Yozue 24 - WE NU GALE 1995

Ndɔti wila we 'da Yozue

¹ Yozue ba nu a na, nu kpala obe Israɛlɛ vɛ̃ wa ngɛmɛ ngba wa dɛ kɔ le Sikɛmɛ. A sa mɔ hã ogã wi ngɔ nu fɛlɛ kulanɔ vɛ̃, do okumunɔ, do owi 'bili wenɔ, do ogã wi ngɔ osodanɔ, nɛ wa tɛa, nɛ wa yolo dɛ dati Gale.

² Nɛ Yozue kulu ngɔ, nɛ a tɔ̃ hã wa na, wa zélé wenɔ kɛ NWA Gale 'da wa kɔ̃a we tɔ̃ hã wa ni. NWA tɔ́a na: “Zɛ́ dati belee, oyaa nɛ wa ɔ zɛ́ tɛ kulu lì Efratɛ, nɛ wa dɔnggɔ zɛ́ ogele galenɔ. Nɛ li mbe wele sanga wa zi a Tera, kɛ a kua Abrahama do Nahɔrɛ.

³ Nɛ mi dɛa na, yaa nɛ Abrahama la nùi ni do'do, nɛ mi kã a, nɛ a yɛnggɛ ngɔ nù Kanana vɛ̃. Nɛ mi dɛ 'bɔ na, nu fɛlɛ a sanza. A kua Izaka,

⁴ nɛ Izaka ko Yakɔbɔ do Ezau. Nɛ mi ba nùi ngɔ kalanɔ tɛ Seirɛ hã Ezau na, a ɔ dɛ di ni. Nɛ Yakɔbɔ do obulu benɔ 'da a wa nɛa dɛ ngɔ nù Ezipeto.

⁵ 'Do nɛ, nɛ mi tombo Mɔizɛ do Aroni 'da nwa ngɔ nù Ezipeto i, nɛ mi tumba ongamɔ kpi do kpi hã Oezipeto dati fo oyaa nɛ ngɔ nùi ni dɛ nza.

⁶ 'Do kɛ wa kulu ngɔ Ezipeto ni, nɛ wa nɛa, nɛ wa hɔ nu gba lì Sala Tɔ̃. Nɛ Oezipeto wa kũ ngilingilinɔ do mbalatanɔ 'da wa, nɛ wa ndaka 'do oyaa nɛ gbaa nu gba lì Sala Tɔ̃ i.

⁷ Oyaa nɛ wa nɛa we zɔ ní, nɛ wa sa mɔ hã mi na, mi gala wa. Nɛ mi ia lɔnggɔ zɛ̃ we ngbala wa do Oezipeto. Nɛ mi dɛa na, lì bindi Oezipeto. Nɛ do tɛ nɛ, nɛ ĩ tɛlɛ tɛ kɛ mi dɛa do Oezipeto ni.

⁸ “'Do ki ni, nɛ obaa nɛ wa ɔa li gba zɔ̃ i sabɛlɛ dɛlɛ wena. Nɛ 'do nɛ, nɛ mi kã nɛ dɛ ngɔ nùi 'da Oamori, kɛ wa ɔ zi tɛ kulu lì Yɔrdanɛ, si 'biti gba wese ni. Wa bi nɛ, nɛ mi 'dɔlɔ wa hã nɛ. Mi kumu wa, nɛ nɛ ba nùi 'da wa.

⁹ Nɛ nwa ngɔ nù Moabɛ, kɛ li a a Balakɛ, be 'da Sipɔrɛ, a tɛa we bi nɛ. A sa mɔ hã Balamɛ, be 'da Beɔrɛ we fɔmbɔ nɛ.

¹⁰ Nɛ nde mi hã̀ wala hã Balamɛ we fɔmbɔ nɛ gɔ. Mi dɛa na, a wele nu a tɛ nɛ. Na mɛ ni, nɛ mi kpasa nɛ ti kɔ̃ Balakɛ.

¹¹ “'Do nɛ, nɛ nɛ kũ lì Yɔrdanɛ, nɛ nɛ hɔ tɛ le Yeriko, nɛ owi Yeriko wa bi nɛ, nɛ mi dɛa na, nɛ nɛ ngɔ wa. 'Do nɛ 'bɔ, nɛ Oamori, Opɛrizi, Okanana, Ohiti, Ogirgasi, Ohivi, do Oyebuzi wa bi nɛ, nɛ mi dɛa 'bɔ na, nɛ nɛ ngɔ wa vɛ̃.

¹² Do 'da fala nɛ tɛ nɛ dɛ dati ni, nɛ mi dɛa na, kili ba winɔ vɛ̃, nɛ Onwanɔ 'da Oamori bɔa ni, wa yu dati nɛ do'do. Mɛ zi a du kɔyanɔ do nzabelenɔ 'da nɛ, ma hã ma ndàkà wa gɔ, nɛ nde wi zi a mi, hã mi ndaka wa.

¹³ Na mɛ ni, mi ba fɔnɔ kɛ ogele wele wa wa ma ni, do lenɔ kɛ nɛ dɛ̀ ma gɔ ni hã nɛ na, nɛ ɔ kɔ nɛ, nɛ nɛ nyɔngɔ wala vinɔ do olivɛ, kɛ nɛ a nɛ mì ma gɔ ni.”

Obe Israɛlɛ wa saka we dɔnggɔ tati a NWA Gale

¹⁴ Nɛ Yozue tɔ̃ 'bɔ na: “Ma wia na, nɛ dɔnggɔ NWA Gale, nɛ nɛ dɛ to hã a do sila nɛ vɛ̃, do gbisa zu. Nɛ nɛ bɛ̃ gɛnɛ gele galenɔ, kɛ oyaa nɛ wa sambala zɛ́ wa tɛ fala wa 'bana kulu lì Efratɛ, tabi tɛ Ezipeto i ni, nɛ nɛ dɛ to tati nɛ hã NWA Gale zu a kpo.

¹⁵ Kɔ nɛ kɔ̃̀ we dɔnggɔ NWA Gale gɔ nde, nɛ sɔɛ gɛ, nɛ sáká gale kɛ nɛ kɔ̃a we dɔnggɔ a ni. Tabi nɛ saka ogalenɔ kɛ oyaa lɛ wa sambala zɛ́ wa kulu lì Efratɛ i ni, tabi wanɔ kɛ Oamori wa sambala wa ngɔ nùi nɛ ɔ nɛ gɛ nde? Nɛ nde we duzu mi do nu fɛlɛ mi, lɛ dɔnggɔ sɛ tati a NWA Gale zu a kpo.”

¹⁶ Nɛ winɔ vɛ̃ wa gisa na: “Fala kpo gɔ, lɛ síkí sɛ 'do lɛ hã NWA we dɔnggɔ gele gale gɔ.

¹⁷ NWA Gale a a Gale 'da lɛ. A kpasa obaa lɛ kɔ ngbá tɛ Ezipeto i, nɛ lɛ ĩ ti ogã ɔngbamɛnɔ kɛ a dɛa ni. Lɛ la do ngɔ nù 'da ogele winɔ, nɛ NWA Gale zɔa mɔ tɛ lɛ falanɔ vɛ̃ kɛ lɛ la nɛ ni.

¹⁸ Wi a NWA a ndaka owinɔ dati lɛ, a ndaka ngboo a Oamori, kɛ wa ɔ zi ngɔ nùi gɛ. We duzu ma, lɛ tɛ mɛ 'bɔ lɛ dɔnggɔ sɛ a, we kɛ a zu a kpo a Gale 'da lɛ.”

¹⁹ Nɛ Yozue tɔ̃ hã owinɔ na: “Nɛ wé sɛ we dɔnggɔ NWA Gale ngboo gɔ. We kɛ a Gale kɛ a santo, nɛ a kɔ̃a na, nɛ dɔnggɔ tati a a zu a kpo. Kɔ fala kɛ nɛ bɛ̃ we dɛ mbula 'da a, hã nɛ dɛ 'dã mɔ, nɛ nde a fó sɛ ku'da nɛ zu nɛ gɔ.

²⁰ Tabi nɛ la fala dɔnggɔ a, hã nɛ dɔnggɔ gele gale, nɛ a siki sɛ li a dɛ tɛ nɛ, we zɛlɛ tɛ nɛ. Gɛnɛ kɔ a dɛ dia mɔ hã nɛ wena, nɛ a kumu sɛ nɛ.”

²¹ Nɛ owinɔ wa gese na: “Ma a mɔ tɔ̃a ni! Nɛ nde lɛ dɔnggɔ sɛ tati a NWA Gale zu a kpo.”

²² Nɛ Yozue tɔ̃ 'bɔ na: “Nɛ ngboo, nɛ a otemɔɛ 'da nɛ wele nɛ. Nɛ do tɛ nɛ, nɛ saka we dɔnggɔ NWA Gale.” Nɛ wa gese na: “Ma a ni, lɛ kɔ̃a!”

²³ Nɛ Yozue tɔ̃ na: “Ma ɔ ní, nɛ nɛ bɛ gɛnɛ ogele galenɔ kɛ wa 'bana sanga nɛ ni. Nɛ nɛ á sila nɛ vɛ̃ ngɔ NWA Gale 'da lɛ obe Israɛlɛ.”

²⁴ Nɛ owinɔ wa gese na: “NWA Gale a Gale 'da lɛ. Lɛ dɔnggɔ sɛ a, nɛ lɛ dɛ sɛ mbulanɔ 'da a.”

²⁵ Do ngba soe ni, tɛ Sikɛmɛ i, nɛ Yozue gba tɔkɔ ngbala Oisraɛlɛ do NWA Gale. Nɛ a e mbula ngɔ gba tɔkɛ, kɛ ma wia na wa dɛ ma ni,

²⁶ nɛ a kɔmɔ ma kɔ 'buku mbula 'da Gale. 'Do nɛ, nɛ a ba gã ta, nɛ a zĩ ma dɛ ti te sɛnɛ, kɛ ma tɛ fala dɔnggɔ do NWA Gale ni.

²⁷ Nɛ a tɔ̃ hã obe Israɛlɛ na: “Nɛ zɔ ta gɛ, ma sɛ a temɔɛ 'da lɛ, we kɛ ma zila wenɔ vɛ̃ kɛ NWA Gale tɔ̃a hã lɛ ni. Ma gba sɛ ta zu lɛ na, da dɛ kɔ lɛ dɛ́ 'dã mɔ dɛ 'da Gale 'da lɛ gɔ.”

²⁸ Yozue tɔ̃a ni do'do, nɛ a gese obe Israɛlɛ, nɛ wele do wele kpula tɛ̃ a dɛ ngɔ nùi wa ba zi hã a ni.

Yozue do Ɛlazarɛ wa fia

²⁹ 'Do wenɔ ni là tũ dɛlɛ gɔ, nɛ Yozue be 'da Nunɛ, kɛ a a wi dɛa toe 'da NWA ni, a fe. A fia zi nɛ nde a do sabɛlɛ kama do ngɔ nɛ 'bu.

³⁰ Nɛ wa mi a ngɔ nùi wa ba zi hã a tɛ Timnatɛ-Sera, kɛ ma ngɔ nù Efraimɛ, tɛ ngɔ kalanɔ ni. Yolo ngɔ kala Gasɛ, nɛ nde Timnatɛ-Sera do si gbãlã ngɔ.

³¹ 'Da fala kɛ Yozue 'bana zi nza ni, nɛ obe Israɛlɛ wa dɛa olo nu NWA. Nɛ wa dɛa 'bɔ ni, fala okpasa wi ngɔ wa wa 'bana nza ni. Mba gɔ, okumunɔ ni wa zɔa zi mɛnɔ vɛ̃ kɛ NWA dɛa we wa obe Israɛlɛ ni.

³² Zɛ́ 'da fala kɛ Oisraɛlɛ wa hɔa nza ngɔ nù Ezipeto ni, nɛ wa kala gbãlã yaa wa Yozɛfu, nɛ wa si do ma, nɛ wa mi ma tɛ Sikɛmɛ. Mba gɔ, zɛ́ dati, nɛ Yakɔbɔ, yaa obe Israɛlɛ usa zɛ́ nùi ni kɔ̃ obe zã Hamɔrɛ, wi kɛ a dɛa zi le Sikɛmɛ ni. A usa ma do gbãlã mbili fɛ̃a mɔ bolo kama kpo. Gulu nɛ a nùi ni zi a mɔ nu kpala Yozɛfu ni. Na mɛ ni wa mi zi obe zã Yozɛfu dɛ di ni.

³³ 'Do nɛ, nɛ Ɛlazarɛ, be 'da Aroni fia tɛ mɛ 'bɔ. Nɛ wa mi a ngɔ tɔ̃ɛ kɛ wa ba zi hã be 'da a Pinasi ni. Tɔ̃ɛ ni, ma zi 'bɔ tɛ ngɔ nù Efraimɛ, tɛ ngɔ kalanɔ.