Yozue 14 - WE NU GALE 1995

Yozue kɛ̃a sanga nù Kanana hã obe Israɛlɛ

¹ Nɛ zɔ́, tɛlɛ tɛ kɛ Yozue kɛ̃a do sanga nù Kanana hã obe Israɛlɛ gɛ, ma kɛ. Mɛ a nùi kɛ kulu lì Yɔrdanɛ, si 'biti gɛ̃a wese. Nɛ winɔ wa kɛ̃a zi nùi hã obe Israɛlɛ, wi zi a nganga Elazarɛ do Yozue, be 'da Nunɛ, do okpasa wi nu fɛlɛ kulanɔ kɔ nu kpala obe Israɛlɛ vɛ̃.

² Wa kɛ̃a ma do 'da mbula kɛ NWA hã zi hã Mɔizɛ ni. A tɔ̃a zi hã a na, wa kɛ̃ nùi kulu lì Yɔrdanɛ, si 'biti gɛ̃a wese, hã onu kpala winɔ kusi do dɔ nɛ, kɛ wa tɛ kpà nù gɔɛ ni. Nɛ nu kpala wele do wele to zeke we nù kɛ a nɛ ba ma ni.

^3-4 Obe zã Yozɛfu wa kɛ̃a zi sanga tɛ ngba wa bɔa: nu kpala Manase, do nu kpala Efraimɛ. Nɛ Mɔizɛ kɛ̃a zi nùi kulu lì Yɔrdanɛ, si 'biti gba wese, hã nu kpala Rubɛnɛ, do nu kpala Gadɛ, do mbee nu kpala Manase ia. Nɛ nde Mɔizɛ hã zi nù hã nu kpala Levi gɔ. A hã zi hã wa tati a le we ɔ kɔ nɛ, do falanɔ kɛ zã nɛ we dala onadalamɛnɔ 'da wa.

⁵ Na mɛ ni, obe Israɛlɛ wa kɛ̃a nùi do 'da mbula kɛ NWA hã zi hã Mɔizɛ ni.

Yozue hã le Hebroni hã Kalɛbɛ

⁶ Mbe tũ kpo, nɛ ombe wi nu kpala Yuda wa nɛa 'da Yozue tɛ Gilgalɛ i we zɔ a. Nɛ wele kpo kɔ wa, li a a Kalɛbɛ, be 'da Yɛfune, nu fɛlɛ Kɛnazɛ, tɔ̃ hã Yozue na: “Fala lɛ 'bana zi tɛ kɔ le Kadɛsɛ-Barnea, nɛ NWA Gale wila zi we ngɔ lɛ do mɔ hã wi 'da a Mɔizɛ. Kɔ ta zu mɔ 'bana ngɔ we kɛ a tɔ̃a zi ni nde?

⁷ Do 'da fala ni, nɛ nde mi zi do 'bu sabɛlɛ nalɛ, nɛ Mɔizɛ, wi dɛa toe 'da Gale, tombo zi mi na, mi nɛ miã nùi kɛ lɛ ngɔ nɛ gɛ. Mi nɛa, nɛ mi si, nɛ mi tɔ̃ we mɛnɔ mi zɔa ni vɛ̃ hã a do wala olo nɛ.

⁸ Nɛ lɛnggɛ nu winɔ kɛ wa kã mi ni, ma a zi kili tɛ owinɔ 'da lɛ wena. Nɛ nde kɛ 'da mi, mi ia zi sila mi ngɔ NWA Gale 'da mi.

⁹ We duzu ma, nɛ Mɔizɛ kpua zi mbulu hã mi na, mi do obenɔ 'da mi, lɛ kpa sɛ nùi gɛ kɛ mi nɛa zi miã nɛ ni, nɛ nùi ni sɛ a mɔ́ mi do nu fɛlɛ mi fai.

¹⁰ NWA tɔ́a zi we gɛ hã Mɔizɛ, 'da fala kɛ lɛ 'bana zi tɛ yɛnggɛ li gba zɔ̃ i ni. Nɛ ma la sɔɛ gɛ 'bu sabɛlɛ nalɛ ngɔ nɛ mɔlɔ. Kɔ mɔ zɔ́, NWA dɛa na mi 'bana nza fai, nɛ́ kɛ a kpua do mbulu nɛ hã mi ni, nɛ mi do 'bu sabɛlɛ ngbɛ'dɛ'dɛ ngɔ nɛ mɔlɔ sɔɛ gɛ.

¹¹ Nɛ nde mi 'bana do ngawi fai, ɔ nɛ 'da fala kɛ Mɔizɛ tumba zi do mi we zɔ nùi gɛ ni. Kɔ fala mɔ tombo mi we bi bolo, tabi we dɛ gele to nde, nɛ mi nɛ sɛ iko.

¹² Kɔ ngangga ni, mi gɔ kɔ̃ mɔ na, mɔ hã nùi ngɔ kalanɔ gɛ hã mi, we kɛ mɛ a nùi kɛ NWA kpua zi mbulu nɛ hã mi. 'Da fala ni, mi tɔ̃a zi hã mɔ na, Oanakɛ, ogba du winɔ ni wa zi ngɔ nùi gɛ boe, nɛ wa ɔ kɔ gã lenɔ kɛ gba ngbo zĩ ma takpa. Nɛ nde fala kɛ nwa wele nu a tɛ mi, nɛ mi ndaka sɛ wa, nɛ́ kɛ a tɔ̃a ni.”

¹³ Yozue zila ní, nɛ a wele nu a tɛ Kalɛbɛ, be 'da Yɛfune, nɛ a hã le Hebroni hã a.

¹⁴ Na mɛ ni, le Hebroni mɛ a mɔ́ nu fɛlɛ Kalɛbɛ, be 'da Yɛfune, wi nu fɛlɛ Kenazɛ tia do sɔɛ gɛ. Wa kpa ma we kɛ Kalɛbɛ ia zi sila a vɛ̃ ngɔ NWA Gale 'da wa obe Israɛlɛ.

¹⁵ Zɛ dati, wa sa zi li Hebroni na Kiriatɛ-Arba, tabi Arba, we kɛ Arba dulu zi nɛa ngɔ tala Oanakɛ vɛ̃. Nɛ obe Israɛlɛ wa kpia tɛ wa olo bolonɔ wa bi zi ni.