Yozue 5 - WE NU GALE 1995

¹ Onwanɔ ngɔ Oamori kɛ wa ɔ kulu lì Yɔrdanɛ si 'biti gɛ̃a wese, do onwa ngɔ Okanana kɛ wa zi tɛ nu gba lì Meditɛrane, wa zila we mɛ kɛ NWA dɛa na lì Yɔrdanɛ ɔ̃sɔ̃, takɔ obe Israɛlɛ wa kpa wala we kũ nɛ ni, nɛ sila wa gɔnɔ zurr, nɛ wa mbɔkɔ vɛ̃. Nɛ fo wi kpãlã sila ɛ we yolo ti obe Israɛlɛ 'bɔ bina.

Yozue gɔnɔ obe Israɛlɛ vɛ do gaza

² Do kpo fala ni, nɛ NWA tɔ̃ hã Yozue na: “Mɔ bá ta, nɛ mɔ sɛ nu nɛ, nɛ mɔ gɔ̀nɔ̀ do owi wili Israɛlɛ vɛ̃ kɛ wa tɛ gɔ̀nɔ̀ wa gɔ ni.”

³ Nɛ Yozue sɛa nu ta, nɛ a gɔnɔ do obe Israɛlɛ tɛ fala wa sa li nɛ na: “Kala Gɔnɔ Gaza.”

^4-5 Yozue gɔnɔ wa, mba gɔ, we kɛ 'da fala obe Israɛlɛ wa hɔa nza Ezipeto ni, nɛ nde owi wilinɔ kɛ wa wia sabɛlɛ bi bolo ni, wa vɛ̃ wa nɛa zɛ́ gaza. Nɛ owinɔ ni vɛ̃ wa fia tɛ li gba zɔ̃ i. Nɛ obulu benɔ kɛ wa kua wa dɛ 'do wa, do 'da fala kɛ wa zi a tɛ li gba zɔ̃ i ni, wa gɔ̀nɔ̀ wa gɔ.

⁶ Obe Israɛlɛ wa yɛnggɛ do li gba zɔ̃ɛ ni 'do 'bu sabɛlɛ nalɛ. Nɛ kɔ sabɛlɛnɔ ni vɛ̃, owi wilinɔ kɛ wa wia zi sabɛlɛ bi bolo do fala wa yula Ezipeto i ni, wa fia vɛ̃, we kɛ wa bɛ̃a zi dɛ mbula 'da NWA. Ma kɛ NWA kana nu a tɛ wa na, wa zɔ́ sɛ nùi kɛ nyɔngɔmɛ la li ngele ngɔ nɛ, nɛ a kpua zi mbulu hã ma hã oyaa wa ni gɔ.

⁷ Nɛ a dɛa na obenɔ 'da wa, wa le ngɔ nùi olo li wa. Obenɔ ni wa lia ngɔ nùi ni, nɛ nde wa tɛ nɛ gaza gɔ. Gulu nɛ a Yozue gɔnɔ wa ni.

⁸ 'Do kɛ wa gɔnɔ owi wilinɔ vɛ̃ do'do, nɛ wa 'bana dɛ fala ɔi 'da wa ni gbaa nɛ daninɔ ɛ̃a.

⁹ Nɛ nwa tɔ̃ hã Yozue na: “Nɛ zi a ongbá ngɔ nù Ezipeto, nɛ wa hã zi sape hã nɛ wena. Kɔ sɔɛ gɛ, mi fua sape ni li nɛ.” Gulu nɛ a wa ia li fala Gale wila do we hã Yozue ni na Gilgalɛ. Nɛ li ni 'bana ni tia do sɔɛ gɛ.

Obe Israɛlɛ wa dungu ɛngga Hɔ Nza kɔ Ngbá

¹⁰ 'Da fala kɛ obe Israɛlɛ wa 'bana zi tɛ Gilgalɛ, tɛ ngɔ mbɛ nùi kɛ ma dɔ̃ɔ do Yeriko ni, nɛ wa dungu ɛngga Hɔ Nza kɔ Ngbá do zɛkɛ ni, kɔ̃ nɛ 'bu ngɔ nɛ nalɛ. Wa ndua dungu ɛngga ni do 'da fala wese tɛ le tũ ni.

¹¹ Nɛ fala sa, nɛ wa nyɔngɔ mapanɔ kɛ wa à ina hana mapa se'de gɔ ni, do kpalɛnɔ kɛ wa hana ma hana ni. Ki ni zi a kuti kɛ na, wa nyɔngɔ kpalɛ ngɔ nù Kanana.

¹² Nɛ yolo dɛ di ni, mana kɛ obe Israɛlɛ wa nyɔngɔ zi ni, ma àlà 'bɔ mbé nɛ gɔ. Ndo do fala ni, nɛ wa nyɔngɔ tati a kpalɛnɔ kɛ wa mi ma ngɔ nù Kanana ni.

Gale tombo nwa bolo hã obe Israɛlɛ

¹³ Mbe ngba soe kpo, Yozue zi dɔ̃ɔ do Yeriko, kɔ a nɛ ka mɔ, nɛ a zɔ wele kpo, nɛ nde a yula dɛ dati a do du kɔya kɔ̃ a. Nɛ Yozue nɛ, nɛ a kɔlɔ do a, nɛ a aka a na: “Mɔ a wi mɔ́ lɛ, tabi mɔ a wi sɛnɛ lɛ nde?”

¹⁴ Nɛ wi ni gese na: “Ɔ̃ ɔ̃! Mi a nwa ngɔ owi bolonɔ 'da NWA Gale, hɔ mɔ́ mi a mi hɔ gɛ.” Yozue nɛa we zele ní, nɛ a gu li a nù ti a, nɛ a tɔ̃ hã a na: “Mi a wi dɛa to 'da mɔ. Kɔ mɛ mɔ kɔ̃a na mi dɛ ni a ge nde?”

¹⁵ Nɛ nwa ngɔ owi bolonɔ 'da NWA Gale gese hã a na: “Mɔ hɔ́lɔ́ mɔ nyanga mɔ do'do, we duzu kɛ fala mɔ yolo nɛ gɛ ma santo.” Nɛ Yozue dɛa nɛ́ kɛ nwa bole tɔ̃a ni.