Yozue 3 - WE NU GALE 1995

Tɛlɛ tɛ kɛ obe Israɛlɛ wa kũ zi do lì Yɔrdanɛ

¹ Fala sa titole belee, nɛ Yozue do obe Israɛlɛ wa kulu ngɔ tɛ Sitimɛ, nɛ wa la dɛ nu lì Yɔrdanɛ. Wa hɔa i mɔ, nɛ wa ɔ dɛ di ni we 'bɔ do 'da kɛ na wa kũ lì ni.

² Ma la tũ talɛ, nɛ ogã wi ngɔ obe Israɛlɛ wa yɛnggɛ fala ɔinɔ,

³ nɛ wa ba nu wa hã owinɔ na: “Fala kɛ nɛ zɔ onganganɔ tɛ ba Sanduku Gba Tɔkɛ 'da NWA Gale 'da nɛ, we la nɛ ni, nɛ nɛ kúlú ngɔ, nɛ nɛ nɛ́ 'dɔkɔlɔ wa.

⁴ Wa be sɛ wala hã nɛ, we kɛ nɛ hɔ kuti dɛ fala kpo gɔ. Nɛ nɛ tɛ nɛ kɔlɔ dɔ̃ɔ do Sanduki gɔ. Nɛ dɛ sɛ na, ngbala nɛ nyɛlɛ do ma fai ɔ nɛ kilomɛtrɛ kpo ni.”

⁵ Nɛ Yozue tɔ̃ 'bɔ hã owinɔ na: “Nɛ fɔ́lɔ́ tɛ nɛ we hɔ sa wi li Gale, we kɛ bindɛ, nɛ Gale a dɛ sɛ ɔngbamɔ sanga nɛ.”

⁶ 'Do kɛ Yozue tɔ́a ní ni, nɛ a ba nu a hã onganganɔ na, wa ba Sanduku Gba Tɔkɛ, kɔ wa kpe dati winɔ. Nɛ onganganɔ wa dɛa olo nu a.

⁷ Nɛ nwa tɔ̃ hã Yozue na: “Yolo do sɔɛ gɛ, mi dɛ sɛ na, mɔ hɔ gã wi li obe Israɛlɛ vɛ̃, nɛ wa dɔnggɔ sɛ mɔ, nɛ wa ĩ sɛ na, mi fala nɛ kpo do mɔ, ɔ nɛ kɛ mi zi fala nɛ kpo do Mɔizɛ ni.

⁸ Nɛ nde mɔ bá nu mɔ hã onganganɔ kɛ wa ba Sanduku Gba Tɔkɛ ni na, wa le 'dɔ lì bi sĩ, nɛ wa yolo nù.”

⁹ 'Do nɛ, nɛ Yozue tɔ̃ hã owinɔ na: “Nɛ tílí dɛ i nga, kɔ nɛ zele we kɛ NWA Gale 'da nɛ, kɔ̃a we tɔ̃ hã nɛ ni.

^10-11 Ngangga ni, nɛ ĩ sɛ na, NWA Gale wele kpasi fala nɛ kpo do nɛ boe ni. Mba gɔ, Sanduku Gba Tɔkɛ 'da NWA ngɔ nùi vɛ̃, ma kpe sɛ dati nɛ, we be wala kũ lì Yɔrdanɛ hã nɛ. Nɛ NWA a ndaka sɛ Okanana, do Ohiti, do Ohivi, do Opɛrizi, do Ogirgasi, do Oamori, do Oyebuzi dati nɛ.

¹² Nɛ nɛ saka sɛ Owele 'bu ngɔ wa bɔa, wele kpo kɔ nu kpala nɛ kpo kpo.

¹³ Fala kɛ onganganɔ kɛ wa ba Sanduki ni, wa fi nyanga wa 'dɔ lì Yɔrdanɛ, nɛ ma gɔnɔ sɛ sanga tɛ ngbɛ ɛ. Nɛ lì kɛ ma yolo ngɔ i ni, ma yolo sɛ nù, nɛ ma ngɛmɛ ngbɛ ɛ dɛ kpo fala.”

¹⁴ Yozue wila we do'do, nɛ owinɔ wa kulu ngɔ fala ɔi 'da wa, nɛ wa nɛ we kũ lì Yɔrdanɛ. Onganganɔ wa ba Sanduki, nɛ wa kpe dati.

¹⁵ Mɛ zi a 'da fala kala kpalɛ li fɔnɔ. Ĩ na, 'da fala ni, lì hɛ̃ wena, nɛ ma nɛa ngɔ fonggo nɛ, nɛ ma fo do nza nga vɛ̃. Kɔ onganganɔ wa nɛa we fĩ nyanga wa 'dɔ lì,

¹⁶ nɛ ma la fala fo nɛ. Nɛ ma yula nù gbaa do ngɔ, tɛ le Adamɛ, kɛ ma dɔ̃ɔ do Sartanɛ ni. Na mɛ ni, nɛ lì kɛ ma fo dɛ ngɔ Ndɔ Fio si ba gɔtɔ ni, ma ɔ̃sã kpɛrr. Nɛ ma hã wala hã winɔ na, wa kũ lì Yɔrdanɛ dɔ̃ɔ do Yeriko do kula nyanga wa.

¹⁷ Onganganɔ kɛ wa ba Sanduki ni, wa lia, nɛ wa yolo nù dɛ gbogbo wakala lì Yɔrdanɛ kɛ ma ɔ̃sã kpɛrr ni gbaa na, obe Israɛlɛ vɛ̃ wa kũ lì, hã wa hɔ kulu nɛ i do'do, sɛ nɛ de.