Yozue 18 - WE NU GALE 1995

Yozue kɛ̃a nù hã otala nu kpala Israɛlɛ

¹ 'Do kɛ obe Israɛlɛ wa ba nùi vɛ̃ ni, nɛ wa mba li ngba wa vɛ̃ tɛ kɔ le Silo. Nɛ wa zĩ tɔa Tande kpa Ngba Wi do Gale.

² Nɛ nde wa tɛ kpà zi fala hã nu kpala obe Israɛlɛ sambo gɔ.

³ Na mɛ ni, nɛ Yozue aka wa na: “Nɛ 'bɔ na, nɛ nɛ we ɔ ngɔ nùi kɛ NWA Gale 'da oyaa nɛ, a hã zi ma hã nɛ ni soe ki nge nde?

⁴ Nɛ sáká owi wili talɛ kɔ nu kpala kpo do kpo. Nɛ mi tombo sɛ wa ngɔ nùnɔ vɛ̃, we zɔ nùi kɛ nu kpala wa kpo do kpo wa kpa sɛ ma ni. Nɛ wa si sɛ we tɔ̃ tɛlɛ tɛ nɛ hã mi.

⁵ Nɛ nde nu kpala Yuda wa 'bana sɛ dɛ ngɔ nùi 'da wa tɛ si ba gɔtɔ. Nɛ nu kpala Yozɛfu wa 'bana sɛ dɛ ngɔ kɛ 'da wa tɛ si gbãlã ngɔ.

⁶ Kɔ fala kɛ nɛ be gulu nùnɔ nɛ zɔa ni hã mi do'do, nɛ mi to sɛ zeke ngɔ nɛ dati NWA, sɛ nɛ mi kɛ̃ sɛ nùnɔ hã nu kpala kpo do kpo de.

⁷ Nɛ nde nu kpala Levi kpá sɛ nù ɔ nɛ ogele wanɔ ni gɔ, we duzu kɛ ma wia na, kɛ 'da wa, wa 'bana tɛ dɛ to nganga hã NWA. We nu kpala Gadɛ, do Rubɛnɛ, do mbee nu kpala Manase, wa kpa zi nùi tɛ kulu Yɔrdanɛ si 'biti gba wese i ia. Wi hã zi ma hã wa, wi a Mɔizɛ, wi dɛa to 'da Gale.”

⁸ Na mɛ ni, owinɔ kɛ wa saka zi wa ni, wa 'dafa we la nɛ. Nɛ nde dati kɛ na wa la ni, nɛ Yozue tɔ̃ hã wa na: “Nɛ nɛ́, nɛ nɛ yɛnggɛ ngɔ nùi vɛ̃, nɛ nɛ zɔ ma ɔ dia. Nɛ nɛ sí we tɔ̃ tɛlɛ tɛ nɛ hã mi, takɔ mi to zeke ngɔ nɛ dati NWA, we be tɛlɛ tɛ kɛ ma wia na, mi kɛ̃ ma hã nu kpala nɛ ni.”

⁹ Nɛ owinɔ ni wa la, nɛ wa yɛnggɛ ngɔ nùi vɛ̃, nɛ wa kɔmɔ tɛlɛ tɛ kɛ wa kɛ̃a sanga nɛ do 'bili tɛ nu sambo ni dɛ kɔ mbɛti. Nɛ wa kɔmɔ 'bɔ li olenɔ kɔ 'bili tɛ nù kpo do kpo. Wa dɛa toe 'da wa vɛ̃ ia, nɛ wa si dɛ 'da Yozue tɛ Silo i.

¹⁰ Nɛ Yozue tua zeke, we ĩ tɛlɛ tɛ kɛ NWA kɔ̃a na, a kɛ̃ do nùi ni. Nɛ Yozue hã wá 'bili tɛ nù kpo kpo hã otala nù kpala Israɛlɛ.

Nùi kɛ nu kpala Bɛnzamɛ kpa zi ma

¹¹ Kuti nùi kɛ wa ba do wala to zeke ni zi a mɔ́ nu kpala Bɛnzamɛ. Yozue ba nùi hã wa dɛ sanga tɛ ngba nu kpala Yuda do obe zã Yozɛfu.

¹² Li ngbala nùi kɛ si gbãlã ngɔ, yolo zi do nu lì Yɔrdanɛ, nɛ ma kũ dɛ Yeriko, si gbãlã ngɔ. Nɛ ma la si 'biti gɛ̃a wese do tɛ lenɔ ngɔ kalanɔ, gbaa we hɔ tɛ li gba zɔ́ Bɛtɛ-Avɛnɛ.

¹³ Yolo di ni, nɛ li ngbala la do tɛ Luzɛ kɛ wa sa 'bɔ li nɛ na Betɛlɛ, si ba gɔtɔ. Nɛ ma zĩlĩ dɛ Atrɔtɛ-Adarɛ do ngɔ kala, kɛ ma dɔ̃ɔ do Bɛtɛ-Horoni, tɛ ti nyanga kala, si ba gɔtɔ.

¹⁴ Yolo dɛ ngɔ kala ni, tɛ si 'biti gɛ̃a wese, nɛ li ngbala yapa, nɛ ma la si ba gɔtɔ, we Sɔkpɔ tɛ Kiriatɛ-Bala, kɛ wa sa 'bɔ li nɛ na Kiriatɛ-Yearimɛ. Kiriatɛ-Yearimɛ zi a nùi 'da nu kpala Yuda. Tɛlɛ tɛ kɛ li ngbala si 'biti gɛ̃a wese la nɛ gɛ a ni.

¹⁵ Li ngbala kɛ si ba gɔtɔ yolo do Kiriatɛ-Yearimɛ, nɛ ma la dɛ si 'biti gɛ̃a wese, we Sɔkpɔ tɛ zu lì Nɛftoa.

¹⁶ Yolo di ni, nɛ li ngbala zĩlĩ do ti nyanga kala kɛ ma ka mɔ dɛ tɛ gbangɔlɔ̃ Hinɔmɛ, tɛ si 'biti gbangɔlɔ̃ Orɛfa do si gbãlã ngɔ. Nɛ ma ngbɛlɛ do nu gbangɔlɔ̃ Hinɔmɛ, kɛ ma ti nyanga kala 'da Oyebuzi si ba gɔtɔ, nɛ ma zĩlĩ gbaa we Sɔkpɔ tɛ Ɛnɛ-Rogɛlɛ.

¹⁷ Nɛ ma la si gbãlã ngɔ dɛ tɛ le Ɛnɛ-Semɛsi 'do le Gɛlilɔtɛ, kɛ ma ka mɔ dɛ tɛ kala Adumimɛ. Yolo di ni, nɛ li ngbala zĩlĩ dɛ ngɔ ta kɛ li ma a Bohanɛ. Bohanɛ a li mbe kpo kɔ benɔ 'da Rubɛnɛ.

¹⁸ 'Do nɛ, nɛ ma la dɛ kɔ gbangɔlɔ̃ Yɔrdanɛ, nɛ ma la si gbãlã ngɔ do kɔ gbangɔlɛ̃ ni.

¹⁹ Nɛ ma la si tɛ Bɛtɛ-Hogla, si gbãlã ngɔ we Sɔkpɔ tɛ nu Ndɔ Fio, tɛ fala fua lì Yɔrdanɛ a ngɔ Ndɔ Fio ni. Tɛlɛ tɛ kɛ li ngbala si ba gɔtɔ la nɛ gɛ a ni.

²⁰ Li ngbala nùi kɛ si 'biti gba wese, mɛ a lì Yɔrdanɛ. Ki ni a ngbala nùi kɛ Yozue ba zi hã nu kpala Bɛnzamɛ gɛ a ni.

²¹ Olenɔ kɛ ma zi a mɔ́ nu kpala Bɛnzamɛ ni ma kɛ: Yeriko, Bɛtɛ-Hogla, Emɛkɛ-Kɛsisi,

²² Bɛtɛ-Araba, Sɛmaraimɛ, Betɛlɛ,

²³ Avimɛ, Para, Ofra,

²⁴ Kɛfarɛ-Amona, Ofni do Geba, mba vɛ̃ le 'bu ngɔ nɛ bɔa do be lenɔ kɛ zã nɛ ni.

²⁵ Nɛ ma mba zi 'bɔ do olenɔ gɛ: Gabaoni, Rama, Bɛerɔtɛ,

²⁶ Mispe, Kɛfira, Mɔsa,

²⁷ Rekɛmɛ, Irpeɛlɛ, Tarala,

²⁸ Sela, Elɛfɛ, le 'da Oyebuzi kɛ li nɛ 'bɔ a Yeruzalɛmɛ, Gibea do Kiriatɛ, mba zi vɛ̃ mɛ a ogã le 'bu ngɔ nɛ nalɛ, do be lenɔ kɛ zã nɛ ni. Ma mba vɛ̃ ni zi a nùi 'da onu kpala Bɛnzamɛ.