Yozue 22 - WE NU GALE 1995

Yozue gisa mbee nu kpala winɔ si 'biti gba wese dɛ olo wa

¹ Obe Israɛlɛ wa bi owinɔ ngɔ nùi kulu lì Yɔrdanɛ, si 'biti gɛ̃a wese, nɛ wa nɛ ngɔ wa do'do, nɛ Yozue sa mɔ hã owi wilinɔ kɔ nu kpala Rubɛnɛ do Gadɛ, do mbee nu kpala Manase kɛ nùi 'da wa si 'biti gba wese ni,

² nɛ a tɔ̃ hã wa na: “Nɛ dɛa mbulanɔ vɛ̃ kɛ Mɔizɛ, wi dɛa toe 'da NWA hã hã nɛ ni, nɛ nɛ dɛa 'bɔ mbula mi hã hã nɛ ni ngboo.

³ Yolo do ngba soe kɛ nɛ lia ngɔ nùi gɛ, gbaa we hɔ sɔɛ gɛ, nɛ gbìnì mbula nu NWA Gale 'da nɛ gɔ. Nɛ 'da fala fai, nɛ tɛ gala onya nɛ, nɛ nɛ là wa ní iko gɔ.

⁴ Kɔ ngangga gɛ, NWA hã wala hã wa na, wa dɛ tɔanɔ 'da wa ngɔ nùi a kpua mbulu nɛ hã wa ni, kɔ nɛ wia we kpolo tɛ nɛ dɛ ngɔ nùi 'da nɛ, tɛ kulu lì Yɔrdanɛ si 'biti gba wese i. Nɛ nɛ ɔ sɛ dɛ ngɔ nùi kɛ Mɔizɛ, wi dɛa toe 'da NWA ba ma hã nɛ ni.

⁵ Nɛ nde ma wia na, nɛ dɛ ombulanɔ vɛ̃ kɛ Mɔizɛ hã ma hã nɛ ni do dia nɛ. Nɛ kɔ̃ gɛnɛ NWA Gale 'da nɛ, nɛ dɛ mbula 'da a, nɛ nɛ dɛ mɔ tɛ nɛ nɛ́ kɛ zã a kɔ̃a ni. Nɛ hã tɛ nɛ vɛ̃ hã a, nɛ nɛ dɛ to hã a do sila nɛ kpo.”

⁶ 'Do nɛ, nɛ Yozue wila nu ɛ tɛ wa, nɛ a hã wala hã wa na, wa kpolo tɛ wa.

^7-8 Nɛ a tɔ̃ hã wa na: “Nɛ zɔ́ ogili kpamɛnɔ kɛ nɛ kpa gɛ: onadalamɔ, fɛ̃a mɔ bolo, mɔ mbali, fila mɔ bolo, mɔ bolo, do ogba gili tulu, kɛ nɛ kala ma vɛ̃ kɔ̃ owi sɛnɛ nɛ ni. Nɛ sí do nɛ, nɛ nɛ kɛ̃ hã owi nu kpala nɛ.” Mɔizɛ ba zi nù hã mbee nu kpala Manase tɛ kulu lì Yɔrdanɛ si 'biti gba wese. Nɛ Yozue a ba tɛ mɛ 'bɔ nù hã tala nu kpala Manase tɛ kulu lì Yɔrdanɛ, si 'biti gɛ̃a wese. A ba zi ma hã wa do 'da fala kɛ otala gele nu kpala obe Israɛlɛ wa kpa do nùnɔ 'da wa ni.

Wa dɛa gbagala nu lì Yɔrdanɛ

⁹ Onu kpala Rubɛnɛ do Gadɛ, do mbee nu kpala Manase kɛ si 'biti gba wese, wa la tala obe Israɛlɛ dɛ le Silo, tɛ ngɔ nù Kanana ni, nɛ wa le wala, nɛ wa si dɛ ngɔ nù Galadɛ. Galadɛ mɛ a nùi kɛ Mɔizɛ ba zi hã wa, ɔ nɛ kɛ NWA Gale tɔ̃a nɛ hã a ni.

¹⁰ Wa nɛa gbaa, nɛ wa hɔ nu lì Yɔrdanɛ, tɛ kulu kɛ si ngɔ nù Kanana nga ni, nɛ wa dɛ gã gbagala dɛ di ni.

¹¹ Nɛ tala obe Israɛlɛ wa zila na, onu kpala Rubɛnɛ do Gadɛ, do mbee nu kpala Manase, wa dɛa gbagala dɛ nu lì Yɔrdanɛ, do kulu kɛ 'da lo nga gɛ,

¹² nɛ wa mba li ngba wa vɛ̃ dɛ tɛ Silo, nɛ wa 'dafa tɛ wa we nɛ we bi wa.

¹³ Nɛ wa tombo Pinasi, be 'da nganga Elazarɛ na, a nɛ ngɔ nù Galadɛ i, hã a aka wa ngɔ we ni.

¹⁴ Nɛ okpasa wi 'bu wa kã Pinasi. Okpasa winɔ ni, wa saka zi wa kpo kpo kɔ nu kpala winɔ si 'biti gɛ̃a wese vɛ̃. Nɛ wa zi vɛ̃ a okpasa wi ngɔ nu fɛlɛ kulanɔ 'da obe Israɛlɛ.

¹⁵ Wa nɛa tɛ 'da nu kpala wanɔ si 'biti gba wese, tɛ ngɔ nù Galadɛ i, nɛ wa tɔ̃ hã wa do zu li tala obe Israɛlɛ vɛ̃ na:

¹⁶ “Gulu kɛ nɛ dɛa gã 'dã mɔ dɛ 'da NWA Gale 'da lɛ obe Israɛlɛ ni we ge nde? Gulu kɛ nɛ la fala dɛ mbula 'da nwa we ge nde? Nɛ bɛ̃a we nu a, we kɛ nɛ dɛa gbagala yɔlɔ nɛ.

¹⁷ Tɛ zu nɛ ila ngɔ 'dã mɛ lɛ dɛa zi tɛ Peɔrɛ i ni nde? NWA hã zi etumbu hã lɛ, nɛ a fi zɛlɛ tɛ lɛ we ma, nɛ lɛ 'bana te kpa ngamɔ we nɛ gbaa tia do sɔɛ gɛ. Nɛ 'dã mɛ ni, ma tɛ wè li nɛ gɔ nde?

¹⁸ Kɔ nɛ nɛ la 'bɔ fala dɔnggɔ NWA Gale sɔɛ gɛ nde? Fala kɛ nɛ bɛ̃ we nu nwa sɔɛ gɛ, nɛ bindɛ, nɛ nɔ̃lɔ̃ zã 'da a ma te sɛ ngɔ obe Israɛlɛ vɛ̃.

¹⁹ Kɔ fala kɛ nɛ zɔ na, nùi 'da nɛ ma wè do fala dɔnggɔ do NWA gɔ, nɛ nɛ kpóló tɛ nɛ dɛ ngɔ nùi 'da a nga, tɛ fala kɛ tɔa Tande 'da a se'de ni, nɛ nɛ bá nù dɛ sanga kɛnɔ 'da lɛ ni. Nɛ dɔ nɛ dɛ́ mbé gbagala we dɔnggɔ do NWA Gale 'da lɛ gɔ. Nɛ dɛ ní, nɛ nde nɛ bɛ̃a we nu NWA, nɛ lɛ do nɛ, lɛ te sɛ li ngbangga dati a.

²⁰ Tɛ zu nɛ ila ngɔ 'dã mɛ 'da Akanɛ, wi nu fɛlɛ Zera nde? A kala zi dia mɛnɔ kɛ Gale tɔ̃a na, wa 'danga ma vɛ̃ ni, nɛ nɔ̃lɔ̃ zã 'da NWA tia ngɔ obe Israɛlɛ vɛ̃. Nɛ Akanɛ fè zi we 'dã mɛ 'da a zu a kpo iko gɔ.”

Obe Israɛlɛ wa 'dafa dɛa na sanga tɛ ngba wa

²¹ Onu kpala Rubɛnɛ, Gadɛ do mbee nu kpala Manase si 'biti gba wese, wa gisa hã okpasa wi ngɔ nu fɛlɛ kulanɔ 'da tala nu kpala obe Israɛlɛ, kɛ si 'biti gɛ̃a wese ni na:

²² “Gbãlã we, NWA Gale a Gale kɛ a ga wena, a ĩ ti gulu kɛ lɛ dɛa ní ni. Ma ɔ do bɛ̃a we, tabi do gã 'dã mɔ dɛ 'da a nde, nɛ a tɛ là lɛ do tunu li lɛ gɔ.

²³ Fala kɛ lɛ gbini mbula 'da NWA, we kɛ lɛ dɛa gbagala yɔlɔ lɛ, we gbɛ sa'de we dɔnggɔ do a nde, nɛ a do tɛ̃ a ngboo a hã etumbu hã lɛ. Nɛ nde lɛ dɛ̃ ma we dɔ sa'de, tabi hã fũ we dɔnggɔ do a, tabi gbɛ sa'de we be dɛa na ngɔ nɛ gɔ.

²⁴ Lɛ dɛa ma, we kɛ lɛ dɛa kili na, da dɛ kɔ do 'do, hã obe zã nɛ wa tɔ̃ hã obe zã lɛ na: ‘Gulu dɛa na 'da nɛ do NWA Gale 'da obe Israɛlɛ a ge nde gɔ.

²⁵ Nɛ a owi mɔ́ a gɔ. Mba gɔ, NWA do tɛ̃ a a ia lì Yɔrdanɛ na, ma gɔnɔ sanga lɛ do nɛ, onu kpala Rubɛnɛ do Gadɛ.’ Na mɛ ni, nɛ obe zã nɛ wa dɛ sɛ na, obe zã lɛ wa tɛ dɔ̀nggɔ̀ 'bɔ NWA gɔ.

²⁶ Gulu nɛ hã lɛ ba zã zu we dɛ gbagala gɛ. Nɛ nde lɛ dɛ̃ ma we gbɛ sa'de ngɔ nɛ we dɔnggɔ do NWA gɔ.

²⁷ Lɛ dɛa ma we be hã owinɔ 'da lɛ do owinɔ 'da nɛ, do obenɔ wa ko sɛ wa 'do lɛ gɛ na, lɛ vɛ̃ lɛ dɔnggɔ Gale kpo. Nɛ ma be sɛ 'bɔ na, lɛ wia we nɛ tɛ tɔa Tande 'da a, we dɔ sa'de, do gbɛ sa'de we be dɛa na, do hã ogele dɔnggamɔ hã a. Na mɛ ni, nɛ nde obe zã nɛ wa wé sɛ we tɔ̃ hã obe zã lɛ na, wa fala kpo a owi mɔ́ NWA gɔ ni gɔ.

²⁸ Linggamɛ 'da lɛ na, fala kɛ do 'do hã obe zã nɛ wa tɔ̃ we ní, nɛ obe zã lɛ wa gese hã wa na: ‘Nɛ zɔ́, oyaa lɛ wa dɛa gbagala kɛ ma wia kɔ do kɛ 'da NWA. Nɛ nde wa dɛ̃ we gbɛ sa'de, tabi we hã ogele dɔnggamɔ ngɔ nɛ hã NWA gɔ. Wa dɛa ma we gba ta zu lɛ do nɛ na, lɛ vɛ̃ lɛ dɔnggɔ Gale kpo.’

²⁹ Lɛ kɔ we bɛ̃ we nu NWA Gale gɔ, lɛ kɔ̃ we siki 'do lɛ hã a gɔ. Na mɛ ni, lɛ dɛ̃ gbagala gɛ we dɔ sa'de do hã ogele dɔnggamɔ hã Gale gɔ. Fala kɛ lɛ kɔ̃a we hã do dɔnggamɛ hã NWA Gale 'da lɛ, mɛ tati a ngɔ gbagala dati tɔa Tande 'da a tɛ Yeruzalɛmɛ i ni iko.”

³⁰ Nganga Pinasi, do okpasa wi ngɔ nu kpala obe Israɛlɛ 'bu ni, wa nɛa we zele wenɔ kɛ owinɔ kɔ nu kpala Rubɛnɛ, Gadɛ do Manase wa tɔ̃a ni, nɛ sila wa gɛ̃a.

³¹ Nɛ Pinasi, be 'da nganga Elazarɛ tɔ̃ hã wa na: “Na mɛ ni, lɛ ĩ na NWA Gale do lɛ boe, nɛ a hã́ sɛ etumbu hã lɛ obe Israɛlɛ we duzu nɛ gɔ, we kɛ nɛ dɛ̃ 'dã mɔ gɔ.”

³² 'Do nɛ, nɛ Pinasi, do owi ngɔ nu kpala obe Israɛlɛ ni, wa mbisa onu kpala Rubɛnɛ do Gadɛ, nɛ wa kulu ngɔ Galadɛ, nɛ wa si dɛ Kanana. Wa hɔa i mɔ, nɛ wa tɔ̃ gulu mɛnɔ ma la ni hã tala obe Israɛlɛ.

³³ Nɛ ma dɛa yangga tɛ wa, nɛ wa gese iɔ̃nae hã Gale. Nɛ wa la fala linggamɔ bi nu kpala Rubɛnɛ do Gadɛ, we 'danga lenɔ 'da wa ni.

³⁴ Nɛ onu kpala Rubɛnɛ do Gadɛ wa na: “Gbagala gɛ, ma gba ta zu lɛ vɛ̃ na NWA a a Gale.” Nɛ wa ia li nɛ na: “Gbagala Gba Ta Zu Wi.”