Yozue 16 - WE NU GALE 1995

Owi nu kpala Yozɛfu wa kpa nù

¹ Nùi kɛ obe zã Yozɛfu wa kpa zi ni, li ngbala nɛ do si ba gɔtɔ ndua zi dɔ̃ɔ do zu lì Yeriko, do si 'biti gba wese, dɔ̃ɔ do lì Yɔrdanɛ. Nɛ yolo tɛ le Yeriko ni, lì ngbala nùi kù li gba zɔ̃ɛ, nɛ ma la do ngɔ kalanɔ, gbaa we hɔ tɛ le Betɛlɛ.

² Yolo tɛ le Betɛlɛ, nɛ ma la si tɛ le Luzɛ, nɛ ma la 'bɔ si tɛ le Atarɔtɛ kɛ Oarkɛ wa ɔ zi tɛ nɛ.

³ Yolo di ni, nɛ li ngbala zĩlĩ si 'biti gɛ̃a wese, nɛ ma la do ngɔ nùi 'da Oyafletɛ, gbaa we hɔ tɛ le Bɛtɛ-Horoni, kɛ ma nyanga li kala. Nɛ ma la 'bɔ si tɛ le Gezɛrɛ, we Sɔkpɔ tɛ nu gba lì Meditɛrane.

⁴ Onu kpala Efraimɛ do Manase wa kɛ̃a zi sanga nùi ni dɛ ngbala ngba wa. Nu kpala winɔ bɔa ni zi a obe zã Yozɛfu.

Owi nu kpala Efraimɛ wa kpa nù

⁵ Nùi kɛ nu kpala Efraimɛ kpa zi ni, li ngbala nɛ ndua zi tɛ le Atrɔtɛ-Adarɛ, nɛ ma la si 'biti gba wese, nɛ ma nɛ gbaa tɛ le Bɛtɛ-Horoni kɛ ngɔ kala.

^6-9 Nɛ ma la gbaa we hɔ tɛ le Mikmetatɛ si gbãlã ngɔ. 'Do nɛ, nɛ ma ba nu lì Kana gbaa we hɔ tɛ gba lì Meditɛrane. Nɛ nde li ngbala kɛ si 'biti gba wese ndua zi tɛ le Mikmetatɛ, nɛ ma zĩlĩ si ba gɔtɔ. Nɛ ma la do tɛ olenɔ gɛ: Tanatɛ-Silo, Yanoa, Atarɔtɛ do Nara, nɛ ma Sɔkpɔ tɛ nu lì Yɔrdanɛ dɔ̃ɔ do le Yeriko. Dɛ ngɔ nɛ, Yozue kala 'bɔ gã lenɔ do obe lenɔ kɛ zã nɛ ni, kɛ ma zi ngɔ nùi 'da nu kpala Manase ni, nɛ a hã ma hã nu kpala Efraimɛ do mɔ wa.

¹⁰ Gɛnɛ kɔ na mɛ ni, nɛ nde Oefraimɛ wa ndàkà Okanana, kɛ wa ɔ zi tɛ le Gezɛrɛ ni gɔ. Wa 'bana ɔ dɛ sanga Oefraimɛ ni tia do sɔɛ gɛ, nɛ wa 'bana dɛ to kolofe hã Oefraimɛ.