Yozue 21 - WE NU GALE 1995

Owi nu kpala Levi wa kpa ole mɔ́ wa

^1-2 Do 'da fala kɛ obe Israɛlɛ wa 'bana zi tɛ Silo ngɔ nù Kanana i ni, nɛ okpasa wi kɔ nu kpala Levi, wa nɛa 'da nganga Ɛlazarɛ, do Yozue be 'da Nunɛ, do okpasa wi kɔ gele nu kpala obe Israɛlɛ. Nɛ wa tɔ̃ hã wa na: “NWA Gale ba nu ɛ hã Mɔizɛ na, a saka ole kɛ lɛ wia we ɔ kɔ nɛ ni hã lɛ. Nɛ a hã 'bɔ falanɔ kɛ zã nɛ, kɛ lɛ wia we dala do onadalamɛnɔ 'da lɛ ni hã lɛ.”

³ Na mɛ ni, obe Israɛlɛ wa dɛa olo nu NWA Gale. Wa zɔa ngɔ nùnɔ 'da wa, nɛ wa saka ombe lenɔ, do ofala kɛ zã nɛ we dala do onadalamɔ, nɛ wa ba ma hã nu kpala Levi.

⁴ Na mɛ ni, wa tua zeke, nɛ ma tia ngɔ nganganɔ, kɛ wa a nu fɛlɛ Kehatɛ ni. Nɛ dɛ kɔ wa ni, obe zã nganga Aroni wa kpa le 'bu ngɔ nɛ talɛ ngɔ nùnɔ 'da Yuda, Simeoni do Bɛnzamɛ.

⁵ 'Do wa ni, nɛ tala obe zã Kehatɛ wa kpa le 'bu ngɔ nùnɔ 'da Efraimɛ, Danɛ do mbee nu kpala Manase, kɛ si 'biti gɛ̃a wese.

⁶ Nu fɛlɛ Gɛrsoni wa kpa le 'bu ngɔ nɛ talɛ ngɔ nùnɔ 'da Isakarɛ, Asɛrɛ, Nɛftali do mbee nu kpala Manase, kɛ wa ɔ ngɔ nù Basanɛ kɛ si 'biti gba wese.

⁷ Nu fɛlɛ Mɛrari wa kpa le 'bu ngɔ nùnɔ 'da Rubɛnɛ, Gadɛ do Zabuloni.

⁸ Na mɛ ni obe Israɛlɛ wa tua zeke, nɛ wa hã lenɔ do ofala dala do nadalamɛnɔ kɛ zã nɛ ni hã nu kpala Levi, nɛ́ kɛ NWA tɔ̃a zi hã Mɔizɛ ni.

^9-10 Kuti zeke wa tua zi ni tia ngɔ obe zã Aroni, kɛ wa a owi nu fɛlɛ Kehatɛ, be 'da Levi. Wa kpa le kusi ngɔ nùnɔ 'da Yuda do Simeoni.

¹¹ Wa kpa le Kiriatɛ-Arba, (Arba zi a yaa Oanakɛ). Sɔɛ gɛ wa sa li le ni na, Hebroni. Ma tɛ ngɔ nù Yuda kɛ ngɔ kala. Wa kpa ma, do falanɔ kɛ zã nɛ ni we dala do nadalamɛnɔ 'da wa.

¹² Mɛ ni, nɛ nde fɔnɔ do be lenɔ kɛ zã Hebroni ni, wa kala zi hã Kalɛbɛ, be 'da Yɛfune ia.

¹³ Hebroni 'bɔ a mbe kpo kɔ ole usu tɛ wi kɔ nɛ. Dɛ ngɔ Hebroni ni, nɛ owi nu fɛlɛ nganga Aroni wa kpa 'bɔ le Libna,

¹⁴ Yatirɛ, Ɛstɛmoa,

¹⁵ Holoni, Dɛbirɛ,

¹⁶ Akanɛ, Yuta do Bɛtɛ-Semɛsi. Nɛ ma mba vɛ̃ mɛ a le kusi, do ofala dala do nadalamɛnɔ kɛ zã nɛ. Ma vɛ̃ ngɔ 'bili tɛ nùnɔ 'da Yuda do Simeoni.

¹⁷ Nɛ wa kpa 'bɔ le nalɛ ngɔ nùi 'da Bɛnzamɛ. Li lenɔ ni a: Gabaoni, Geba,

¹⁸ Anatɔtɛ, do Alemɛtɛ.

¹⁹ Onganganɔ kɔ nu fɛlɛ Aroni ni, wa kpa vɛ̃ mɛ a le 'bu ngɔ nɛ talɛ, do falanɔ kɛ zã nɛ ni we dala do nadalamɛnɔ 'da wa.

²⁰ Nɛ tala owi nu kpala Levi, kɛ wa a nu fɛlɛ Kehatɛ ni, wa kpa ole ngɔ nùi 'da Efraimɛ.

^21-22 Li lenɔ ni a: Sikɛmɛ kɛ ma ngɔ kalanɔ ni, do Gezɛrɛ, Kibsaimɛ do Bɛtɛ-Horoni. Sikɛmɛ a le usu tɛ wi kɔ nɛ. Na mɛ ni, wa kpa le nalɛ, do falanɔ kɛ zã nɛ ni we dala do nadalamɛnɔ 'da wa.

²³ Wa kpa 'bɔ le nalɛ ngɔ nùi 'da Danɛ. Li lenɔ ni a Ɛltɛke, Gibɛtoni,

²⁴ Ayaloni do Gatɛ-Rimoni.

²⁵ 'Do nɛ, nɛ wa kpa 'bɔ le bɔa ngɔ nùi 'da mbee nu kpala Manase, si 'biti gɛ̃a wese. Lì lenɔ ni a Tanakɛ do Ibleamɛ.

²⁶ Na mɛ ni, wa kpa le vɛ̃ 'bu, do falanɔ kɛ zã nɛ ni we dala do nadalamɛnɔ 'da wa.

²⁷ 'Do nɛ, nɛ owi nu kpala Levi, kɛ wa a nu fɛlɛ Gɛrsoni ni, wa kpa tɛ mɛ 'bɔ ole mɔ wa. Wa kpa le bɔa ngɔ nùi 'da mbee nu kpala Manase, si 'biti gba wese. Mɛ a olenɔ gɛ: Golanɛ tɛ ngɔ nù Basanɛ do Bɛsɛtɛra. Golanɛ a le usu tɛ wi kɔ nɛ.

²⁸ Wa kpa 'bɔ le nalɛ ngɔ nùi 'da Isakarɛ. Mɛ a lenɔ gɛ: Kisioni Dabratɛ,

²⁹ Yarmutɛ do Ɛnɛ-Ganimɛ.

³⁰ Wa kpa 'bɔ le nalɛ ngɔ nùi 'da Asɛrɛ. Mɛ a lenɔ gɛ: Mikalɛ, Abdoni,

³¹ Hɛlkatɛ do Rɛhɔbɛ.

³² 'Do nɛ, nɛ wa kpa 'bɔ le talɛ ngɔ nùi 'da Nɛftali. Mɛ a olenɔ gɛ: Kedɛsi tɛ Galile, Hamɔtɛ-Dɔrɛ do Kartanɛ. Kedɛsi a le usu tɛ wi kɔ nɛ.

³³ Na mɛ ni, nu fɛlɛ Gɛrsoni wa kpa ole vɛ̃ 'bu nɛ talɛ, do falanɔ kɛ zã nɛ ni we dala do nadalamɛnɔ 'da wa.

³⁴ 'Do nɛ, nɛ tala owi nu kpala Levi, kɛ wa a nu fɛlɛ Mɛrari ni, wa kpa ole mɔ́ wa. Wa kpa le nalɛ ngɔ nùi 'da Zabuloni. Mɛ a olenɔ gɛ: Yokneamɛ, Karta,

³⁵ Dimna do Nahalalɛ.

^36-37 Wa kpa 'bɔ le nalɛ ngɔ nùi 'da Rubɛnɛ. Nùi 'da Rubɛnɛ ma tɛ kulu lì Yɔrdanɛ, si 'biti gba wese, nɛ ma ka mɔ dɛ Yeriko. Lì lenɔ ni a: Besɛrɛ, Yahasi, Kɛdemɔtɛ do Mefatɛ. Bɛsɛrɛ a ngɔ nùi li gba zɔ̃ɛ, nɛ mɛ a le usu tɛ wi kɔ nɛ.

^38-39 Wa kpa 'bɔ le nalɛ ngɔ nùi 'da Gadɛ. Mɛ a olenɔ gɛ: Ramɔtɛ, tɛ nù Galadɛ, Mahanaimɛ, Hɛsɛboni do Yazɛrɛ. Ramɔtɛ a le usu tɛ wi kɔ nɛ.

⁴⁰ Na mɛ ni, owi nu kpala Levi, kɛ wa nu fɛlɛ Mɛrari ni, wa kpa ole vɛ̃ 'bu ngɔ nɛ bɔa, do falanɔ kɛ zã nɛ ni we dala do nadalamɛnɔ 'da wa.

⁴¹ Na mɛ ni, obe Israɛlɛ wa saka le 'bu nɛ nalɛ ngɔ nɛ ngbɛ'dɛ'dɛ ngɔ nùnɔ 'da wa, nɛ wa hã ma hã owi nu kpala Levi.

⁴² Wa hã lenɔ ni mba do falanɔ wa dala do nadalamɛnɔ kɛ zã nɛ ni hã wa.

⁴³ Na mɛ ni, NWA ba nùi vɛ̃ hã obe Israɛlɛ, nɛ́ mbuli a kpua zi hã oyaa wa ni, nɛ wa dɛa tɔa tɛ nɛ.

⁴⁴ NWA dɛa na, obe Israɛlɛ wa nɛ ngɔ owi sɛnɛ wa vɛ̃. Wele kpo kɔ owi sɛnɛ wa wè zi tɛ yolo ti wa gɔ. A dɛa na, obe Israɛlɛ wa kpa dungu fio ngɔ nùi 'da wa vɛ̃, nɛ́ mbuli a kpua zi hã oyaa wa ni.

⁴⁵ Na mɛ ni, mbulunɔ vɛ̃ kɛ NWA Gale kpua zi hã obe Israɛlɛ ni, a dɛa ma, nɛ a là mɔ kpo gɔ.