Yozue 20 - WE NU GALE 1995

Lenɔ we usu tɛ wi kɔ nɛ

¹ Dɛ 'do ki ni, nɛ NWA tumba Yozue,

² we tɔ̃ hã obe Israɛlɛ na, wa saka lenɔ kɛ owinɔ wa wia sɛ do usu tɛ wa kɔ nɛ, nɛ́ kɛ a ba zi do nu a hã Mɔizɛ ni.

³ Mba gɔ, fala Mɔizɛ 'bana zi ni, nɛ NWA Gale tɔ́a zi hã a na: “Fala kɛ wele gbɛ ngba ɛ, kɔ a gbɛ a do mbana gɔ, nɛ ma wia na, wi gbɛ wi ni kpa le kpo we usu tɛ̃ a kɔ nɛ. Ní gɔ, nɛ onya fie wa gbɛ sɛ a we bili nu gbã nya wa, kɛ a fia ni.

⁴ Na mɛ ni, wi gbɛ wi yu sɛ dɛ kɔ le kpo, we usu tɛ̃ a kɔ nɛ. Kɔ a hɔ nu ngba le ni, nɛ a yolo sɛ nu dɛ li fanda wa dungu nɛ we yɔlɔ do wenɔ ni, nɛ a tɔ̃ sɛ gulu mɛ kɛ ma dɛa a ni hã okumunɔ. Kɔ okumunɔ ni wa zele a do'do, nɛ wa la sɛ a, nɛ a le kɔ le, nɛ wa ba fala ɔi hã a.

⁵ Kɔ fala kɛ nya fie tɛ 'dɔkɔlɔ a we gbɛ a, we bili nu gbã nya a nde, nɛ nde ma wè na, winɔ kɔ le ni wa hã a hã nya fie ni gɔ. We duzu kɛ wi ni a gbɛ ngba a do mbana gɔ, nɛ a bà mãlã a dati gɔ.

⁶ We duzu nɛ, ma wia na, a 'bana dɛ kɔ le ni gbaa na, owi gɔnɔ wenɔ wa be na, a do 'dã gulu we bina sɛ nɛ de. Fala kɛ wa gɔnɔ we ni do'do, nɛ ma wè na, a la le ni do ti gɔ. Ma wia na, a 'bɔ gbaa kɔ gã nganga dɛ toe do 'da fala ni fe do'do sɛ, nɛ a kpolo tɛ̃ a dɛ kɔ le 'da a de.”

⁷ 'Da fala kɛ obe Israɛlɛ wa nɛa we zele ní, nɛ wa saka le talɛ tɛ kulu lì Yɔrdanɛ si 'biti gɛ̃a wese, we usu tɛ wi kɔ nɛ. Lì lenɔ ni zi a: Kedɛsi tɛ Galile, ngɔ kalanɔ ngɔ nùi 'da Nɛftali. 'Do nɛ a Sikɛmɛ ngɔ kalanɔ, ngɔ nùi 'da Efraimɛ, do Kiriatɛ-Arba, ngɔ kalanɔ, ngɔ nùi 'da Yuda. Mbee li Kiriatɛ-Arba zi a Hebroni.

⁸ Wa saka zi 'bɔ le talɛ tɛ ngɔ mbɛ nùi kɛ wɔkɔsɔ hɔ́ ngɔ nɛ gɔ, tɛ kulu li Yɔrdanɛ, si 'biti gba wese. Li lenɔ ni zi a: Bɛsɛrɛ tɛ ngɔ nùi 'da Rubɛnɛ, do Ramɔtɛ tɛ Galadɛ, tɛ ngɔ nùi 'da Gadɛ, do Golanɛ tɛ Basanɛ, tɛ ngɔ nùi 'da Manase.

⁹ Wa saka zi lenɔ ni na, obe Israɛlɛ do ogele winɔ ngɔ nùi 'da wa, wa wia we usu tɛ wa kɔ nɛ, do tɛlɛ tɛ kɛ na, wele gbɛ ngba a, hã a dɛ̃ do mbana gɔ ni, nɛ a usu tɛ̃ a kɔ mbe kpo, nɛ a 'bana dɛ di ni. Na mɛ ni, nya fie kɛ a fa we bili nu gbã fio nya a ni, wè zi tɛ gbɛ a dati kɛ na, wa gɔnɔ we 'da a dɛ li owinɔ vɛ̃ ni gɔ.