Yozue 2 - WE NU GALE 1995

Yozue tumba owi miã bɔa we zɔ le Yeriko

¹ Obe Israɛlɛ wa 'bana zi tɛ fala ɔi tɛ Sitimɛ, nɛ Yozue tumba owi miã bɔa ngɔ nù Kanana, we zɔ gã le Yeriko do lenɔ kɛ zã nɛ ni. Wa hɔa 'di mɔ, nɛ wa le kɔ tɔa 'da mbe wuko ndumba kpo, li a a Rahabɛ, nɛ wa ɔ dɛ di ni.

² Nɛ do kpo tũi ni, nwa ngɔ Yeriko zila na, obe Israɛlɛ wa hɔa we zɔ Yeriko do lenɔ kɛ zã nɛ ni.

³ Nɛ a tombo to hã Rahabɛ na, winɔ bɔa kɛ wa ɔa kɔ tɔa 'da a ni, wa tɛa we zɔ nùi, kɔ ma wia na, a 'dɔlɔ wa hɛ̃ ɛ dɔ̃ dɔ̃.

⁴ Rahabɛ nɛa we zele ní, nɛ a usu winɔ ni, nɛ a gese hã nwa na: “Mɛ a gbãlã we, Owele bɔa wa hɔa sɔ 'da mi gɛ, nɛ nde mi ĩ̀ ti fala wa yula nɛ ni gɔ.

⁵ Nɛ wa la 'bɔ do gɛ̃a wese tũ, nɛ nde owi zɔ mɔ nu ngbo le wa sɔ tɛ nɛ we kpe ma. Nɛ mi ĩ̀ fala wa nɛa nɛ ni gɔ. Kɔ nɛ wɛlɛ tɛ nɛ, nɛ nɛ kpa sɛ wa.”

⁶ Nɛ nde ĩ na, Rahabɛ tɔ̃a sɔ hã owi miãnɔ ni na, wa kũ dɛ zu tɔa i, nɛ wa usu tɛ wa dɛ ti okɛ'dɛ kpalɛnɔ kɛ a yɛlɛ ma ni.

⁷ Nɛ owi tonɔ 'da nwa wa hɔa nza kɔ le we yu 'dɔkɔlɔ owi miãnɔ ni, nɛ owi zɔ mɔ nu ngbo le, wa kpia nu nɛ. Owi tonɔ 'da nwa wa fa owi miãnɔ ni tɛ li wala kɛ ma nɛ dɛ nu lì Yɔrdanɛ, gbaa we hɔ tɛ fala wa kũ do lì Yɔrdanɛ ni.

⁸ Nɛ Rahabɛ kũ dɛ zu tɔa i, nɛ nde owi miãnɔ wa tɛ ɔ̃ yala gɔ.

⁹ Nɛ a tɔ̃ hã wa na: “Mi ĩ na, NWA hã nùi 'da lɛ hã nɛ. Lɛ winɔ kɔ le gɛ, lɛ tana kili gbulu gbulu we nɛ, nɛ lɛ 'bɔ do ngawi bina.

¹⁰ Lɛ zila na, NWA dɛa zi na, gba lì Sala Tɔ̃ ma ɔ̃sɔ̃ 'da fala nɛ zi tɛ hɔ nza ngɔ nù Ezipeto ni. Nɛ lɛ zila 'bɔ na, nɛ gbɛa Sihoni do Ɔgɛ, onwa ngɔ nù Amori, kɛ kulu lì Yɔrdanɛ si 'biti gba wese, nɛ nɛ 'danga omɛnɔ 'da wa vɛ̃.

¹¹ Lɛ nɛa we zele ní, nɛ sila lɛ gɔnɔ zurr, nɛ fo wi kpãlã sila ɛ we yolo ti nɛ 'bɔ bina. Mba gɔ, NWA Gale 'da nɛ a Gale kɛ a li nza i, nɛ a 'bɔ ngɔ nù nga.

¹² Hã mi gɔ kɔ̃ nɛ na, nɛ kana tɛ nɛ hã mi do zu li NWA na, nɛ be sɛ dia kɔ sila hã nu fɛlɛ kula 'da mi, kpasaa nɛ́ kɛ mi bia dia kɔ sila hã nɛ ni. Nɛ nɛ dɛ́ mbe mɔ kɛ ma be hã mi na, sila mi tɛ ɔ̃ ngɔ gɔ ni.

¹³ Nɛ kpó mbulu hã mi na, nɛ kpasa sɛ baa mi, do naa mi, do obulu nya mi, do oboko nya mi, do nu fɛlɛ kulanɔ 'da wa vɛ̃. Nɛ nɛ bá sɛ wala hã wele kpo na, a gbɛ lɛ gɔ.”

¹⁴ Nɛ owi miãnɔ ni wa gisa hã a na: “'Da fala kɛ Gale a hã sɛ nùi gɛ hã lɛ ni, nɛ lɛ be sɛ dia kɔ sila hã mɔ, nɛ́ kɛ ma wia ni. Kɔ mɔ tɛ tɔ̃̀ we tɛa 'da lɛ hã wele kpo gɔ. Lɛ kana tɛ lɛ na, fala kɛ lɛ dɛ̃ olo nu lɛ kɛ lɛ tɔ̃a ni gɔ, nɛ fio gbɛ́ lɛ!”

¹⁵ Tɔa 'da Rahabɛ nda'da zi tɛ̃ ɛ do ngbo le. Ma hã a kpua fɛlɛ 'dɛ tili winɔ bɔa ni, nɛ a zumu wa do li holo tɔa dɛ nù i.

¹⁶ Nɛ a tɔ̃ hã wa na: “Nɛ nɛ́, hã nɛ úsú tɛ nɛ ngɔ kala i, da dɛ kɔ wi tonɔ 'da nwa wa kpá nɛ gɔ. Nɛ nɛ ɔ sɛ dɛ di ni 'do tũ talɛ, hã wa kpolo tɛ wa do'do, sɛ nɛ nɛ si dɛ 'da nɛ i de.”

¹⁷ Nɛ owi miãnɔ ni wa tɔ̃ hã a na: “Lɛ dɛ sɛ olo nu lɛ, ɔ nɛ kɛ lɛ kana do tɛ lɛ hã mɔ ni.

¹⁸ Mɛ kɛ mɔ dɛ sɛ ma, ma kɛ: Ngba soe lɛ bi sɛ nùi gɛ ni, nɛ mɔ ba sɛ fila fɛlɛ kɛ mɔ zumu do lɛ gɛ, nɛ mɔ kpo ma dɛ li holo tɔa. Nɛ mɔ ngɛmɛ li baa mɔ, do naa mɔ, do obulu nya mɔ, do oboko nya mɔ, do nu fɛlɛ kulanɔ 'da mɔ vɛ̃ dɛ kɔ tɔa 'da mɔ.

¹⁹ Kɔ fala kɛ wele hɔ nza kɔ tɔa 'da mɔ, hã a fe, nɛ nde ma zɔa a wele nɛ, ma zɔ̀ lɛ gɔ. Kɔ ní gɔ, hã wa gbɛ wele kpo kɔ tɔa 'da mɔ, nɛ nde mɛ sɛ a we 'da lɛ.

²⁰ Kɔ fala kɛ mɔ tɔ̃ we tɛa 'da lɛ hã wele, nɛ nde lɛ dɛ̃ sɛ olo nu lɛ, ɔ nɛ kɛ lɛ kana do tɛ lɛ hã mɔ ni gɔ.”

²¹ Rahabɛ zila ní, nɛ a kɔ̃, na a tɔ̃ hã wa na, wa Ia. Wa la do'do, nɛ a kpo fila fɛlɛ ni dɛ li holo tɔa 'da a.

²² Owi miãnɔ wa la dɛ ngɔ kalanɔ i, nɛ wa usu tɛ wa i mɔ. Nɛ owi tonɔ 'da nwa wa fa wa 'do tũ talɛ falanɔ vɛ̃ zãa, nɛ wa kpà wa gɔ, nɛ wa si dɛ Yeriko nga.

²³ 'Do nɛ, nɛ owi miãnɔ wa zĩlĩ kalanɔ ni, nɛ wa kũ lì Yɔrdanɛ, nɛ wa si dɛ 'da Yozue i. Wa hɔa i mɔ, nɛ wa tɔ̃ we mɛnɔ vɛ̃ ma dɛa wa ni hã a.

²⁴ Wa na: “Do gbãlã we, nwa 'dɔlɔ nùi vɛ̃ hã lɛ. Winɔ i mɔ ni vɛ̃ wa do kili, nɛ fo wi kpãlã sila ɛ we yolo ti lɛ bina.”