ wa dama mɔtũlĩ. Nɛ nɛ nɛ 'do Sanduki.

⁵ 'Da fala kɛ onganganɔ wa dámá mɔtũlĩ, kɔ wa kpè hi wa gɔ, kɔ nɛ zele ma, nɛ nɛ hé gã hiamɔ bolo. Nɛ ngbo nu le ma gbini sɛ, nɛ nɛ vɛ̃ nɛ lé. Wele do wele a le sɛ do fala a yula nɛ ni.”

⁶ Nɛ Yozue, be 'da Nunɛ, sa mɔ hã onganganɔ, nɛ a tɔ̃ hã wa na: “Nɛ bá Sanduku Gba Tɔkɛ dɛ zu 'baka nɛ, nɛ Owele sambo kɔ nɛ gɛ wa kala mɔtũlũ dɛ kɔ̃ wa, nɛ wa kpe dati Sanduki.”

⁷ Yozue tɔ̃a ni do'do, nɛ a ba 'bɔ nu a hã owinɔ na: “Nɛ nɛ́, hã nɛ zĩ do 'do ngbo nu le Yeriko. Nɛ nde ma wia na, ombe nwa bolonɔ kɔ nɛ ni, wa kpe dati onganganɔ sambo, kɛ wa dama mɔtũlĩ dati Sanduki ni.”

^8-9 Wa dɛa vɛ̃ nɛ kɛ Yozue ba do nu a ni. Ngɔ gili ombe nwa bolonɔ wa kpia dati, nɛ onganganɔ sambo kɛ wa dama mɔtũlĩ ni wa kpe, nɛ dɛ 'do wa, nɛ onganganɔ kɛ wa ba Sanduku Gba Tɔkɛ ni, wa kpe, nɛ ngɔ gili mbe onwa bolonɔ wa kpe dɛ 'do Sanduki. Do 'da fala owinɔ wa zĩ zi 'do ngboe ni, nɛ nde onganganɔ wa zi tɛ dama mɔtũlĩ fai.

¹⁰ Nɛ Yozue tɔ̃a hã owinɔ na, wa tɛ wèlè we gɔ, nɛ wa tɛ hè 'bɔ mɔ gɔ gbaa na, ɛ ba nu ɛ hã wa sɛ nɛ de.

¹¹ Nɛ a tombo na, wa ba Sanduku Gba Tɔkɛ, kɔ wa zĩ nɛ do 'do ngbo nu le fala kpo. Wa zĩ do'do, nɛ wa si dɛ olo wa i, nɛ wa ɔ nù.

¹² Fala sa titole belee, nɛ Yozue kulu ngɔ, nɛ onganganɔ wa ba 'bɔ Sanduku Gba Tɔkɛ dɛ zu 'baka wa,

¹³ nɛ ombe nganganɔ sambo, wa kpe dati Sanduki tɛ dama mɔtũlĩ. Nɛ ombe nwa bolonɔ wa kpe dati wa, nɛ ombe wa kpe do 'do Sanduki. Do 'da fala owinɔ wa zĩ zi do 'do ngboe ni, nɛ nde onganganɔ wa tɛ dama mɔtũlĩ fai.

¹⁴ Tɛ bɔa kɔ̃ tũi ni, nɛ wa zĩ 'bɔ 'do ngbo nu le Yeriko fala kpo, nɛ wa si dɛ olo wa i. Nɛ wa dɛa ní 'do tũ gazɛlɛ.

¹⁵ Kɔ ma hɔa tɛ sambo kɔ̃ tũi, nɛ wa kulu ngɔ do titole, nɛ wa zĩ 'do ngbo nu le, nɛ́ kɛ wa dɛ do kɔ̃ tũnɔ ma la zi dati ni. Nɛ nde do tũi ni, wa zĩ 'do ngbo nu le fala sambo.

¹⁶ Wa nɛa we zĩ 'do ngbo nu le fala sambo, nɛ onganganɔ wa dama mɔtũlĩ, nɛ Yozue tɔ̃ hã owinɔ na: “Nɛ hé hiamɔ bolo! NWA 'dɔlɔ le gɛ hã nɛ ia!

¹⁷ Nɛ 'dángá ma, do mɛnɔ kɔ nɛ ni vɛ̃. Nɛ dɛ ní, we be na, nɛ hã ma do dɔnggamɔ hã NWA. Nɛ nɛ tɛ gbɛ wuko ndumba li a a Rahabɛ, do winɔ vɛ̃ kɔ tɔa 'da a ni gɔ, we kɛ a usu zi zu wi miãnɔ 'da lɛ.

¹⁸ Nɛ dɛ́ zĩ na, nɛ tɛ bà mɔ kpo kɔ mɛnɔ nɛ nɛ 'danga nɛ ni gɔ. We duzu kɛ nɛ ba mɔ mɔ́ NWA, nɛ a 'danga sɛ fala ɔi 'da lɛ vɛ̃, nɛ lɛ sɛ do 'bako wena.

¹⁹ Nɛ nde mɛnɔ vɛ̃ wa dɛa do fɛ̃a mɔ bolo, do mɔ mbali, do tũ mɔ bolo, tabi do gele mɔ bolo ni, lɛ e sɛ ma dɛ kɔ NWA, nɛ lɛ a sɛ ma tɛ fala wa a do kpamɛnɔ 'da a ni.”

²⁰ Yozue tɔ̃a wenɔ ni vɛ̃ do'do, nɛ onganganɔ wa dama mɔtũlĩ, nɛ wa kpè hi wa gɔ. Owinɔ wa nɛa we zele ní, nɛ wa he gã hiamɔ bolo, nɛ ngboe gbini, nɛ wa le do ti, nɛ wa ba le Yeriko.

²¹ Nɛ wa kumu owinɔ kɔ nɛ ni vɛ̃, owi wili, do owuko, do obe, do ogbɛlɛ. Nɛ wa gbɛ 'bɔ ongɔmbɔ, do odua, do opunda.

Yozue kpasa Rahabɛ do owi nu fɛlɛ a

²² Nɛ Yozue sa mɔ hã ozagbãlãnɔ bɔa, kɛ a tumba zi wa na, wa nɛ miã tɛ Yeriko i ni, nɛ a tɔ̃ hã wa na: “Nɛ kpua zi mbulu hã Rahabɛ na, nɛ kpasa sɛ a, do winɔ kɔ tɔa 'da a ni vɛ̃. Kɔ nɛ nɛ́ kɔ tɔa 'da a i, nɛ nɛ fó a mba do winɔ 'da a dɛ nza.”

²³ Nɛ zagbãlãnɔ bɔa ni wa nɛa i mɔ, nɛ wa fo Rahabɛ, do baa a, do naa a, do obulu nya a, do oboko nya a, do tala owi nu fɛlɛ a vɛ̃ dɛ nza. Nɛ wa a wa dɔ̃ɔ do fala ɔi 'da obe Israɛlɛ, tɛ fala kɛ wele wè tɛ dɛ 'dã mɔ do wa gɔ ni.

²⁴ 'Do nɛ, nɛ osoda Israɛlɛ wa fi we tɛ le Yeriko, nɛ ma ngutu gbulu gbulu, do mɛnɔ kɔ nɛ ni vɛ̃. Nɛ nde dati kɛ na wa dɔ le ni, nɛ wa kala mɛnɔ kɛ wa dɛa do fɛ̃a mɔ bolo, do mɔ mbali, do tũ mɔ bolo, tabi do gele mɔ bolo ni, nɛ wa a tɛ fala wa usu do kpamɛnɔ 'da NWA ni.

²⁵ Nɛ nde kɛ 'da Rahabɛ do owi nu fɛlɛ a, Yozue kpasa wa, we kɛ a usu zi zu wi miãnɔ bɔa, kɛ a tumba wa tɛ Yeriko i ni. Nɛ Rahabɛ ɔa dɛ sanga obe Israɛlɛ, nɛ owi nu fɛlɛ wa 'bana sanga wa tia do sɔɛ gɛ.

²⁶ 'Do kɛ osoda Israɛlɛ wa 'danga le Yeriko ni, nɛ Yozue kana nu a tɛ nɛ na: “E kɔ NWA fɔmbɔ wi kɛ a yamba sɛ we dɛ 'bɔ le Yeriko dɛ olo nɛ ni. Wele kɛ a ndo zĩ ngbo nu le, nɛ kutu be 'da a a fe nɛ. Wele kɛ a ndo 'dafa ngbo nu le, nɛ tala be 'da a a fe nɛ.”

²⁷ NWA zi fala nɛ kpo do Yozue kɔ mɛnɔ vɛ̃ a dɛ ni, nɛ sako li a dɔ̃lɔ̃ zi kɔ lenɔ vɛ̃.