Yozue 17 - WE NU GALE 1995

Ombee nu kpala Manase wa kpa nù

¹ Yozue ba 'bɔ nù hã nu kpala Manase. Manase zi a kuti bulu be 'da Yozɛfu, nɛ nde kuti bulu be 'da Manase kɛ li a a Makirɛ, baa Galadɛ, a kpa zi nù ia. A a nga wi bolo, nɛ a kpa nù Galadɛ do nù Basanɛ, kɛ tɛ Yɔrdanɛ si 'biti gba wese.

² Na mɛ ni, Yozue ba mbee 'bili tɛ nùi tɛ Yɔrdanɛ, kɛ si 'biti gɛ̃a wese, hã otala nu kpala Manase. Li otala mbe benɔ 'da Manase zi a: Abiezɛrɛ, Helɛkɛ, Asriɛlɛ, Sekɛmɛ, Hefɛrɛ do Sɛmida. Wele do wele zi do nu fɛlɛ a, nɛ nu fɛlɛ kula kpo kpo kpa zi 'bili tɛ nùi kɛ kulu Yɔrdanɛ si 'biti gɛ̃a wese.

³ Be yaa Manase kpo, li a a Sɛlofadɛ, be 'da Hefɛrɛ zi do bulu be bina, tati nɛ a oboko be mɔlɔ. Li wa a: Mala, Noa, Hogla, Milka, do Tirsa.

⁴ Nɛ wa nɛa 'da nganga Elazarɛ, do Yozue be 'da Nunɛ, do okumu lenɔ, nɛ wa tɔ̃ hã wa na: “NWA Gale ba zi nu ɛ hã Mɔizɛ na, a hã tɛ mɛ 'bɔ nù hã lɛ, nɛ́ kɛ a hã ma hã owi wilinɔ kɔ nu kpala lɛ ni.” Ma kɛ Yozue dɛa mbula olo nu NWA Gale, nɛ a hã nù hã oboko benɔ 'da Sɛlofadɛ, nɛ́ kɛ a hã do nùi hã owi wilinɔ kɔ nu kpala wa ni.

⁵ Na mɛ ni, nɛ nu kpala Manase kpa 'bili tɛ nù 'bu, dɛ ngɔ 'bili tɛ nù Galadɛ do Basanɛ tɛ kulu Yɔrdanɛ, si 'biti gba wese, kɛ wa kpa zi ma dati ni.

⁶ Ma dɛa ni mba gɔ, we kɛ Yozue hã zi 'bɔ 'bili tɛ nùi hã owukonɔ kɔ nu kpala Manase, nɛ́ kɛ a hã hã owi wilinɔ kɔ nu kpala wa ni. (Nù Galadɛ zi a mɔ́ tala onu kpala Manase.)

⁷ Na mɛ ni, li ngbala nùi 'da Manase ndua zi tɛ le Asɛrɛ, nɛ ma nɛa gbaa, nɛ ma hɔ tɛ le Mikmetatɛ, tɛ Sikɛmɛ si 'biti gba wese. Nɛ yolo tɛ Mikmetatɛ, nɛ ma zĩlĩ si ba gɔtɔ, gbaa we hɔ tɛ nùi kɛ owi Ɛnɛ-Tapua wa ɔ nɛ ni.

⁸ Le Ɛnɛ-Tapua zi a li ngbala nùi sanga tɛ ngba Manase do Efraimɛ. Nɛ nde wele le Ɛnɛ-Tapua zi ngboo a mɔ́ nu kpala Efraimɛ, nɛ 'bili tɛ nùnɔ kɛ ma zĩ ma ni, zi a mɔ́ nu kpala Manase.

^9-10 Yolo dɛ di ni, nɛ li ngbala le ba kulu fua lì Kana, si 'biti gɛ̃a wese, gbaa we hɔ tɛ gba lì Meditɛrane. Nɛ ombe lenɔ tɛ nu lì ni si ba gɔtɔ, ma zi a mɔ́ nu kpala Efraimɛ. Ĩ na nùi ni do lenɔ ni vɛ̃, ma zi kɔ 'bili tɛ nùi 'da Manase. Nùi 'da Manase kɛ si ngbala gbãlã ngɔ do 'biti gɛ̃a wese, ma kpa zi ngba ɛ do nùi 'da Asɛrɛ, nɛ́ kɛ si ngbala gbãlã ngɔ do 'biti gba wese, ma kpa zi ngba ɛ do nùi 'da Isakarɛ ni.

¹¹ Nu kpala Manase kpa zi 'bɔ ombe le ngɔ nùnɔ 'da Isakarɛ do Asɛrɛ. Olenɔ ni li nɛ a: Bɛtɛ-Seanɛ, Ibleamɛ, Dɔrɛ kɛ tɛ nu lì, Ɛnɛ-Dɔrɛ, Tanakɛ, Megido. Onu kpala Manase wa kpa ma vɛ̃ do owi kɔ nɛ, do olenɔ kɛ zã nɛ kɛ ma ngɔ nù Dɔrɛ ni.

¹² Nɛ nde wa ndaka zi Okanana kɔ lenɔ ni zãa, nɛ Okanana wa 'bana zi ɔ dɛ di ni.

¹³ Gɛnɛ kɔ 'da fala kɛ obe Israɛlɛ wa kpa zi ngawi, nɛ nde wa wè zi we ndaka wa gɔ, ma kɛ wa hã zi to kolofe hã wa.

Onu fɛlɛ Yozɛfu wa gɔa mbé nù

¹⁴ Onu fɛlɛ Yozɛfu wa nɛa 'da Yozue, nɛ wa tɔ̃ hã a na: “NWA Gale wila nu a tɛ lɛ, nɛ lɛ ko dɛlɛ wena. Kɔ gulu kɛ mɔ ba hã lɛ tati a 'bili tɛ nù kpo iko ni we ge nde?”

¹⁵ Nɛ Yozue gese hã wa na: “Ɔ nɛ kɛ nɛ dɛlɛ wena, nɛ nùnɔ tɛ ngɔ kalanɔ Efraimɛ ma gã gɔ, nɛ ma wè do nɛ gɔ ni, ma wia na, nɛ le zã gazanɔ ngɔ nù 'da Opɛrizi, do Orɛfa, nɛ nɛ wa sɛ fala di ni we duzu nɛ.”

¹⁶ Nɛ owi nu fɛlɛ Yozɛfu wa gese na: “Nùnɔ ngɔ kalanɔ ni ma ga gɔ, nɛ ma wé sɛ do lɛ gɔ. Nɛ nde Okanana kɛ wa ɔ tɛ mbɛ nùi do kɔ gbangɔlɛ̃ ni, wa do ongilingili kɛ wa dɛa do mɔ bolo. Nɛ wanɔ wa ɔ kɔ le Bɛtɛ-Seanɛ, do lenɔ kɛ zã nɛ, do wanɔ wa ɔ tɛ kɔ gbangɔlɔ̃ Yizreɛlɛ, wa vɛ̃ do ongilingili kɛ wa dɛa do mɔ bolo ni.”

¹⁷ Yozue nɛa we zele ni, nɛ a tɔ̃ hã nu kpala Efraimɛ, do mbee nu kpala Manase, kɛ wa vɛ̃ wa a onu fɛlɛ Yozɛfu ni na: “Ma ni kpaa. Nɛ dɛlɛ wena, nɛ nɛ nganda wena. Gulu nɛ hã ma wia na, nɛ kpa mbé nù dɛ ngɔ kɛ nɛ kpa ni.

¹⁸ 'Bili tɛ nùi ngɔ kala vɛ̃ sɛ a kɛ 'da nɛ. Mɛ a gaza, nɛ nɛ wa sɛ ma, nɛ nɛ ba ma vɛ̃, yolo ndɔti nɛ we hɔ ndɔti nɛ. Kɔ we duzu Okanana, gɛnɛ kɔ wa nganda wena, nɛ wa do ongilingili kɛ wa dɛa do mɔ bolo ni, nɛ nde nɛ ndaka sɛ wa iko.”